Kupi no gwana ehuguvaro lyosili?

TU TANTE asi vili zoge zina hageke kurugana ntani kwa kumoneka asi zina zonauka. Ono hara va ka zi wapeke, nye wa hepa kutura po etokoro. Matjingiso gonongesefa dokupangera novili manzi, navenye kuhuguvaresa vantu, nye eyi ava uyunga yimwe kapisi usili. Ngapi nsene o zuvha asi musinda goge yige ga pangera vili ozo nomvhura dongandi da ka pita? Ntani ana hara kukuvatera kuzipangera mawoko-woko. Ove no tura po etokoro lyewa, ndi ngapi?

Ngesi hetakanesa vili ozo kehuguvaro eli wa kara nalyo. Nsene o dimburura asi ove kuna kuzumbanesa ehuguvaro ngwendi moomu tupu sinzi sovantu vana kuzumbanesa ehuguvaro moyiruwo eyi yoyidigu, kupi no gwana evatero? Sinzi sovantu kutanta asi kuvhura va kohonone po maudigu, nye magano gawo kupukisa ntani kulirwanesa. Yipo nye, ayo ya wapa kupapara evatero kogu ga tu pa evhuliko lyokukara nehuguvaro. Bibeli kutanta asi ‘age kapi ga kara ure nose natuvenye’ ntani ana hara kutuvatera.—Yirugana 17:27; 1 Peturusa 5:7.

Eyi ali tanta ehuguvaro

Efatururo lyoBibeli kuhamena ehuguvaro lya lisiga neli va kara nalyo vandokotora novadivi unsitwe ntani valirongi vamwe. Nkango va ruganesa moBibeli ezi va toroka moRugereka nomoRuhebeli asi “ehuguvaro” kutanta asi kundindira nononkondo yininke yoyiwa yokomeho. Ehuguvaro kwa kara pavali. Amo kwa hamena mo kukara neharo lyoyininke yoyiwa ntani nokonda zeyi wa yi pulira asi yininke oyo ngayi sika mo. Ehuguvaro eli va tumbura moBibeli kapisi epuliro tupu, nye pwa kara maumbangi ntani mauzera.

Kombinga zeyi, ehuguguvaro kuna lifana tupu nepuro, eli lya kara nomaumbangi nye kapisi yininke yomawoko-woko tupu. (Vahebeli 11:1) Simpe Bibeli za likida omu epuro nehuguvaro ya lisiga.—1 Vakolinte 13:13.

Mokuyifanekesa: Nsene o pura kaume koge a ku ruganene yuma yongandi, ove kuvhura o kare nehuguvaro asi na ku vatera. Ehuguvaro lyoge kapisi lyomawoko-woko morwa wa yi pura asi age kaume koge, wa mu diva, ntani wa mu mona omu a likida nkenda nougavi. Epuro nehuguvaro lyoge ya likwatakana, nampili ngomu ya lisiga. Ngapi no vhura kukara nehuguvaro lyangoso mwaKarunga?

Konda zehuguvaro

Karunga yige ntundiliro zehuguvaro lyosili. Mosiruwo sanare, Jehova ngava mu tumbura asi ehuguvaro ndi “endindiro lyaIsraeli.” (Jeremiya 14:8) Nkenye ehuguvaro lyosili eli va kere nalyo vantu vendi ngali tundu kwendi; eyi yiyo ga karerere ehuguvaro lyawo. Ehuguvaro lyangoso kapi lya kere tupu lyomawoko-woko. Karunga kwa va pere konda zononkondo zeyi va karerere nehuguvaro. Monomvhura nadinye edi ga ruganenene kumwe nawo, age ga yi likidire momatumbwidiro aga ga tulisire po ntani naga ga sikisire mo. Mupitisili gwawo Josuwa kwa tanterere Vaisraeli asi: “Nkenye ogu ana diva . . . asi, HOMPA Karunga gwendi ana mu pe yininke nayinye yoyiwa, eyi ga mu tumbwidira. Matumbwidiro nagenye gana siki mo; nalimwe si lya hupa ko.”—Josuwa 23:14.

Nonkango edi va uyungire nomvhura mayovi ga ka pita, simpe kuna kurugana naina. MoBibeli kwa zura mo matumbwidiro gaKarunga ntani nomu ga sikilira mo. Matumbwidiro gendi kuvhura kugahuguvara, morwa gamwe kwa ga tjenge monkedi ezi za likidire ngwendi ga sika mo nare.

Eyi yiyo ava tumbwire Bibeli asi buke zehuguvaro. Ngomu no lironga omu Karunga a ruganene kumwe novantu, ehuguvaro lyoge mwendi ngali nkondopara. Mupositoli Paurusa kwa tjenge asi: “Nkenye eyi va tjangera moMatjangwa, kwa yi tjangera asi yi tu ronge. Kwa yi tjange asi tu kare nehuguvaro eli ali tundu medidimiko nehengagwido.”—Varoma 15:4.

Ehuguvaro musinke ga tu pa Karunga?

Siruwo musinke atu lizuvhu asi twa hepa unene ehuguvaro? Nani kapisi paapa atu fisa? Pasihonena, wovanzi apa a va fisa muntu ogu va hara kumoneka ngwendi vana zumbanesa ehuguvaro. Nye yisinke ayi guvisa muntu unene da hana asi nomfa? Ado kutukundama natuvenye. Nampili tu paruke siruwo sosire simpe kapi ngatu vhura kuhenduka nomfa. Eyi yiyo Bibeli azi tumbwire nomfa asi “nkore zokuhulilira.”—1 Vakolinte 15:26.

Ngapi natu vhura kukara nehuguvaro nampili tuna fisa? Velise zomoBibeli ezi azi tumbura nomfa asi nkore zokuhulilira, za uyunga hena asi nkore ozo ngava ka zi “zonagura” po. Jehova Karunga nonkondo unene kupitakana nomfa. Age hena ga yi likida moyihorokwa yoyinzi. Monkedi musinke? Pokupindura koufe ava va fa. Bibeli kutumbura yihorokwa ntane yokulisiga-siga apa Karunga ga ruganesere nonkondo dendi mokupindura vantu ava va fire.

Mosihorokwa simwe, Jehova kwa pere Munwendi Jesus nonkondo, a vhumbure kaume kendi Rasarusa koufe, ogu ga kere montoko mazuva gane. Jesus kwa yi rugene eyi moyitarameho yovantu kapisi mokahore-hore.—Johanesa 11:38-48, 53; 12:9, 10.

Kuvhura o lipure asi: ‘Morwasinke va pindwilire vantu koufe? Nani kapi va kurupire ntani konyima ta va ya fu hena ndi?’ Yimo. Yipo nye, yihorokwa yangoso yevhumbuko ngwendi seesi, kutuvatera tu kare neharo lyokuhara kukamona vekoro lyetu ava va fa kuna kuparuka hena. Ntani twa kara nokonda zeyi natu yi pulira asi ngava ka va pindura koufe. Monkango zimwe, twa kara nehuguvaro lyosili.

Jesus kwa tente asi: “Nyame evhumbuko nomwenyo.” (Johanesa 11:25) Jehova nga ka pa Jesus nonkondo a ka vhumbure vafe navenye. Jesus kwa tente asi: “Siruwo ngasi wiza, apa ngava zuvha ezwi [lyaKristusa] navenye ava va kara monontoko, makura tava pwaga mo.” (Johanesa 5:28, 29) Yosili, navenye ava va kara monontoko va kara nehuguvaro lyokukavavhumbura va ka paruke moparadisa apa pevhu.

Muporofete Jesaya kwa singonona evhumbuko asi: “Wombunga zetu ava va fa ngava kara hena nomwenyo! Marutu gawo ngaga tengwira hena mwenyo. Navenye ava vana rara monontoko dawo, ngava pinduka tava dimbi dehafo. Moomu ali wapeke evembero lyeme uzuni, naHOMPA nage yimo nga mwenyopeka ava va fa nare.”—Jesaya 26:19.

Ayo kuhengagwida sili. Vafe kuna kara mepopero ngwendi moomu mukeke a kara mepopero mezimo lyozina. Yosili, ava vana kara monontoko kuna kara momagano gaKarunga Munankondo nadinye. (Rusaka 20:37, 38) Ntaantani ngava ka va pindure koufe ngava ka kare mouzuni woruhafo nokukavatambura ngwendi moomu epata ali tambura mukeke! Yipo nye, pwa kara ehuguvaro nampili tu fe.

Omu nali kukundama ehuguvaro

Paurusa kuturonga yoyinzi kuhamena mulyo gwehuguvaro. Age kwa tumbura ehuguvaro ngoruha romulyo royirwiso yopampepo, eli lya fanekesa ekoli. (1 Vatesaronika 5:8) Yisinke ga tembe? Mosiruwo sanare, mukwayita nga dwara ekoli lyosivera moyita, eli ngava rugana nosipapa. Ekoli mulyo, morwa yikutji nayinye eyi ngava tambesere komutwe ngayi tanduka. Sitwa? Ngamoomu ekoli ali popere mutwe, ehuguvaro nalyo kupopera nondunge ndi magazaro. Nsene o kara nehuguvaro lyokupama kuliza nositambo saKarunga, ove ngo kara nombili zopamagazaro nampili o ligwanekere nomaudigu. Natuvenye twa hepa ekoli lyangoso.

Paurusa kwa ruganesere hena sifanekeso sapeke sehuguvaro esi sa likwatakana nompango zaKarunga. Age kwa tjenge asi: “Ehuguvaro lyetu ngwendi sisikameso sowato womwenyo, sa hana malilimbo sa kora.” (Vahebeli 6:19) Paurusa ogu ga parukire mateko goyikepa, ga divire nawa mulyo gosisikameso. Apa ngava ligwanekere nekundungu, vanasikepa ngava gurumwisa sisikameso sosikepa. Ano nsene sisikameso vana si tu mefuta ntani sina koro, ngayi vatere sikepa si tunde mo mekundungu nokukasika konontere sa hana kulimbwanda momamanya si tekauke.

Mokulifana, nsene matumbwidiro gaKarunga kuna kara ehuguvaro ‘lya hana malilimbo lya kora,’ ehuguvaro lyangoso kuvhura kutuvatera momazuva aga goudigu. Jehova kwa tumbwidira asi siruwo ntaantani si sike mo apa vantu ngava dira kukara nomaudigu aga ayi retesa po yita noukorokotji noruguwo ndi nomfa. (Tara kakende pepenuno 10.) Kukwaterera kehuguvaro lyangoso kuvhura kutuvatera moyimpagwa, nokutupa ekorangedo eli twa hepa yipo tu paruke kuliza nonompango daKarunga ntani kapi ngatu kwama nkareso zondona ezi zina lihanene naina mouzuni ou.

Ehuguvaro eli a gava Jehova nove wa hamena mo. Age ana hara o hafere eparu moomu ga yi harera. Age kwa hara asi “vantu navenye va paruke.” Monkedi musinke? Pomuhowo, nkenye gumwe a ka “sike kediwo lyousili.” (1 Timoteusa 2:4) Vatjangi wosifo esi kuna kukukorangeda o gwane ediwo lyousili lyomoNonkango daKarunga eli ali twara komwenyo. Ehuguvaro eli ana hara kukupa Karunga lya pitakana nkenye ehuguvaro no vhura kugwana mouzuni ou.

Nehuguvaro lyangoso, wa ha lizuvha asi kwato evatero, morwa Karunga kuvhura a ku pe nonkondo edi wa hepa o sikise mo nkenye sitambo ono kara naso esi sa liza nompango zendi. (2 Vakolinte 4:7; Vafilipi 4:13) Nani olyo kapisi yilyo ehuguvaro ono hepa ndi? Yosili, nsene ono hepa ehuguvaro ndi kuna kulipapara, twikira ngorooro. Ehuguvaro lyoge ntaantani li sike mo. Kuvhura o li gwane!

[tasi twikire]

Nokonda deyi no karera nehuguvaro

Magano gomoMatjangwa aga kuvhura ga ku vatere o pameke ehuguvaro lyoge:

▪ Karunga kwa tumbwidira meho zongwa.

Nonkango dendi kutanta asi evhu ngali kara paradisa omu ngamu tunga vantu woruhafo ava ngava kara mouumwe.​—Mapisarome 37:11, 29; Jesaya 25:8; Ehororo 21:​3, 4.

▪ Karunga kapi a tanta yipempa.

Age kwa nyenga yipempa nayinye. Jehova kwa pongoka ndi kwa kuhuka, yipo nye age nokuvhura si kukumbagera.​—Yisewe 6:​16-​19; Jesaya 6:​2, 3; Titusa 1:2; Vahebeli 6:​18.

▪ Karunga ga kara nononkondo dononene.

Jehova yige gelike munankondo nadinye. Kwato yokuvhura kumukondera mokusikisa mo matumbwidiro gendi.​—Exodus 15:11; Jesaya 40:25, 26.

▪ Karunga ana hara o paruke narunye.

​—Johanesa 3:​16; 1 Timoteusa 2:​3, 4.

▪ Karunga ga tu huguvara.

Age kapi a demenene komapuko ndi komaupirankondo getu, nye koyikara et yoyiwa nekelituromo lyetu. (Mapisarome 103:12-​14; 130:3; Vahebeli 6:​10) Age ga kara nehuguvaro asi ngatu rugana youhunga ntani ngatu mu hafesa.​—Yisewe 27:11.

▪ Karunga ga tumbwidira mokukuvatera o sikise mo yitambo yokuliza nompango zendi.

Vakareli vendi kapi ava lizuvhu asi kwava sigilira. Karunga kugava mpepo zendi zokupongoka, nonkondo dononene po mokutuvatera.​—Vafilipi 4:​13.

▪ Nsene o huguvara Karunga kapi nga ku fisa nomuga.

Nsene o huguvara Karunga nomutjima goge nagunye, age kapi nga ku fisa nomuga.​—Mapisarome 25:3.

[Efano]

Ngamoomu ekoli ali popere mutwe, ehuguvaro nalyo kupopera nondunge ndi magazaro

[Efano]

Ngwendi sisikameso kukara nehuguvaro lyokupama kuvhura kupopera

[Edina lyomufaneki]

Courtesy René Seindal/Su concessione del Museo Archeologico Regionale A. Salinas di Palermo