Morwasinke ya karera mulyo kulinunupika?
“Unongo kukara pwava va linunupika.”—YIS. 11:2.
MARUSUMO: 38, 69
1, 2. Morwasinke Sauru ga zumbanesere elikwatakano lyendi naKarunga? (Tara efano.)
APA Sauru ga tamekere kupangera Vaisraeli age kwa kere muntu gokulinunupika ogu va fumadekere vantu. (1 Sam. 9:1, 2, 21; 10:20-24) Nye konyima ga ya linenepekere. Sikando simwe apa Samwere muporofete gwaKarunga ga dilire kusika nosiruwo moGiligali, Sauru ta handuka. Vafilisiti kwa liwapaikilire kuyarwisa Vaisraeli, morwa woma vantu tava tameke kumulihana Sauru. Age nampo ga gazarere asi: ‘Na hepa kurugana ko yuma usimbu.’ Makura Sauru ta zamba nzambo kwaKarunga nye kapi va mu pere nonkondo dokuyirugana. Jehova kapi ya mu hafesere.—1 Sam. 13:5-9.
2 Apa Samwera ga ya sikire moGiligali, kwa vyukisire Sauru. Mevango lyokutambura mapukururo, Sauru tali gusa-gusa mo nokupa usima wopeke. (1 Sam. 13:10-14) Kutunda opo, Sauru yipo ga tamekere kurugana yininke eyi ya mu twaredesere a ka zumbanese uhompa wendi nelikwatakano lyendi naJehova. (1 Sam. 15:22, 23) Nampili ngomu Sauru pomuhowo ga kere muntu gomuwa konyima eparu lyendi lya ya donapere.—1 Sam. 31:1-6.
3. (a) Yisinke ava gazara vantu wovanzi kuhamena kulinunupika? (b) Mapuro musinke natu kakonakona?
3 Mouzuni ou womarumbasano, vantu wovanzi kulizuvha asi kapi tava pulisire nkenye eyi yi va kondere mokugwana eyi vana hara. Pasihonena, mugara gokudivikwa ogu nga dana nomuvi konyima taya kara munapolitika kwa tanta asi: “Elinunupiko kapisi sikara somulyo kwange.” Nye morwasinke ya karera mulyo kulinunupika? Yisinke ya kwatera mo mokulinunupika? Ngapi natu vhura kulinunupika nampili momaukaro goudigu ndi wopeke kuna kutukondjesa? Mosirongwa esi natu ka gwana malimbururo komapuro gavali gokuhova. Ano elimbururo kepuro lyautatu ngatu ka li gwana mosirongwa sokukwama ko.
MORWASINKE YA KARERA MULYO KULINUNUPIKA?
4. Yisinke nonzo dokutulira mowina?
4 Bibeli kwa likida malisigo pokatji kokulinenepeka nokulinunupika. (Resa Yisewe 11:2.) Hompa Ndafita kwa pulire Jehova a mu ‘yoworore kononzo dokutulira mowina.’ (Epis. 19:13) Yisinke ‘nonzo dokutulira mowina’? Ado kuna kara apa muntu a linenepeke nokurugana yininke eyi va dira kumupa nonkondo ndi kumupulisira. Morwa kudira kusikilira mo, natuvenye pamwe kurugana yininke mowina. Ngwendi sihonena sahompa Sauru, nsene tu kara nonkareso zokulinenepeka, Karunga kapi ngatu hafera. Episarome 119:21 kwa uyunga asi: “Ove kunyokera valinenepeki.” Morwasinke?
5. Morwasinke ya karera epuko lyenene kurugana yininke mowina?
5 Kurugana yininke mowina epuko lyenene kupitakana mapuko aga atu tura twa hana kuyidivira. Konda zokuhova eyi ya karera epuko lyenene kuna kara asi ayo kapi ayi likida efumadeko kwaJehova ngoMupangeli gwetu. Konda zauvali, ayo kuvhura kutuninkisa tu dire kulizuvha novakwetu morwa tuna rugana yininke va dira kutupa unankondo. (Yis. 13:10) Konda zautatu, kuvhura tu life nomuga apa wopeke nava dimburura asi ose tuna linenepeke. (Ruk. 14:8, 9) Kulinenepeka ndi kuruganena yininke mowina kapi ayi reta uwa. Ngomu ga yi likida Matjangwa ya wapa kulinunupika.
YISINKE YA KWATERA MO MOKULINUNUPIKA?
6, 7. Yisinke ya kwatera mo mokulinunupika?
6 Bibeli kwa likida asi muntu gokulinunupika kutara vakwawo asi va mu pita mekuto. (Fil. 2:3) Muntu gokulinunupika age ga diva apa wa hagera unankondo wendi, age kutambura mapuko gendi ntani kutambura hena mapukururo nomagano govakwawo. Jehova kwa hara vantu wokulinunupika.
7 Bibeli kwa likida hena asi muntu gokulinunupika ga diva asi koyili yimwe na dira kuvhura kusikisa mo kuliza nononkondo dendi. Meraka lyokuhova omu va tjenge Bibeli nkango kulinunupika kwa demenena kufumadeka wopeke nokuvatekura monaruwa.
8. Yisinke nayi likida asi tuna kara nonkareso ndi nomagazaro gokulinenepeka?
8 Yisinke nayi likida asi tuna kara nonkareso ndi nomagazaro gokulinenepeka? Tu tareni yidiviso yimwe. Kuvhura tu tare yitumbukira yetu asi mulyo unene kupitakana yapeke. (Rom. 12:16) Ndi kuvhura tu liharere mfumwa zokudira kuwapera monkedi omu atu dwara. (1 Tim. 2:9, 10) Ndi kuvhura tu sininike vakwetu magano getu morwa yitumbukira eyi twa kara nayo mombungakriste ndi eyi va kara nayo ava twa diva. (1 Kol. 4:6) Apa atu rugana yininke yangoso pamwe kapi tatu yi dimburura asi ose kuna kulinenepeka.
9. Yisinke ya twaredesa vamwe va rugane yininke mowina? Gava sihonena somoBibeli.
9 Nkenye muntu kuvhura a linenepeke nsene a dira kupangera madowo gendi. Kuliharera mfumwa ndi kunyenena yuma ndi kuhanduka unene kwa twaredesa wovanzi va rugane yininke mowina. Abisaromo naUsiya naNebukadenesara ava va tumbura moBibeli kwa gwililire mosiraha sokurugana yirugana yorutu ano Jehova ga va tengekere morwa kulinenepeka.—2 Sam. 15:1-6; 18:9-17; 2 Hist. 26:16-21; Ndan. 5:18-21.
10. Morwasinke natu dilira kupangura vakwetu? Gava sihonena somoBibeli.
10 Pwa kara hena nokonda dimwe edi adi twaredesa muntu a linenepeke. Tarurureni yihorokwa eyi yomoBibeli: Genesis 20:2-7 ntani Mateusa 26:31-35. Abimereki naPeturusa kwa kere nonkareso zokulinenepeka ndi? Ndi awo kwa yi ruganene morwa kapi va divire mauzera nagenye aga ga hamenene mo ndi yininke kwa va gwene hararasi? Mokumona asi ose kapi atu mono eyi ya kara komutjima gomuntu, kapi tatu vhuru kupangura vakwetu pokuvagazarera konda zeyi vana ruganene yininke.—Resa Jakopo 4:12.
KUTAMBURA SITUMBUKIRA SETU
11. Yisinke ga hepa kutambura muntu gokulinunupika?
11 Muntu gokulinunupika kutambura simbukira esi ga mu pa Karunga. Jehova kapisi Karunga ga hara epiyagano, yiyo ga pa nkenye gumwe situmbukira mombunga zendi. Nkenye ogu ga kara nositumbukira sendi, nye natuvenye mulyo kwendi. Morwa nkenda zendi, Jehova kwa pa nkenye gumwe mauhwi gokulisiga-siga. Nsene twa linunupika, ose ngatu ruganesa mauhwi ogo mokufumadekesa ko Jehova nokuvatera wopeke. (Rom. 12:4-8) Jehova kwa tu pa mfumwa pokutupa mauhwi aga twa hepa kuruganesa nawa.—Resa 1 Peturusa 4:10.
12, 13. Morwasinke nga tu dilira kutetuka nsene situmbukira setu mombunga zaKarunga nga si runduruka?
12 Nye situmbukira esi atu gwana mombunga zaKarunga kurunduruka. Tu tareni sihonena saJesus. Pomuhowo age kwa kere gelike naJehova. (Yis. 8:22) Makura ta ya vatere oGuhwe kusita vaengeli neguru nevhu ntani vantu. (Koros. 1:16) Konyima, Jesus tava ya mu hampurukire pevhu ta ya kuru hena. (Fil. 2:7) Ano konyima zonomfa dendi ta tengura meguru ngomuengeli, ano momvhura 1914 yipo va mu tulire a kare Hompa goUhompa waKarunga. (Heb. 2:9) Nye oso kapisi yiso situmbukira sendi sokuhulilira. Konyima zepangero lyendi lyonomumvho eyovi, Jesus nga ka gava Uhompa kwaJehova yipo ‘Karunga nga kare nye gelike mupangeli goyininke nayinye.’—1 Kol. 15:28.
Yisinke natu lirongera ko kwaJesus nsene tuna gwana situmbukira sapeke? (Tara paragarafu 12-14)
13 Nose twa hepa kuyindindira asi mwaza siruwo situmbukira setu nga si runduruka morwa matokoro aga atu tura po. Pasihonena, nampo wa kere mudike makura to ya kwara. Ano konyima to ya reta vana. Mwaza nomvhura, kuvhura o rerupike eparu lyoge yipo o lihameke mo unene mosirugana sokuzuvhisa sosiruwo nasinye. Matokoro nagenye ogo kureta yitumbukira. Marunduruko meparu, kuvhura ga tu ninkise tu lihameke mo unene mositumbukira esi ga tu pa Heb. 6:10.
Jehova ndi tu dire kulihameka mo unene. Nampili tu kare vadinkantu ndi vakurupe ndi kuvera-vera ndi vakangure, Jehova ga diva omu na ruganesa nkenye gumwe gwetu mosirugana sendi. Age kapi atu pura yoyinzi nye age kutambura eyi atu mu ruganene.—14. Ngapi kulinunupika a kutuvatere tu gwane ruhafo mwankenye situmbukira?
14 Jesus ga haferere yitumbukira eyi ga gwene, nose kuvhura tu gwane ruhafo moyitumbukira yetu. (Yis. 8:30, 31) Muntu gokulinunupika kapi a lizuvhu asi kapi sa mu gwanena po situmbukira esi ga kara naso mombungakriste. Ntani hena kapi a kara nosinka pokumona vakwawo kuna kugwana yitumbukira yapeke. Nye age kudemenene mokuruganesa nonkondo dendi a gwane ruhafo mositumbukira sendi morwa age kusitara asi kwa tunda kwaJehova. Age hena kufumadeka yitumbukira eyi Jehova ga pa wopeke. Ntani ga kara neharo lyokuvakwatesa ko moyitumbukira yawo.—Rom. 12:10.
OMU NO LIKIDA ELINUNUPIKO
15. Yisinke natu lirongera ko kosihonena saNgidiyona?
15 Ngidiyona kwa tulire po sihonena sosiwa sokulinunupika. Apa muengeli gwaJehova ga mu monekerere, Ngidiyona ga tambwire nelinunupiko ukaro wendi. (Vap. 6:15) Apa ga tambwire situmbukira esi ga mu pere Jehova, Ngidiyona kwa divilisire asi ana kwata egano eyi ga hepere kurugana ntani kwa hundilire mavyukiso kwaJehova. (Vap. ) Ngidiyona kwa kere mugara gononkondo nouradi. Nye ga ruganesere nondunge dendi mokusikisa mo situmbukira sendi. ( 6:36-40Vap. 6:11, 27) Kapi ga ruganesere situmbukira sendi a gwanene mo mfumwa. Apa ga mene kusikisa mo sirugana sendi, ta tengura kembo lyendi.—Vap. 8:22, 23, 29.
16, 17. Yisinke a divilisa muntu gokulinunupika komeho a tambure situmbukira sapeke?
16 Kulinunupika kapi ayi tanta asi nokuvhura si kukondjera ndi kutambura yitumbukira yapeke. Matjangwa kutukorangeda tu kure ndi tu ture po ezokomeho. (1 Tim. 4:13-15) Eyi kutanta asi nkenye apa twa hepa kugwana yitumbukira yapeke yipo tu ture po ezokomeho ndi? Hawe. Nevatero lyaJehova, ose kuvhura simpe kutura po ezokomeho mositumbukira esi twa kara naso. Kuvhura tu twikire kuruganesa nonkondo nonondunge edi ga tu pa Karunga yipo tu mu karere ntani nokulitura mo unene mokuvatera wopeke.
17 Muntu gokulinunupika komeho a tambure situmbukira sapeke age kudivilisa tanko eyi yina hamene mo. Makura ta konakona nawa ukaro wendi nsene asi kuvhura a yi sikise mo. Pasihonena, ga hepa kulipura asi: Age nga vhura kugwana siruwo mokusikisa mo situmbukira oso ga hana kusigilira yininke yimwe yomulyo ndi? Kuvhura yirugana yendi yimwe eyi ya hamena mositumbukira sendi a yi gave kwavamwe va mu vatere ndi? Nsene kwato siruwo ndi kapi ta vhuru kugava yirugana yendi yimwe, situmbukira oso sosipe va hepa nye kusipa muntu gwapeke. Nsene twa linunupika, ngatu vhura kunyoka kutambura situmbukira sosipe morwa kapi tatu yi sikisa mo kuliza noukaro wetu.
18. (a) Nsene asi twa linunupika, yisinke ngatu rugana nsene tuna tambura situmbukira sapeke? (b) Ngapi etjangwa lyoVaroma 12:3 lya tamba komuntu gokulinunupika?
18 Sihonena saNgidiyona sina tu rongo asi nsene tuna tambura situmbukira sapeke mokututompoka tuna hepa evatero nomavyukiso gaJehova. Ose kwa tu zigida tu “kare nelinunupiko melikwatakano naKarunga gwetu.” (Mika 6:8) Yipo nye, nsene tatu tambura situmbikira sapeke, twa hepa kugazadara ko unene komavyukiso gaJehova aga atu gwana moNonkango dendi nombunga zendi. Twa hepa kulironga kurugana yininke kuliza nongendeseso zaJehova. Tu diworokeni asi nonkondo daJehova yido adi ‘tu paka kouwa’ nye kapisi nonkondo danyamwetu. (Epis. 18:35) Nsene tu kara nelinunupiko melikwatakano naKarunga nga yi tu vatera tu dire kulinenepeka ndi tu lisense nyamwetu.—Resa Varoma 12:3.
19. Morwasinke natu linunupikira?
19 Nsene tu linunupika ngatu gava efumano kwaJehova, morwa Jehova yige Musiti gwetu ntani goyininke nayinye. (Ehor. 4:11) Kulinunupika kutuvatera tu hafere situmbukira esi ga tu pa Karunga ntani nokulitura mo unene. Nsene twa linunupika nga tu nyokere po nkareso zondona ntani ngatu kondjera kureta uumwe mombunga zaJehova. Nsene twa linunupika nga yi tu tumangeda tu tare vakwetu asi va tu pita mekuto ntani ngatu nyokera po kutura mapuko gomanene. Nokonda nadinye odo kulikida asi mulyo unene kovantu vaKarunga va linunupike ntani age kwa hara vantu vangoso. Nye ngapi nsene wopeke kuna kutukondjesa? Mosirongwa sokukwama ko ngatu ka lironga omu natu linunupika mwankenye ukaro.