Vareti ava ava tura po sihonena sosiwa kuparuka kuliza neyi ava rongo. Pasihonena, wa ha ndindira ko komunoge a uyunge usili nsene age kukuzuvha apa o uyunga asi: “Mu tantera asi pwato pembo,” nsene kapi ono hara kuuyunga nagumwe ogu ana wiza pembo lyoge.

David kwa tanta asi: “Nonkango edi asi ‘kwama eyi ani ku tantere, kapisi o kwame sihonena sange,’ kapi adi rugana kovanona. Awo kukwama nkenye eyi atu uyunga neyi atu rugana, ntani kuvhura va yi dimburure nsene asi ose nyamwetu kapi atu kwama eyi atu va rongo.”

MPANGO ZOMOBIBELI: “Ove kuudisira vantu asi, walye omu vaka, nye ove nyamoge kuvaka?”—Varoma 2:21.

Vanona novadinkantu kuhonena unene vakurona vawo kupitakana omu ava honene womapupi gawo. Eyi kulikida asi nyove ya tumbukira kuronga vana woge nzira zouhunga, omu mwa hamena kusikisa mo eyi o zuvhisa.

Nicole kwa tanta asi: “Kuvhura tu rugurure sininke yikando yoyinzi nokulipura nsene munwetu kuna kuyikwata egano, nye apa ngatu dira kurugana eyi atu mu rongo, munona nga yi dimburura. Vanona kudemenena unene kweyi atu rugana nampili tu gazare asi kapi vana kuyimona.”

MPANGO ZOMOBIBELI: ‘Unongo ou wa tunda meguru, kapi wa paka uyilipaki.’—Jakopo 3:17.

Konakona nkareso zoge. Yilihafeso musinke o tarere? Ngapi omu o tekura mulikwali goge novana woge? Vantu musinke o kara-kara nawo? Ove kugazadara ko wopeke ndi? Monkedi omu wa kara, yimo ono harere vana woge nawo va kare ndi?

Christine kwa tanta asi: “Name namugara gwange kapi atu sininike vana vetu va kwame nkareso ezi twa dira kukara nazo.”

Nsene ono lipuka, hundira egusiropo. Vana woge va yi diva asi kapi wa sikilira mo. Pokutanta asi “sori” komulikwali goge nokovana woge apa yina wapere, ove ngoso kuna kuvaronga sikara sokuhungika nesi selinunupiko.

Robin kwa tanta asi: “Vana vetu va hepa kuzuvha omu tuna kutambura epuko lyetu, ntani va hepa kuzuvha omu tuna kuhundira egusiropo nsene tuna lipuka. Nsene tu dira kuyirugana, awo ngava lironga tupu kuhoreka mapuko gawo.”