Kugusira po kutanta asi kudivara eyi va ku zonena ndi kudira kukara nomalizuvho gonkoko. Kugusira po kapi aku tanta asi ono kwatesa ko eyi va kuzonena ndi o lininkise ngwendi kapi ya horoka.

MPANGO ZOMOBIBELI: “Omu lididimike-didimikire, tomu ligusa-gusire po, nsene muna lizono namukweni.”—Vakorosi 3:13.

Aaron kwa tanta asi: “Nsene wa hara muntu, ove kapi ngo demenena komapuko gendi nye ngo demenena koyikara yendi ndi omu a hetekere ko kurugana youhunga.”

Nsene o kara nonkoko, ove kuvhura kulikoresa nyamoge parutu nopamalizuvho, ntani kuvhura kutezesa po nonkwara doge.

Julia kwa tanta asi: “Ezuva limwe mugara gwange kwa hundilire nge egusiropo koyininke eyi ya koresere nge unene. Ayo kwa digoperere nge kumugusira po. Konyima, na ya liverere kweyi na dilire kumugusira po usimbu-simbu. Ayo kuretesa po yinka ya hana hepero mononkwara.”

LIPURA ASI

Sikando sokukwama ko apa mulikwali goge nga uyunga ndi nga rugana eyi ngayi ku koresa, lipura asi:

• ‘Ame kufunduka usimbu ndi?’

• ‘Eyi ana rugana nge ya hepa egusiropo ndi kuvhura tupu ni yi divare?’

ZOGERA NOMULIKWALI GOGE

• Siruwo sokuhura kupi ayi tu gusa mokuligusira po?

• Yisinke twa hepa kurugana ko yipo tu ligusire po usimbu-simbu?

MAGANO

• Nsene mulikwali goge ana ku zonene, wa ha mu likida yikara yoyidona.

• Hetekera ko kudivara mapuko gomulikwali goge, nokudiworoka asi “natuvenye kupuka popanzi.”—Jakopo 3:2.

Kimberly kwa tanta asi: “Ureru kugusira po nsene natuvenye tuna lipuka, nye udigu kugusira po nsene gumwe tupu ana lipuka. Kutambura egusiropo ntani kugusira po kuhepa po nawa-nawa elinunupiko.”

MPANGO ZOMOBIBELI: ‘Omu genderere kulizuvha ndi kugusira po.’—Mateusa 5:25.