Tu tantera ko kuhamena unona woge.

Ame kwa hampurukira nge moItalia momvhura 1943. Ame kwa kere novakuru vange wovagara vavali ano gomukadi gumwe, ano vamumbya vange wovakadona vavali, gomumati gumwe. Ose kwa kulira momukunda omu otate va kere munandimba ntani muhongi goyipirangi. Vakondi vetu kwa tu rerere tu kare Vakatolika wovawa.

Morwasinke wa harerere kukara muruti?

Apa na kere mumatigona, ame kwa here kupurakena kovaruti mongereka. Ame kwa here kupurakena komazwi gawo, ntani monkedi omu ngava udisa. Eyi yiyo na harerere kukara muruti. Apa na kere nonomvhura 13, onane kwa twere nge kombongi ezi ngazi deura vamati ava va hara kulirongera uruti.

Medeuro lyoge mwa hamenene elirongo lyoBibeli ndi?

Kapisi nawa-nawa. Apa na kere nonomvhura 15, gumwe govarongi wetu kwa pere nge buke zoMavangeli, ezi za zogera yihorokwa yeparu lyaJesus nosirugana sendi sokuzuvhisa, makura ngani zi resa yikando yoyinzi. Apa na kere nonomvhura 18, yipo na zire koRoma konounivesiti edi da kere mepangero lyaMupapa ni ka lironge kuhamena omu ava rugana mamisa gongereka zaKatolika. Ame kwa ka lirongere Ruratina, Rugereka, Ehistoli ntani nayimwe hena ngoso. Nampili ngomu ngatu tumbura novelise domoBibeli nokuzuvha mareso gomoBibeli momaudiso gomoSondaha, kapi ngatu lirongo nawa-nawa Bibeli.

Asi wa ya kere mukuronasure, ngoso nove ngo rongo ndi?

Sirugana sange kwa kere sokugendesa sure. Nye pamwe ngani rongo marongo goNgereka.

Morwasinke wa tamekere kukara nomasinganyeko kuhamena ngereka?

Yininke yitatu ngayi rorora nge. Ngereka ngazi lihameke moupolitika. Ngereka ngazi tarerere nonkareso donondona dovapitisili novahamenimo vazo. Ntani marongo gamwe goVakatolika kapi ga wepe. Pasihonena, ngapi omu Karunga geharo na hepeka vantu narunye nanarunye konyima zonomfa? Ntani Karunga sili ga hara tu ruguruke makanderero gosiranda yikando yoyinzi ndi? *

Yisinke wa rugene?

Ame kwa likwamberere mekanderero ni gwane evyukiso. Ntani kwa rende Bibeli zoVakatolika Jerusalem Bible, ezi va pwagesere meraka roRuitalia, nokutameka kuziresa. Makura, Sondaha zimwe kongurangura apa na tulikire mundwaro gwange konyima zEmisa, vagara vavali tava wiza konzugo ozo na kere. Awo kwa lidivisire vene asi Nombangi daJehova. Ose kwa zogerere kupitakana vili zimwe ngoso kuhamena Bibeli ntani neyi za uyunga ko kuhamena omu natu dimburura ukareli wousili.

Yisinke ya ku tetwire kuhamena vagenda owo?

Epuliro lyawo kwa tetwire nge ntani monkedi omu va likidire nge matjangwa moBibeli zoVakatolika. Ano konyima, Mbangi zedina Mario, tazi tameke kuyadingura nge. Edidimiko noulimburukwi wendi kwa tetukisire nge. Nkenye Mapeu ngurangura povili 9 nga wiza konzugo oku na kere, yi kare asi kuna kuroka ndi upyu.

Yisinke va gazarere varuti vamwe apa ngava ku dingura Nombangi?

Ngani va zigida va lipakerere nose melirongo lyetu, nye kwato ogu ga litulire mo. Nye ame ngani yi hafere. Ngani lirongo yininke yoyiwa, ngwendi eyi Karunga ga pulisira udona noruhepo, yininke eyi ngani lipura nomvhura dononzi.

Vapitisili weni kapi ngava hetekere ko kukuhagekesa kulironga ndi?

Mo-1975, ame ngani dingura Roma yikando yoyinzi mokufaturura mutaro gwange. Awo ngava hetekere ko kutjindja magazaro gange nye kapi ngava ruganesa Bibeli. Ano momazuva 9 Murongagona 1976, yipo na tjangerere koRoma mokufaturura asi kapi nina hara kukara hena Mukatolika. Konyima zomazuva gavali, tani tundu po posure nokuronda ehina lyorutenda ni ze kepongo lyoNombangi daJehova sikando sange sokuhova, apa na ka sikire tani ka gwana asi nosigongi vana kara. Awo kwa lisigire unene noku na tundire! Nkenye gumwe kwa kere noBibeli nokukwama ngomu vauyungi va geve yirongwa yokulisiga-siga.

Yisinke va gazarere vekoro lyoge apa va yi zuvhire?

Sinzi sawo kwa rwanesere nge. Nampili ngoso, na ya divire asi mumbyange gumwe gomugara kuna kulironga noNombangi momukunda gwaLombardy, ogu gwa karerere korwaMuzogo gwaItalia. Yipo na zire kwendi, oko Nombangi kwa ka vaterere nge ni gwane yirugana nevango lyokutunga. Kouhura womvhura zoozo, yipo na gwene ekuho, tani kara Mbangi zaJehova.

Ngoso kulivera o livere ndi?

Hawe! Ame ngesi, kulizuvha asi na kara pepi naKarunga, morwa eyi na diva kumuhamena kwa tunda moBibeli kapisi komagano govantu ndi gongereka. Ntani kuvhura ni ronge wopeke usili noupampi.