Nkareso kuna kara nkedi ezi muntu a tokora kuparuka. Pasihonena, ove kukondja nkenye apa mokuhungika mwanayinye ndi? Yosili ono hara kuronga vana woge nkareso ozo.

Ntani ono hara kuronga vana woge asi ya kara nomulyo kurugana unene, nokudira kukara nompongo ntani kugazadara ko wopeke, yikara eyi ga hepa kutunga po muntu age simpe munona.

MPANGO ZOMOBIBELI: “O ronge munona asi ngapi omu nga kara, makura age nga yi diworoke moukaro wendi naunye.”—Yisewe 22:6.

Momazuva aga goyikwakonentu, nkareso zongwa mulyo unene. Zinya gedina Karyn kwa tanta asi: “Mapukiso gana vhuka kuvhura kugagwana nkenye siruwo kupitira moyikwakonentu. Kuvhura tu hingire novana vetu nye posiruwo oso awo kuna kutarera yininke yokudira kuwapera!”

MPANGO ZOMOBIBELI: ‘Vakurona ndi vantu wonondunge va diva kuhangura uwa koudona.’—Vahebeli 5:14.

Ayo mulyo kugazadara ko wopeke. Ayo kwa kwatera mo kuuyunga nonkango edi (ngwendi asi “na kanderere” ntani “mpandu”) nokukara nosinka kwava wopeke, ano nkareso zangesi zina pumbwa movantu naina, morwa awo kuna kulitura mo unene moyikwakonentu kupitakana vantu vakwawo.

MPANGO ZOMOBIBELI: “Eyi wa hara asi yiyo nava ku ruganena vantu, nove o yi va ruganene.”—Rukasa 6:31.

Va ronga omu va hepa kukara. Pasihonena, epaparo limwe kwa likida asi vadinkantu ureru kunyokera po eligwanekero panyama nsene va yi va zeresera nawa-nawa asi nkareso zangoso kapisi ngwa.

EGANO: Ruganesa sihorokwa kasi horokere ntaantani mokuzogera novana woge kuhamena nkareso. Pasihonena, nsene kombudi kava seye ko kuhamena mudipagi, kuvhura o tante asi: “Ayo yidona sili monkedi omu vantu vamwe ava likida ehandu lyawo kwava wopeke. Omu ono kugazara, yisinke ayi ninkisa vantu va ya kare ngoso?”

Brandon kwa tanta asi: “Udigu unene kovanona mokuhangura uwa koudona nsene kapi va diva asi yipi po yoyiwa ndi yoyidona.”

Va ronga nonkedi donongwa. Nampili vanonagona kuvhura va lironge kuuyunga asi “na kanderere” ntani “mpandu” nokulikida efumadeko kwava wopeke. Buke zimwe kwa tanta asi: “Moomu vanona vana kudimburura asi awo kwa hamena kepata, kosure ntani monkarapamwe, yimo nava liwapaikira kurugana yininke yoyiwa yipo wopeke nawo va gwanene mo mauwa, kapisi velike tupu.”—Parenting Without Borders.

EGANO: Pa vana woge yirugana mokuvavatera va lironge nkareso zokuvatera vakwawo.

Tara kwa tanta asi: “Nsene vana vetu va yika kurugana yirugana ngesi, kapi ngayi ka va digopera apa ngava ka paruka velike. Kurugana ngaku kara ruha rweparu lyawo.”