SIHOROKWA va tumbura mwaGenesis 22:6 kwa likida asi apa Abirahamu ga zire morugendo rorure a ka zambe ‘ta damuna yitare yonzambo zeswakerero a yi twike munwendi Isaka. Age mwene ta simbi ko mundiro nombere, makura tava zi navenye kumwe.’

MoBibeli kapi va tumbura mo nkedi ezi ngava ruganesa mokuhwameka mundiro mosiruwo sanare. Kuliza nosihorokwa oso mulirongi gumwe kwa uyunga asi “kapi ya kere ureru kusimba mundiro sinano sosire” ngwendi esi va zire oAbirahamu naIsaka. Yipo nye asi eyi va tamba metjangwa kuna kara nampo sininke simwe esi nga va ruganesa nare mokuhwameka mundiro.

Nye valirongi vamwe kwa tanta asi kapi ya kere ureru mokuhwameka mundiro mosiruwo sanare. Vantu ngava hundire makara gomundiro kovamusinda vawo yipo va ka hwameke mundiro. Valirongi wovanzi kwa uyunga asi eyi ga simbire Abirahamu kwa kere kayiga kerova omu mwa kere makara gomundiro. (Jes. 30:14) Pokusimba makara gomundiro monkedi zangoso ya kere ureru mosiruwo sanare kuhwameka mundiro nsene morugendo.