Apa valikwali ava ruganene kumwe, awo kukara ngwendi musingi gondira nasipanera gwendi. Nampili pa horoke maudigu, nkenye ogu a ruganese nkango ezi asi “ose” mevango lyokuuyunga asi “ame.”

MPANGO ZOMOBIBELI: “Awo kapisi vavali, hawe, awo rutu rumwe tupu.”—Mateusa 19:6.

Christopher kwa tanta asi: “Nonkwara kapisi sirugana sagumwe tupu. Valikwali va hepa kuruganena kumwe yipo yi va tompoke.”

Apa aga horoka maudigu, valikwali ava ava dili kuruganena kumwe, nkenye ogu kupa usima mukwawo mevango lyokudemenena koudigu. Ano udigu woununu tau ya kara nye udigu wounene.

Alexandra kwa tanta asi: “Kuruganena kumwe mulyo unene mononkwara. Name namugara gwange ngano kapi atu ruganene kumwe, ngano ose kwa fana ngwendi vantu ava va tunga kumwe nye kapi ava tura po matokoro gomulyo kumwe.”

LIPURA ASI

• Ame kutara yimaliwa eyi ani gwana asi “yange nyamelike” ndi?

• Nsene nina hara kukahafera po, ame kusiga mulikwali gwange ndi?

• Ame kuligusa ko kekoro lyomulikwali gwange, nampili ngomu ga kara nelikwatakano nawo ndi?

ZOGERA NOMULIKWALI GOGE

• Moyininke musinke atu ruganene kumwe ngovalikwali?

• Momaruha musinke twa hepa kuwapukurura?

• Yisinke natu rugana ko yipo tu wapukurure omu atu ruganene kumwe?

MAGANO

• Gazara asi one kuna kudana bala nye nkenye ogu kuna hama kosipana sapeke. Nye, yisinke nomu rugana mu lipakerere kumwe yipo mu kare mosipana simwe tupu?

• Mevango lyokugazara asi: ‘Ngapi omu nani vena?’ nye gazara asi: ‘Ngapi omu natu vena?’

Ethan kwa tanta asi: “Kapisi hepero kudemenena asi yilye ana kara mouhunga nogu ana kara mepuko. Nye yomulyo po yokukara nombili mononkwara ntani mouumwe.”

MPANGO ZOMOBIBELI: “Walye omu lipakere mbili nyamweni nyonelike, nye omu pakere hena novakweneni mbili.”—Vafilipi 2:3,4.