1, 2. Ngapi vantu wovanzi ava gazara kuhamena yirugana yawo?

VANTU kwa hara kulisingonona vene kuliza noyirugana yawo. Wovanzi kugazara asi mfumwa zomuntu kwa korera koyirugana yendi. Monompo dimwe, epuro lyokuhova na kupura muntu nsene ana hara kukudiva kuna kara asi: “Yirugana musinke o rugana?”

² Bibeli kwa singonona vantu vamwe kuliza neyi ngava rugana. Azo kwa uyunga kuhamena ‘Mateusa mufutisi gomutero’; ‘Simoni musunti goyipapa’; ntani ‘Rukasa ndokotora.’ (Mat. 10:3; Yirug. 10:6; Koros. 4:14) Vakareli vaKarunga nawo kwa va divira koyitumbukira eyi ga va pere ngwendi hompa Ndafita, muporofete Eliya ntani mupositoli Paurusa. Vagara ava kwa kwete mawoko gavali yitumbukira eyi ga va pere Karunga. Nose nsene twa kara noyitumbukira, twa hepa kuyikwata mawoko gavali.

3. Morwasinke vanavazinyetu wovakurupe nava dewira vadinkantugara? (Tara efano.)

³ Sinzi setu kwa hara yitumbukira yetu yomombunga ntani kwa hara kuyirugana dogoro narunye. Nye ehudi, kutundilira momazuva  gaAdamu, morwa ukurupe, vantu kapi ava vhuru kutwikira kurugana yirugana yawo. (Muud. 1:4) Momazuva getu, ukurupe kwa reta udigu koVakriste wousili. Yirugana mombunga zaJehova kuna kuligwederera unene. Ntani mbunga zaJehova kuna kuruganesa yikwakonentu yoyipe. Ano vanavazinyetu wovakurupe kuvadigopera kudiva omu nava ruganesa nongendeseso donompe. (Ruk. 5:39) Kugusa ko oyo, vakurupe kapi ava kara hena nononkondo dokurugana yininke. (Yis. 20:29) Eyi yiyo nye ya wapera asi vanavazinyetu wovakurupe va deure vadinkantugara yipo ngava vhure kutwara komeho sirugana mombunga zaJehova.—Resa Episarome 71:18.

4. Morwasinke vamwe ayi va digopere kugava yitumbukira? (Tara kakende “ Eyi vamwe ava dilire kugava yitumbukira yawo.”)

⁴ Ava va kara noyitumbukira pamwe kuvadigopera kugava yitumbukira yawo kovadinkantugara. Vamwe kutjira kuzumbanesa sirugana esi va hara. Vamwe kukara nosinka asi vadinkantugara kapi tava vhuru kusikisa mo nawa situmbukira oso. Ano vamwe kulizuvha asi kwato siruwo sokudeura wopeke. Nye vadinkantugara nawo va hepa kutakamesa asi kapisi va nyegenye nsene kapi vana kuvapa yitumbukira.

5. Mapuro musinke natu ka konakona?

⁵ Tu zeni tu konakone sitwa esi sokugava yitumbukira momaruha gavali. Ruha rokuhova, ngapi vanavazinyetu wovakurupe nava vhura kudeura vadinkantugara yipo ngava vhure kusikisa mo situmbukira, ntani morwasinke yina karere nomulyo? (2 Tim. 2:2) Ruha rwauvali, morwasinke ya karera nomulyo kovadinkantugara va kare nonkareso zongwa ngomu vana kuruganena kumwe novanavazinyetu ava va kara noudivi ntani va lirongere ko kwawo? Pomuhowo tatu ka tara omu hompa Ndafita ga wapaikilire munwendi a sikise mo sirugana somulyo.

6. Yisinke ga here kurugana hompa Ndafita, ntani ngapi Jehova ga limbwilire?

⁶ Konyima zokukara mutjwayuki nomvhura dongandi, Ndafita ta ya kara hompa nokutunga membo lyewa. Ndafita kapi ya mu hafesere  kweyi Jehova ga dilire kukara ‘nontembeli,’ yipo ga tokwere kumutungira ko zimwe. Makura ta tantere Natana asi: “Ame kuna hingire monzugo ezi va tungisa konosedeli, nye Sikesa sEgwanekero saHOMPA motenta sina kara!” Natana ta mu limburura asi: “Rugana tupu nkenye eyi yina ku kara komutjima, yeeyi Karunga noge ana kara.” Nye Jehova kapisi yimo ga yi harerere ngoso. Ta tantere Natana a ka tantere Ndafita asi: “Ove kapisi nyove ngo tungira nge ntembeli ngani kare mo.” Nampili ngomu Jehova ga tumbwidilire Ndafita asi nga twikira kumutungika, Karunga kwa geve mpangera asi Saromo munwaNdafita yige nga tunga ntembeli. Ngapi ga lizuvhire Ndafita?—1 Hist. 17:1-4, 11, 12; 29:1.

7. Ngapi Ndafita ga lizuvhire kweyi Jehova ga mu tanterere asi kapisi yige nga tunga ntembeli?

⁷ Ndafita kapi ga nyokere kukwatesa ko munwendi nokukara nosinka asi mfumwa zokutunga ntembeli kapisi yige ngava zi pa. Yimo, ntembeli ozo kwa ya divikwire asi zaSaromo kapisi zaNdafita. Nampili ngomu Ndafita nampo ga lizuvhire udona asi kapi ta tungu ntembeli, age ga kwatesere ko nomutjima nagunye sirugana oso. Age kwa wapaikire nombunga dovarugani nokupongaika yivera nongoporo nosisiliveli nongorodo ntani noyitji. Ta korangenda hena Saromo asi: “Ano nye ntaantani, munwange, ngano HOMPA Karunga goge ta kara kumwe nove, age a kare ngorooro metumbwidiro lyendi a ku ragopeke mokumutungira ntembeli.”—1 Hist. 22:11, 14-16.

8. Morwasinke Ndafita nampo ga lizuvhire asi Saromo kapi ta vhura kugendesa sirugana, nye yisinke ga rugene ko?

⁸ Resa 1 Histoli 22:5. Ndafita nampo ga lizuvhire asi Saromo kapi ta vhuru kugendesa sirugana sina somulyo. Ntembeli za hepere ‘kuwapa unene,’ ano siruwo sina Saromo kwa kere ‘mudinkantu ogu ga dilire kudiva yoyinzi.’ Nye Ndafita ga yi divire asi Jehova nga vatera Saromo mokusikisa mo sirugana oso. Yipo nye, Ndafita kwa demenenene kweyi ga vhulire kurugana ko mokupongaika yiruganeso yoyinzi.

9. Ngapi vanavazinyetu wovakurupe va hepa kulizuvha pokugava yitumbukira yawo? Gava sihonena.

⁹ Vanavazinyetugara wovakurupe kapisi va lizuvhe udona nsene pana kara hepero zokugava yitumbukira yawo kovadinkantugara. Nye nsene vadinkantugara va va deura yirugana kuza komeho. Vanavazinyetugara ava va kara noyitumbukira ngano va lizuvhe ruhafo rorunene pokumona vadinkantugara ava va deura vana wapere kusikisa mo yirugana. Tu tante asi, guhya ana hara kuronga munwendi kusinga etuwa. Nye morwa simpe munonagona, age ta tarere tupu oguhwe omu vana kusinga. Apa na kura ko, oguhwe tava mu fatwilire eyi vana kurugana. Ano apa munona nga ya gwana mbapira zokusinga, ta tameke kusinga awo oguhwe kuna kumupa mavyukiso. Poyiruwo yimwe kuvhura va li pe marufo gokusinga, nye mwaza siruwo munona ogo yige nga  ya singa oguhwe nsene vana kurupa. Guhya ogo nga hafa pokumona munwendi omu ana kusinga ga hana kulizuvha asi ngano yige na singa. Mokulifana, vanavazinyetu wovakurupe nawo kulizuvha mfumwa pokumona vadinkantugara ava va deura kuna kusikisa mo yitumbukira yawo.

10. Ngapi Mosesa ga lizuvhire kuhamena unankondo ou ga kere nawo?

¹⁰ Vanavazinyetu wovakurupe, twa hepa kutakamesa asi kapisi tu kare nomfudu. Tareni omu Mosesa ga lizuvhire apa vamwe womokamba zoVaisraeli va tamekere nawo kuporofeta. (Resa Numeri 11:24-29.) Josuwa, mukwafi gwaMosesa kwa here kuvakava. Age kwa gazarere asi awo kuna kugusa mfumwa nounankondo waMosesa. Nye Mosesa ta limburura asi: “Ono hara o liture mweyi yange? Ngano HOMPA ta gava mpepo zendi kombunga zendi nazinye, asi navenye va uyunge ngwendi vaporofete, ngano nawa.” Mosesa ga yi divire asi Jehova yige ga yi gendesere. Ga hana kulinenepeka, Mosesa kwa uyungire asi ngano vakareli navenye vaJehova va va pe ko yitumbukira eyi ga kere nayo. Ngwendi Mosesa, ngano tu hafe nsene wopeke vana gwana yitumbukira eyi nkare tu gwane.

11. Ngapi ga lizuvhire munazinyetugara gumwe kuhamena kugava yitumbukira kwava wopeke?

¹¹ Naina, pana kara yihonena yovanavazinyetugara ava va rugana unene nomvhura dononzi ntani awo kwa deura wopeke va gwane yitumbukira. Pasihonena, munazinyetugara Peter kwa karera Jehova mosirugana sosiruwo nasinye nomvhura dokupitakana 74. Nomvhura 35 kwa di ruganesa mosirugana somoBeteli zimwe zomoEuropa. KoBeteli, age kwa kere mugendesi goDepartemende zoYirugana yokuzuvhisa. Ano Paul, mudinkantugara ogu nga rugana kumwe naPeter yige ngesi ana gusa situmbukira oso. Apa Peter va mu pulire omu ana kulizuvha mokugava situmbukira sendi, age kwa limbwilire asi: “Ame kuhafa pokumona vanavazinyetugara ava va deura kuna kusikisa mo nawa yitumbukira yoyinene.”

12. Yisinke tuna lirongere ko kwaRehobiyamu?

¹² Konyima zonomfa daSaromo, munwendi Rehobiyamu ta mu kwama mouhompa. Apa Rehobiyamu ga hepere mapukururo omu na gendesa sirugana sendi, pomuhowo age kwa pulire masimbi. Nye kapi ga tambwire mapukururo gawo. Age kwa purakenene mapukururo govadinkantugara ava ga kulire nawo ava va kere vagavindunge vendi. Nye ga li gwanekerere noyitundwamo yoyidona. (2 Hist. 10:6-11, 19) Yisinke natu lirongera ko? Ayo ya wapa kupura nokuteda ko komapukururo govakurupe ava va kara noudivi. Vadinkantugara kapisi va lizuvhe ngwendi va rugane yininke moomu ngava yi rugana nare ntani kapisi va genderere kunyoka kutambura mapukururo govakurupe.

13. Ngapi vadinkantugara nava ruganena kumwe novakurupe?

¹³ Vadinkantugara vamwe kuna kugendesa yirugana omu mwa hamena vanavazinyetu wovakurupe. Nampili ngomu vadinkantugara vana kara noyitumbukira oyo, komeho va ture po matokoro, ayo ya wapa va pure ko magano kovanavazinyetu wovakurupe ava va kara noudivi. Paul ogu tuna tumbura ogu ga pinganene po Peter mokugendesa departemende zimwe zomoBeteli kwa tanta asi: “Ame ngani pura Peter magano ntani ngani korangeda vakwetu womodepartemende zetu va rugane yokulifana.”

14. Yisinke natu lirongera ko keruganeno kumwe pokatji kaPaurusa naTimoteusa?

¹⁴ Apa Timoteusa ga kere mudinkantugara  age kwa rugene kumwe naPaurusa nomvhura dononzi. (Resa Vafilipi 2:20-22.) Mupositoli Paurusa kwa tjangerere Vakolinte asi: ‘Kuna kumutumina Timoteusa, munwange mwahompa, ogu na hara na huguvara. Age nga ya mu diworokesa nye yikara yange mwaJesus Kristusa, moomu ani rongo nkenye apa mwankenye mbungakriste.’ (1 Kol. 4:17) Velise ezi kulikida asi kwa kere po eruganeno kumwe pokatji kaPaurusa naTimoteusa. Paurusa kwa litulilire po siruwo mokuronga Timoteusa ‘yikara yendi mwaKristusa.’ Timoteusa ga tambwire erongo olyo ano Paurusa ga mu here. Ntani Paurusa ga kere nehuguvaro asi Timoteusa nga pakera mbili vapuli vakwawo womoKolinte. Aso sihonena sosiwa kovakuronambunga naina ngomu vana kudeura wopeke mokupitisira mombungakriste.

15. Ngapi epukururo lyaPaurusa eli ga tjangerere Vakriste womoRoma nali tu vatera nsene gana tu kundama marunduruko?

¹⁵ Ose kuna kuparuka posiruwo somarunduruko. Ruha rwepevhu rombunga zaJehova kuna kuligwederera unene. Ngomu gana kutukundama marunduruko, ngano tu linunupike nokukwatesa ko sirugana saJehova, kapisi tu kondjere uwa wanyamwetu. Nsene tu yi rugana oyo, tayi retesa po uumwe. Paurusa kwa tjangerere Vakriste womoRoma asi: “Tani mu korangeda one namuvenye asi, walye omu pitakanesa mokuligazara nyamweni. Nye omu heteke kugazara nawa, nkenye ogu paheteko zepuro eli ga mu pa Karunga. Ose kwa kara nomaruha gomanzi morutu rumwe tupu. Ano maruha aga kapi aga rugana sirugana simwe tupu. Nose ngorooro tupu, nampili tu kare tu vanzi, nye rutu rumwe tupu mwaKristusa.”—Rom. 12:3-5.

16. Yisinke nava rugana vakurupe novadinkantu novakadikwara mokuretesa mbili nouumwe mombunga zaJehova?

¹⁶ Yi kare asi ose vadinkantu ndi vakurupe, natuvenye tu ruganeneni kumwe mokutwara komeho sirugana saJehova soUhompa. Vakurupe, deureni vadinkantugara va gwane yitumbukira eyi omu rugana. Vadinkantugara, tambureni yitumbukira nokulinunupika nokulikida efumadeko kovakurupe. Ntani vakadikwara, honeneni Pilisikira mukadaAkura ogu ga kwatesere ko mugara gwendi nomutjima nagunye mwankenye marunduruko.—Yirug. 18:2.

17. Ehuguvaro musinke ga kere nalyo Jesus kovarongwa vendi, ntani kosirugana musinke ga va dewire?

¹⁷ Jesus yige ga tulire po sihonena sosiwa mokudeura wopeke. Age ga divire asi nga tengura meguru ntani wopeke ngava twikira nosirugana sendi. Nampili ngomu varongwa vendi va dilire kusikilira mo, age ga kere nehuguvaro mwawo asi ngava yi sikisa mo ntani ga va tanterere asi awo ngava rugana yoyinene kupitakana eyi ga rugene. (Joh. 14:12) Age kwa va dewire nawa ntani awo kwa twere mbudi zongwa uzuni mudima.—Koros. 1:23.

18. Yisinke tuna kundindira komeho, ntani yisinke natu rugana ngesi?

¹⁸ Konyima zonomfa dendi, Jesus kwa mu vhumbwilire keparu lyemeguru omu ga ka gwene unankondo wounene ou wa pitakana ‘vanamadina navenye ava va tumbuka mouzuni.’ (Efe. 1:17) Nsene tu fa noulimburukwi komeho zoyita yaHarumagedoni, ngava ka tu vhumbura mouzuni woupe omu ngatu ka hafera yirugana yoyinzi. Nye ngesi pana kara sirugana somulyo esi natu lihameka natuvenye, sokuzuvhisa mbudi zongwa nokutura po varongwa. Yipo nye, ngano natuvenye, vadinkantu ndi vakurupe tu “kare nkenye apa nomupampi moyirugana yaHompa.”—1 Kol. 15:58.