Kuvhura o funde po magazaro gomadona

NGAPI o tara yininke yoyidona eyi ya ku horokera? Sinzi sovalirongi kwa pura asi elimbururo kepuro olyo kulikida nsene asi wa kara nomutaro gomuwa ndi gomudona. Natuvenye kuligwanekera nomaudigu gokulisiga-siga meparu, nye vamwe vetu kuligwanekera nomaudigu gomanzi kupitakana vakwawo. Morwasinke vamwe ava twikilire kukara nomutaro gomuwa ndi nononkondo konyima zokuligwanekera nomaudigu gomanene, ano vamwe kuhara kuhageka nampili kuna ligwanekera nomaudigu gomanunu?

Pasihonena, tu tante asi ove kuna kupapara yirugana. To zi kepuragero nye kapi vana kutambura. Ngapi omu no lizuvha kweyi vana dili kukutambura? Ove kuvhura o lizuvhe yoyidona nokulitantera nyamoge asi: ‘Kwato ogu nga hara kukuta nge. Kapi ngani gwana yirugana.’ Ove kuvhura o pulisire ukaro ndi sihorokwa esi si zonagure mutaro goge keparu, pokugazara asi: ‘Ame siporoporo tupu, kwato eyi ngani tompora meparu ndi?’ Muntu ogu ga kara nomagazaro gangoso ga kara nomutaro gomudona keparu.

Omu no funda po magazaro gomadona

Ngapi omu no ga funda po? Nkedi zokuhova, lironga kudimburura asi wa kara nomagazaro gomadona. Zauvali, nyokera magazaro gangoso. Gazadara ko komaukaro aga nampo ga ku ninkisa va dire kukutambura. Pasihonena, nye yosili kapi va kutambura morwa kwato ogu ana hara kukukuta ndi? Ndi nampo muhona kuna kupapara muntu ogu ana kara noyihepwa eyi vana kupapara mosirugana oso ndi?

Nsene o demenena komausili, ove no dimburura asi kuna kuyigazarera tupu, nye yininke kapisi yimo yina kara. Nsene kapi vana kutambura ngoso kulikida sili asi ove kwato mulyo ndi? Ndi kuvhura o gazadare ko maruha gamwe geparu lyoge omu ya kutompoka, pasihonena, yitumbukira yoge yopampepo, malikwatakano goge novanekoro ndi vakaume? Lironga kunyokera po magazaro gomadona ngonkedi ezi no vhura kulihengagwida nyamoge ndi o lipe usima. Muntu kapi to vhuru kuyidiva nsene asi ngo gwana yirugana ndi pira. Yinzi wa hepa kurugana mokunyokera po magazaro gomadona.

Kara nomagazaro gomawa pokulitulira po yitambo

Monomvhura dantani, vakonakoni kwa ya faturura eyi ali tanta nawa-nawa ehuguvaro. Awo kwa tanta asi ehuguvaro kwa hamena mo kuyipura asi ngo vhura kusikisa mo yitambo yoge. Sirongwa sokukwama ko nasi ka likida asi ehuguvaro kapi tupu ali tanta asi kusikisa mo yitambo nye yinzi ya hamena mo. Kudemena kehuguvaro kuvhura kutuvatera tu kare nomagazaro gomawa ntani tu sikise mo yitambo yetu.

Mokukara nehuguvaro asi kuvhura tu sikise mo yitambo yetu yokomeho, twa hepa kulitulira po yitambo ntani tu yi sikise mo. Nsene kuna kulizuvha asi kapi wa kara nomutaro gwangoso, wa hepa kugazudurura ko koyitambo eyi wa litulira po. Sokuhova, wa kara noyitambo ndi? Ayo ureru kutwikira neparu twa hana kugazadara ko kweyi sili tuna hara meparu ntani yomulyo po kwetu. Kuhamena kuhorowora yomulyo po, Bibeli za gava nare mpango ezi pokutanta asi: “Mu wape kuhorowora yoyiwa po” ndi yomulyo po.​—Vafilipi 1:10.

Nsene tu horowora yomulyo po ndi yoyiwa po, ayo ureru tu sikise mo yitambo yetu, ngwendi yopampepo, yemepata ntani meparu lyetu. Kapisi tu litulire po yitambo yoyinzi posikando, nye twa hepa kulitulira po simwe posikando esi tuna diva asi kuvhura tu si sikise mo. Nsene asi sitambo esi tuna litulire po udigu kusisikisa mo, ayo kuvhura yi tu dompese. Ayo ya wapa kuhangura yitambo yosiruwo sosire momaruhagona.

Nsene wa kara neharo lyokurugana sininke ngasi ku tompoka. Nonkango edi usili. Nsene tuna mana kulitulira yitambo, twa hepa kukara neharo ntani nononkondo dokuyisikisa mo. Ose kuvhura tu nkondopeke eharo lyetu lyokuhara kuyisikisa mo, pokugazadara ko komulyo goyitambo yetu ntani noyitundwamo. Yimo, yilimbikiso yipo ngayi kara nye ya ha tu dompesa, twa hepa kuyifunda po.

Nampili ngoso, twa hepa kugazadara ko omu natu vhura kusikisa mo yitambo yetu. Mutjangi C.R. Snyder, ogu ga rugana epaparo lyenene kuhamena mulyo gehuguvaro kwa tanta asi muntu ga hepa kugazadara ko omu na sikisa mo sitambo sendi. Yipo nye, nsene asi sitambo simwe kapi sina kutompoka, tatu rundurukire kosikwawo sauvali ndi sautatu.

Snyder nage kwa tanta asi muntu ga hepa kulironga kutjindja-tjindja yitambo. Nsene kapi tuna kusikisa mo sitambo setu, kapisi tu lipe usima morwa tayi tu dompesa. Ano nsene tu pinganesera po sitambo sapeke, ngayi tu pa ehuguvaro.

Bibeli za kara noyihonena yoyiwa moyuma eyi. Hompa Ndafita kwa here kudikira ntembeli Karunga gwendi, Jehova. Nye Karunga kwa tanterere Ndafita asi kapisi nyove ngo dikira nge ntembeli nye munoge Saromo. Mevango lyokudompa ndi a sininike asi yige ngazi dika, Ndafita kwa rundwilire yitambo yendi. Age ga ruganesere nonkondo dendi mokuwapaika yiruganeso noyimaliwa eyi ga hepere munendi yipo a dikise ko ntembeli.​—1 Vahompa 8:17-19; 1 Histoli 29:3-7.

Nampili yi tu tompoke kupameka ehuguvaro lyetu, pokunyokera po kukara nomagazaro gomadona ndi nomutaro gomudona ntani nokukara nomagazaro gomawa ndi nomutaro gomuwa, ose simpe poyiruwo noyiruwo kuvhura ehuguvaro lyetu li sesupe. Monkedi musinke? Madompeso gamwe aga atu ligwanekere nago mouzuni ou, kutundilira koyininke eyi natu dira kuvhura kukandana po. Apa atu gazadara ko komaudigu aga aga kundama vantu ngwendi ruhepo, yita, uhahungami ntani mauvera nonomfa, ngapi omu muntu na kara simpe nehuguvaro ndi nomutaro gomuwa?

[Efano]

Nsene kapi vana kutambura koyirugana eyi ko here, ove ngoso no tanta asi kapi ngo gwana yirugana meparu lyoge ndi?

[Efano]

Hompa Ndafita kwa kere nomutaro gomuwa koyitambo yendi