YOVADINKANTU
12: Yitambo
EYI AYI TANTA
Sitambo kapisi nzodi tupu, aso kuna kara sininke esi ono hara kusikisa mo. Amo kwa hamena mo efaneko, marunduruko kuliza noukaro ntani elituromo lyenene.
Yitambo kuvhura kukara yopokaruwogona (ngwendi yokugusa mazuva ndi yivike mokuyisiksa mo), yokugusa makwedi ntani yosiruwo sosire (ngwendi yokugusa mvhura zimwe ndi dononzi ngoso). Yitambo yosiruwo sosire kuvhura kuyisikisa mo pokulitulira po yitambo yopokaruwogona ndi makwedi.
EYI YA KARERA NOMULYO
Kusikisa mo yitambo kuvhura kukupameka nokunkondopeka ukaume ntani kugwederera koruhafo roge.
Uradi: Apa o litulire po yitambo yopokaruwogona nokuyisikisa, ayo kukupameka yipo o litulire po yitambo yoyinene. Ntani ngayi ku vatera o dire kugwira momakondjeso govakaume.
Ukaume: Vantu kwa hara kukara novantu ava va kara noyitambo meparu ndi ava va diva eyi vana hara ntani nokurugana koyuma mokuyisikisa mo. Ntani hena, nkedi zimwe zokunkondopeka ukaume kuna kara pokuruganena kumwe nomuntu ogu ga kara nositambo ngwendi soge.
Ruhafo: Apa atu litulire po yitambo nokuyisikisa mo, kulizuvha ruhafo morwa yina tu tompoka.
Christopher kwa tanta asi: “Ame kwa hara kulitulira po yitambo. Morwa ayo kuninkisa nge ni rugane ko yuma nokudemenena mokuyisikisa mo. Nsene ono sikisa mo yitambo yoge, kulizuvha uwaawa nokutanta asi: ‘Yaroo, yina tompoka nge! Nina sikisa mo eyi na tameka.’”
MPANGO ZOMOBIBELI: “Nsene o ndindira asi tanko mpepo nomaremo yi zire mo, narumwe si asi ngo kune ndi asi ngo teze yuma.”—Muudisi 11:4.
EYI NO RUGANA
Ruganesa nonkedi edi mokulitulira po yitambo ntani nokuyisikisa mo.
Nongonona. Tjanga yitambo nokudidilika asi yipi po ono hara kusikisa mo pomuhowo ntani neyi nayi kwama ko.
Efaneko. Nkenye sitambo, rugana eyi yina kukwama ko:
Litulira po ezuva eli ono hara kusisikisa mo.
Didilika eyi ya hamena mo.
Gazadara ko yilimbikiso eyi nayi vhura kuwiza po nomu no yi kohonona po.
Rugana ko yuma. Kapisi o ndindire asi nayinye yi gwanene po ntani no tameka. Lipura asi: ‘Sininke musinke somuhowo nani vhura kurugana yipo ni sikise mo sitambo sange?’ Makura sirugana. Nkenye apa no rugana ko yuma yi didilika dogoro ngo si sikise mo.
MPANGO ZOMOBIBELI: “O faneke nawa yuma yoge ngo gwane mo yoyinzi.”—Yisewe 21:5.
