1. Nampili ngomu Jehova ga kara Mupangeli goMunene po, morwasinke a zigidire vantu?

JEHOVA yige Mupangeli goMunene po. Age yige ga sita nayinye, ntani ga kara nounongo nononkondo. Konyima zapa ga vaterere Joba a yi kwate egano oyo, Joba kwa tanterere Jehova asi: “Na yi diva HOMPA, asi ove gononkondo nadinye; ove hena kuvhura kurugana nkenye eyi ono hara.” (Joba 42:2) Jehova kuvhura kurugana nkenye eyi ana tokora pwa hana evatero lyagumwe. Nye age kulikida eharo pokuzigida vantu yipo va rugane kumwe nendi pokusikisa mo sitambo sendi.

2. Sirugana musinke somulyo Jehova ga pulisilire Jesus a rugane?

² Jehova Karunga kwa sitire Munwendi, Jesus, komeho a ya site yisitwa nayinye. Makura yipo ga pulisilire Munwendi a  mu vatere mokusita yininke nayinye. (Johanesa 1:1-3, 18) Mupositoli Paurusa kwa tjenge kuhamena Jesus asi: “Mwendi yimo ga sitira Karunga yininke nayinye yemeguru neyi yepevhu, eyi ayi moneka neyi ayi dili kumoneka, yi kare yipundi youhompa ndi vanamadina ndi vapangeli ndi vanankondo. Yininke nayinye kwa yi sitira mwendi, yi kare yendi.” (Vakorosi 1:15-17) Jehova kapi ga pere tupu Munwendi sirugana somulyo, nye ga tanterere ko wopeke kuhamena sirugana oso. Ee, mfumwa musi kouwa!

3. Yisinke Jehova ga pulisilire Adamu a rugane, ntani morwasinke?

³ Jehova kwa zigida hena vantu va rugane kumwe nendi. Pasihonena, age kwa pulisilire Adamu a ruke yikorama. (Genesis 2:19, 20) Gazara ruhafo oru ga lizuvhire Adamu pokurugana sirugana oso! Age kwa hovere tanko kukonakona omu ya fana yikorama, ntani ga yi rukire madina. Jehova yige ga sitire yikorama nayinye, ntani ngano ga vhulire kuyiruka madina. Nampili ngoso, age kwa likidire eharo kwaAdamu pokumupulisira a ruke yikorama madina. Karunga kwa pere hena Adamu situmbukira sokuninka evhu nalinye li kare paradisa. (Genesis 1:27, 28) Nye konyima Adamu ga ya hagekere kurugana kumwe naKarunga, ano ga ya ligwanekerere nomaudigu kumwe noruvharo rwendi.—Genesis 3:17-19, 23.

4. Ngapi omu vamwe va ruganene kumwe naJehova va sikise mo mpango zendi?

⁴ Karunga kwa ya zigidire hena vantu vamwe va rugane kumwe nendi. Nowa kwa tungire emuwato kumwe nepata lyendi eli lya va poperere poRuhanzo. Mosesa kwa mangwilire muhoko goVaisraeli moEgipite. Josuwa kwa pitisilire Vaisraeli va ze moSirongo sEtumbwidiro. Saromo kwa tungire ntembeli moJerusarema. Mariya kwa ya kere ozina vaJesus. Valimburukwi ava ntani navamwe hena kwa ruganene kumwe naJehova va sikise mo mpango zendi.

5. Mosirugana musinke natu lihameka, ntani ya kere hepero kwaJehova mokutuhamesera mo ndi? (Tara efano pepenuno 27.)

⁵ Nose Jehova kuna kutuzigida tu rugane unene yipo tu kwatese ko Uhompa wendi. Pwa kara nonkedi dononzi omu natu karera Karunga. Nampili ngomu ya kara asi kapisi natuvenye kuvhura tu mu karere monkedi zokulifana, nye kuvhura tu zuvhise mbudi zongwa zoUhompa. Jehova ngano ga vhulire kuyirugana oyo pwamwene. Age ngano ga vhulire kuuyunga novantu apa pevhu kutundilira meguru. Jesus kwa tente asi Jehova kuvhura kuruganesa mamanya ga tantere vantu kuhamena Hompa goUhompa wendi. (Rukasa 19:37-40) Nye Jehova kutupulisira tu kare “varugani kumwe” nendi. (1 Vakolinte 3:9) Mupositoli Paurusa kwa tjenge asi: “Ose varugani kumwe naKarunga, tatu mu korangeda asi, nkenda zaKarunga ezi mwa tambura, mwa ha zi hepeka mawoko-woko.” (2 Vakolinte 6:1) Azo mfumwa zonene pokukara varugani kumwe naKarunga! Ngesi tatu ka zogera nokonda dimwe deyi sirugana esi nasi tu reterera ruhafo.

6. Ngapi Jesus ga singwenene malizuvho gendi kuhamena kurugana kumwe noGuhwe?

⁶ Kurugana kumwe naJehova Karunga, kureta ruhafo kovakareli vendi. Komeho zokuwiza Jesus pevhu, age kwa tente asi:  “HOMPA nyame ga hoverera kusita kwanayinye. . . . Ame ponyonga na kere ngonkurungu, ame kwa kere ntundiliro zankenye ezuva, zoruhafo rwendi, tani pembura nkenye apa komeho zendi.” (Yisewe 8:22, 30) Apa Jesus nga rugana kumwe noGuhwe Jehova, age kwa hefe morwa kwa sikisire mo yininke yoyinzi ntani ga divire asi oGuhwe va mu hara. Nye ose ngapi?

7. Morwasinke sirugana sokuzuvhisa asi tu reterere ruhafo?

⁷ Jesus kwa uyungire asi ose kuhafa apa atu gava ntani apa atu tambura. (Yirugana 20:35) Ayo kwa tu reterere ruhafo apa twa gwene usili, nye morwasinke natu hafera pokutantera ko wopeke usili? Morwa awo kuhafa apa ava kwata egano eyi azi rongo Bibeli ntani nokutameka kutulisa po elikwatakano naKarunga. Ayo kutuhafesa mokuvamona kuna kurundurura magazaro gawo nomparukiso zawo. Sirugana sokuzuvhisa kuna kara sirugana somulyo unene ntani sokuhafesa. Aso kuvatera owo ava ya kara vakaume vaKarunga va ka gwane mwenyo gwanarunye.—2 Vakolinte 5:20.

8. Yisinke vamwe va uyunga ko kuhamena ruhafo aru tundu mokurugana kumwe naJehova?

⁸ Apa atu vatere wopeke va dive Karunga, ose kuyidiva asi kuna kuhafesa Jehova ntani asi elituromo lyetu mulyo kwendi. Ano eyi kuturetera ruhafo. (Resa 1 Vakolinte 15:58.) Marco, gomoItalia, kwa tanta asi: “Ame kuhafa unene pokudiva asi ame kuna kugava yomulyo po kwaJehova ntani age kapi nga divara eyi na mu ruganena.” Mokulifana, Franco, ogu a zuvhisire moItalia, kwa tanta asi: “Kupitira moNonkango dendi nomomawapaiko gendi, Jehova kutudiworokesa nkenye ezuva asi ga tu hara ntani nayinye eyi atu mu ruganene mulyo, nampili yi moneke kwetu ngwendi kwato mulyo. Eyi yiyo ani haferere kurugana kumwe naKarunga ntani kupa nge ehuguvaro meparu.”

9. Elikwatakano musinke lya kere pokatji kaJehova naJesus, ntani morwasinke?

⁹ Apa atu rugana kumwe nava va hara Jehova, ose kuvahedera pepi. Ose kuyadiva nawa yikara yawo. Ose kuyadiva yitambo yawo nomu ava hetekere ko kuyisikisa mo. Jesus kwa rugene kumwe naJehova nomvhura dononzi. Eharo nomalizuvho gawo kwa ya nkondoparere unene, ano kwato yokuvhura kuzonagura po elikwatakano lyawo. Jesus kwa fatwilire omu lya nkondoparere elikwatakano lyawo pokutanta asi: “Ame naTate gumwe tupu.” (Johanesa 10:30) Yosili, awo kwa kere mouumwe ntani nokuruganena kumwe.

10. Morwasinke sirugana sokuzuvhisa asi tu hedeserere kwaKarunga noku kwava wopeke?

¹⁰ Jesus kwa hundilire Jehova a popere varongwa vendi. Morwasinke? Age kwa kanderere asi: “Va lize mutjima gumwe ngwendi nyose.” (Johanesa 17:11) Nsene tu paruka kuliza nonompango daKarunga nokulihameka mokuzuvhisa, ngatu kwata egano yikara yendi yoyiwa. Ose kulironga eyi ya wapera kumuhuguvara nokukwama mavyukiso gendi. Ano apa atu hedere Karunga pepi, nage kutuhedera pepi. (Resa Jakopo 4:8.) Ose hena kuhedera pepi vanavazinyetu morwa kuligwanekera nomaudigu gokulifana ntani nokugwana ruhafo noyitambo yokulifana. Ose kurugana kumwe nokuhafa kumwe nokulididimikira kumwe. Octavia gomoBritania, kwa tanta asi: “Kuruganena kumwe naJehova kuhedesera nge kwava wopeke.” Age kwa faturura asi ngesi kuna kara novakaume ava va kara nositambo simwe nokukwama mavyukiso gamwe tupu. Yosili, nose yimo atu lizuvhu ngoso. Apa atu mono omu vanavazinyetu vana kulitura mo mokuhafesa Jehova, ayo kutuhedesera kwawo.

11. Morwasinke ngatu ka hederera Jehova pepi ntani novanavazinyetu mouzuni woupe?

¹¹ Eharo lyetu lyokuhara Karunga novanavazinyetu kuna kunkondopara, nye mouzuni woupe ngali ka nkondopara unene. Gazara sirugana sokuhafesa esi ngatu ka rugana komeho! Ose ngatu ka tambura ava ngava ka pindura koufe nokukavaronga kuhamena Jehova. Ntani ngatu ka ninka evhu li ka kare paradisa. Ayo ngayi ka reta ruhafo rorunene mokukarugana kumwe nokukasikilira mo mepangero lyaKristusa. Vantu navenye ngava ka likwatakana kumwe ntani naJehova, ogu nga ‘kutika nayinye moufenkenda wendi.’—Episarome 145:16.

12. Ngapi omu kuzuvhisa aku tu popere?

¹² Twa hepa kupopera elikwatakano lyetu naJehova. Ose kuna kuparuka mouzuni waSatana ntani kapi twa sikilira mo, makura  ayo ureru tu tameke kugazara nokurugana ngwendi vanauzuni. Ayo kwa lifana ngwendi ose kuna kuzoga momukuro, ano rupupo kuna kututwara oku tuna dili kuhara. Yipo nye twa hepera kuruganesa nonkondo detu mokuvyuka oku tuna hara kuza. Mokulifana, twa hepa kukondja mokunyokera po epukiso lyouzuni waSatana. Ngapi omu kuzuvhisa aku tu popere? Apa atu uyunga kuhamena Jehova noBibeli, ose kudemenena koyininke yomulyo po neyi yoyiwa, nye kapisi kweyi nayi sesupika epuro lyetu. (Vafilipi 4:8) Kuzuvhisa kunkondopeka epuro lyetu morwa kutudiworokesa matumbwidiro gaKarunga nonompango dendi. Ako hena kutuvatera tu kare noyikara eyi twa hepa mokulipopera kwaSatana nokouzuni wendi.—Resa Vaefeso 6:14-17.

13. Ngapi omu Mbangi zomoAustralia azi lizuvhu kuhamena kuzuvhisa?

¹³ Apa atu zuvhisa nokulironga ntani nokuvatera wopeke mombungakriste, ayo kutupopera morwa kutuninkisa tu dire kudemenena komaudigu getu. Joel, gomoAustralia, kwa tanta asi: “Kuzuvhisa kuvatera nge ni dire kudivara eyi yina kuhoroka mouzuni. Ako kudiworokesa nge maudigu aga vana kuligwanekera nago vantu ntani nomauwa aga nina kulimonena pokusikisa mo nompango domoBibeli. Kuzuvhisa kuvatera nge ni linunupike; ako kuninkisa nge ni huguvare mwaJehova nomovanavazinyetu.”

14. Morwasinke kukovekeda kwetu mokuzuvhisa aku likidire asi ose kutupitisira mpepo zaKarunga?

¹⁴ Kuzuvhisa kutupa ehuguvaro asi ose kuna kutupitisira mpepo zaKarunga. Mokuyifanekesa: Gazara asi sirugana soge kuna kara sokugavera nomboroto momukunda gweni. Sirugana oso kapi ava si ku futire, ano wa hepa kufutira yihepwa yoge. Ntani, sinzi sovantu kapi va hara mboroto ozo, ano vamwe va ku nyenga kweyi o zi va retere. Siruwo sokuhura kupi ngo twikira kurugana sirugana sangoso? Yosili ngayi ku dompesa usimbu, makura to hageke. Nampili ngomu ava tu zoro nokutuhandukira, sinzi setu kwa twikira kuzuvhisa nomvhura dononzi ntani nokuruganesa siruwo noyimaliwa yetu. Eyi kulikida asi mpepo zaKarunga kutuvatera.

15. Ngapi sirugana sokuzuvhisa sa likwatakana nositambo saKarunga kovantu?

¹⁵ Ngapi omu sirugana sokuzuvhisa sa likwatakana nositambo saJehova kovantu? Sitambo saKarunga kwa kere asi vantu ngava paruke narunye, ntani kapi sa runduruka apa Adamu ga zonene. (Jesaya 55:11) Karunga kwa tulisire po ewapaiko yipo a tu zowore kononzo nokonomfa. Monkedi musinke? Jesus kwa wizire pevhu nokuyazamba eparu lyendi. Mokugwanena mo uwa monzambo zendi, vantu va hepere  kulimburukwa Karunga. Yipo Jesus ga rongere vantu eyi ga hepa ko Karunga kwawo nokupangera varongwa vendi va rugane yokulifana. Apa atu zuvhisa nokuvatera wopeke va ya kare vakaume vaKarunga, ose kurugana kuliza newapaiko lyaKarunga lyokuzowora vantu kononzo nokonomfa.

16. Ngapi sirugana setu sokuzuvhisa sa likwatakana noyipango yoyinene po?

¹⁶ Apa atu vatere wopeke va gwane nzira zokomwenyo gwanarunye, ose kulikida asi twa va hara ntani twa hara Jehova. Age kwa “hara asi vantu navenye va paruke, awo hena va ka sike kediwo lyousili.” (1 Timoteusa 2:4) Apa Mufalisayi ga pulire Jesus kuhamena sipango esi sa pitakana po yikwawo, Jesus kwa limbwilire asi: “O hare Hompa Karunga goge nomutjima goge nagunye nomwenyo goge nagunye nonondunge doge nadinye. Esi yiso sipango po sosinene sokuhova. Ano sikwawo sauvali, esi sa hura pwesi, yiso esi asi, ‘Ano a kare mukweni, o mu hare moomu wa lihara nyamoge.’” (Mateusa 22:37-39) Apa atu zuvhisa mbudi zongwa, ose kulimburukwa koyipango oyo.—Resa Yirugana 10:42.

17. Ngapi ono kulizuvha kuhamena mfumwa sokuzuvhisa mbudi zongwa?

¹⁷ Ee, etungiko musi kouwa! Jehova kwa tu pa sirugana sokuturetera ruhafo, nokutuhedesera pepi nendi nokovanavazinyetu, ntani kupopera elikwatakano lyetu nendi. Aso kutupa hena mpito zokulikida eharo lyetu lyokuhara Karunga nava wopeke. Jehova ga kara novakareli mamiliyona mouzuni mudima, ano navenye va kara nomaukaro gokulisiga-siga. Nye yi kare asi tu vadinkantu ndi vakondi ndi nongawo ndi nohepwere ndi vanankondo ndi wokupira nonkondo, ose kukondja mokutantera ko wopeke epuro lyetu. Ose kulizuvha ngwendi Chantel gomoFransa, ogu ga tanta asi: “Muntu gononkondo po mouzuni, Musiti gwanayinye, Karunga gehafo, ogu a tantere nge asi: ‘Zende! Uyunga! Uyungira nge po, kutundilira komutjima. Ame tani ku pe nonkondo dange, noNonkango dange Bibeli, nevatero lyemeguru, novakweni vepevhu, nedeuro, ntani nomavyukiso posiruwo sokuwapera.’ Ee, mfumwa musi kouwa zokurugana eyi ana kutupura Jehova nokurugana kumwe nendi!”