1, 2. (a) Yisinke Jehova ga uyunga eyi yina kuhoroka momazuva getu? (b) Mapuro musinke natu ka limburura mosirongwa esi? (Tara efano.)

JEHOVA kwa tanta asi momazuva getu, “vanayirongo murongo ngava wiza koMujuda gumwe va mu tantere asi: ‘Ose kuna hara tu kare mositambo soge, yeeyi ose kwa zuvha asi Karunga, neni ga kara.’” (Sakaliya 8:23) ‘Mujuda’ kwa fanekesa ava ga gwaveka Karunga nompepo zokupongoka. Awo hena kuvatumbura asi ‘muhoko gwaKarunga.’ (Vagarata 6:16) “Vanayirongo murongo” kwa fanekesa ava va kara nehuguvaro lyokukaparukira pevhu. Awo va yi diva asi Jehova kwa tungika mbunga zovagwavekwa ntani nokulizuvha mfumwa mokumukarera kumwe nawo.

² Ngwendi muporofete Sakaliya, Jesus kwa tente asi vantu vaKarunga ngava kara mouumwe. Age kwa tumbwire ava va kara nehuguvaro lyemeguru asi “mbungagona,” ano ava va kara nehuguvaro lyepevhu asi ‘nonzwi dapeke.’ Nye Jesus kwa tente asi navenye ngava kara “siunda simwe tupu” ntani  ngava kwama ‘musita gumwe tupu.’ (Rukasa 12:32; Johanesa 10:16) Mokumona asi pwa kara nombunga mbali, vamwe kuvhura va lipure asi: (1) Ya kara hepero nonzwi dapeke di dive madina govagwavekwa ava vana kara po ngesi ndi? (2) Ngapi omu vagwavekwa ava ligazara? (3) Nsene gumwe gomombungakriste zetu a tameka kulya komboroto nokunwa kovhinyu poMurarero, ngapi nani mu tekura? (4) Kuvhura ni kare nosinka nsene kuna kumona sivaro kuna kuligwederera sava ava li komboroto nokunwa kovhinyu poMurarero ndi? Sirongwa esi nasi ka limburura mapuro ogo.

3. Morwasinke ya karera asi kapisi ureru kudiva vagwavekwa ava vana kara ngesi pevhu?

³ Ya kara hepero kononzwi dapeke di dive madina govagwavekwa ava vana kara po ngesi apa pevhu ndi? Hawe. Morwasinke? Morwa kapisi ureru kudiva nawa-nawa ava ngava ka gwana mfeto zawo. ^[1] Nampili ngomu Karunga ga va zigida va ze meguru, awo ngava gwana tupu mfeto zawo nsene va twikira kumulimburukwa. Satana ga yi diva ntani age kuruganesa ‘vaporofete woyimpempa’ va hetekere ko ‘kupukisa’ vagwavekwa. (Mateusa 24:24) Vagwavekwa kapi va diva nsene asi ngava ka gwana mfeto dogoro Jehova nga yi va zeresera asi awo kwa va varwira koulimburukwi. Jehova kugava sinongweneso esi sokuhulilira komeho va fe ndi komeho ‘mahepeko’ ndi udigu wounene u tameke.—Ehororo 2:10; 7:3, 14.

4. Nsene asi kapisi ureru kudiva madina govagwavekwa navenye ava vana kara ngesi pevhu, ngapi omu nonzwi dapeke nadi kara “mositambo” sawo?

⁴ Nsene asi kapisi ureru kudiva madina govagwavekwa navenye ava vana kara ngesi pevhu, ngapi omu nonzwi dapeke nadi kara “mositambo” sawo? Bibeli kutanta asi “vanayirongo murongo ngava wiza koMujuda gumwe va mu tantere asi: ‘Ose kuna hara tu kare mositambo soge, yeeyi ose kwa zuvha asi Karunga, neni ga kara.’” Nampili ngomu velise za tumbura Mujuda gumwe, azo kwa tamba kovantu wovanzi morwa kwa uyunga hena asi “neni ga kara.” Eyi kutanta asi Mujuda kwa fanekesa mbunga zovagwavekwa. Nonzwi dapeke da yi diva eyi, ntani ado kukarera Jehova kumwe nombunga ozo. Kapi da hepa kudiva madina gava va hamena mombunga ozo yipo di va kwame. Jesus yige Mupitisili gwado, ntani Bibeli kuditantera asi gelike da hepa kukwama.—Mateusa 23:10.

5. Erondoro musinke va hepa kugazadara ko unene vagwavekwa, ntani morwasinke?

⁵ Vagwavekwa va hepa kugazadara ko unene kerondoro lyomo-1 Vakolinte 11:27-29. (Resa.) Ngapi omu mugwavekwa na vhura kulya komboroto nokunwa kovhinyu “ponkedi zondona” poMurarero?  Nsene a dira kukara nelikwatakano lyewa naJehova nokudira kumulimburukwa, makura apa na lya komboroto nokunwa kovhinyu, age ngoso kuna kuyirugana ponkedi zondona. (Vahebeli 6:4-6; 10:26-29) Erondoro eli lyononkondo kudiworokesa vagwavekwa asi va hepa kutwikira kulimburukwa nsene vana hara kukagwana ‘mfeto ezi ga va zigidira Karunga mwaJesus Kristusa.’—Vafilipi 3:13-16.

6. Ngapi omu vagwavekwa ava ligazara?

⁶ Paurusa kwa tanterere vagwavekwa asi: “Tani mu korangeda, ame nkwate morwaHompa, mu kare moyikara yokuliza nezigido eli ga mu zigidira Karunga.” Ngapi nava yi rugana eyi? Paurusa kwa fatwilire asi: “Omu kare valinunupiki novanambili, oku tomu lididimike-didimike meharo. Omu kondjere uumwe ou za mu pa Mpepo mu kare nombili novakweneni.” (Vaefeso 4:1-3) Mpepo zokupongoka zaJehova kuvatera vakareli vendi va linunupike. (Vakorosi 3:12) Yipo nye vagwavekwa ava dili kuligazara asi awo mulyo kupitakana wopeke. Awo va yi diva asi Jehova kapi a va pe mpepo zonzi zokupongoka kupitakana ezi a gava kovakareli vendi vapeke. Ntani kapi ava gazara asi awo kukwata nawa egano mausili goBibeli kupitakana wopeke. Awo hena kapi ava tantere muntu asi nage va mu gwavekwa ntani asi kuvhura a tameke kulya komboroto nokunwa kovhinyu poMurarero. Nye, awo kwa linunupika ntani va diva asi Jehova gelike gokuzigida vantu ngava ze meguru.

7, 8. Yisinke va dira kuhara vagwavekwa, ntani morwasinke?

⁷ Nampili ngomu vagwavekwa ava lizuvhu asi azo mfumwa kukuzigida o ze meguru, awo kapi va hara wopeke va va tekure monkedi zokulikarera. (Resa Vafilipi 2:2, 3.) Awo va yi diva asi apa Jehova ga va gwavekere, age kapi ga yi divisire kovantu wopeke. Ayo kapi ayi tetura mugwavekwa nsene vamwe va dira kuyipura poopo asi age kwa mu gwaveka. Age ga yi diva asi Bibeli kututantera asi walye atu pura usimbu-simbu muntu ogu ana kutanta asi Karunga kwa mu pa situmbukira sokulikarera. (Ehororo 2:2) Morwa mugwavekwa kapi ga hara wopeke va mu tekure monkedi zokulikarera, kapi a tantere ava a ligwana nawo asi age mugwavekwa. Age kapi a yi tantere nkenye ogu. Ntani kapi a linenepekere yininke yoyiwa eyi nga ka rugana meguru.—1 Vakolinte 1:28, 29; resa 1 Vakolinte 4:6-8.

⁸ Vagwavekwa kapi ava lizuvhu asi awo va hepa kukara tupu novagwavekwa vakwawo. Kapi ava hetekere ko kugwana vagwavekwa vakwawo yipo va zogere kuhamena yokukara mugwavekwa ndi va tulise po kambunga mokulironga Bibeli. (Vagarata 1:15-17) Mbungakriste kapi ngazi kara mouumwe nsene vagwavekwa va rugana yininke oyo. Ntani ngava guvisa mpepo zokupongoka, ezi azi vatere vantu vaKarunga va kare mombili nomouumwe.—Resa Varoma 16:17, 18.

9. Morwasinke natu dilira kutekura ava ava li komboroto nokunwa kovhinyu poMurarero monkedi zokulikarera? (Tara kakende “ Eharo ‘kapi ali reta yoyidona.’”)

⁹ Ngapi omu no tekura vanavazinyetu wovagwavekwa? Jesus kwa tanterere varongwa  vendi asi: “Namuvenye vezimo limwe tupu.” Age kwa twikilire ko asi: ‘Ogu a linenepeke, ngava mu nunupika, ano ogu a linunupike, ngava mu nenepeka.’ (Mateusa 23:8-12) Yipo nye ya karera epuko kuhara po unene muntu gumwe, nampili a kare asi mugwavekwa. Apa Bibeli azi uyunga kuhamena vakuronambunga, azo kutukorangeda tu honene epuro lyawo, nye kututantera hena asi twa ha tumbura muntu asi mupitisili gwetu. (Vahebeli 13:7) Yosili, Bibeli kutanta asi vamwe va fira ‘kuvafumadeka unene.’ Morwa awo ‘kupitisira nawa’ ntani ‘nokurugana unene mokuudisa nomokuronga,’ nye kapisi morwa vagwavekwa. (1 Timoteusa 5:17) Nsene tu yererepeka unene vagwavekwa, ose kuvhura tu va fise nomuga. Ndi tu va ninkise va linenepeke. (Varoma 12:3) Natuvenye kapi tuna hara kurugana yininke eyi nayi ninkisa vamumbya vaKristusa wovagwavekwa va ture epuko lyangoso.—Rukasa 17:2.

10. Ngapi natu yi likida asi ose kufumadeka vagwavekwa?

¹⁰ Ngapi natu yi likida asi ose kufumadeka ava ga gwaveka Jehova? Pokudira kuvapura omu va ya kara vagwavekwa. Eyi kwa korera komuntu mwene, ose kapi twa kara nononkondo dokuyidiva. (1 Vatesaronika 4:11; 2 Vatesaronika 3:11) Ntani twa ha gazara asi mulikwali gwawo ndi vakurona vawo ndi vemepata lyawo nawo kwa va gwaveka. Muntu kapi a pingi ehuguvaro lyangoso kwava vemepata lyawo. (1 Vatesaronika 2:12) Twa hepa kunyokera po mapuro aga naga koresa wopeke. Pasihonena, kapisi tu pure mukadamugwavekwa omu a lizuvhu kuhamena kukaparukira pevhu pwa hana mugara gwendi. Mwanayinye, ose kuvhura tu huguvare asi mouzuni woupe, Jehova nga ka ‘kutika nayinye moufenkenda wendi.’—Episarome 145:16.

11. Monkedi musinke atu lipopere nsene tu nyokera po ‘kuhara’ unene muntu?

¹¹ Nsene tu dira kutekura vagwavekwa monkedi zokulikarera kupitakana wopeke, ose kulipopera nyamwetu. Monkedi musinke? Bibeli kututantera asi mombungakriste mwa kara vamwe ava ava ‘lininkisa’ asi nawo vagwavekwa. (Vagarata 2:4, 5; 1 Johanesa 2:19) Ntani vagwavekwa vamwe nampo kapi ngava twikira kulimburukwa. (Mateusa 25:10-12; 2 Peturusa 2:20, 21) Nsene tu nyokera po ‘kuhara’ unene muntu, ose kapi ngatu kwama wopeke nampili va kare asi vagwavekwa ndi vantu ava va divikwa ndi ava va karera Jehova nomvhura dononzi. Makura nsene ngava dira kulimburukwa ndi va sige mbungakriste, ose kapi ngatu zumbanesa epuro lyetu mwaJehova ndi tu hageke kumukarera.—Juda 16.

12, 13. Morwasinke natu dilira kukara nosinka kuhamena sivaro sava ava li komboroto nokunwa kovhinyu poMurarero?

¹² Monomvhura dononzi da ka pita, sivaro sava ava li komboroto nokunwa kovhinyu poMurarero kwa gurumuka. Nye ngesi kuna kuligwederera nkenye mvhura. Kuvhura tu kare nosinka kweyi ndi? Hawe. Ngesi tatu ka zogera asi morwasinke.

¹³ Jehova “ga diva ava vendi mo.” (2 Timoteusa 2:19) Vanavazinyetu ava ava varura sivaro sowo ava li komboroto  nokunwa kovhinyu poMurarero kapi va diva asi wolye sili ava va gwaveka. Yipo nye sivaro oso kwa kwatera mo ava ava ligazara asi nawo vagwavekwa. Pasihonena, vamwe ngava li komboroto nokunwa kovhinyu konyima va ya hageka. Vamwe kwa kara nouvera wopamagazaro ndi wopomalizuvho ntani nokugazara asi ngava ka pangera naKristusa meguru. Yipo nye natu dilira kudiva nawa-nawa vagwavekwa ava vana kara ngesi pevhu.

14. Yisinke za uyunga ko Bibeli kuhamena sivaro sovagwavekwa ava ngava kara pevhu apa ngau tameka udigu wounene?

¹⁴ Apo ngapa kara vagwavekwa komaruha gomanzi pevhu apa Jesus nga wiza a ya va tware meguru. Bibeli kuuyunga asi Jesus “nga tuma vaengeli vendi nomarumbendo gokupyopya unene. Awo ngava ya pongaika vahoroworwa vendi momaruha gane gouzuni, kutunda kosikondo simwe seguru dogoro nokosikwawo.” (Mateusa 24:31) Bibeli kulikida hena asi pomazuva gopouhura, ngapa kara vagwavekwa wovasesu apa pevhu. (Ehororo 12:17) Nye kapi za tumbura sivaro sava ngava kara pevhu apa ngau tameka udigu wounene.

15, 16. Yisinke twa hepa kukwata egano kuhamena vantu 144 000 ava ga horowora Jehova?

¹⁵ Jehova yige a tokora kuhorowora vagwavekwa. (Varoma 8:28-30) Jehova kwa tamekere kuhoworora vagwavekwa konyima zevhumbuko lyaJesus. Mosiruwo sina, Vakriste navenye wousili kwa va gwavekere. Konyima zonomvhura mafere, sinzi sava ngava tanta asi awo Vakriste kapi ngava kwama Kristusa. Nampili ngoso,  monomvhura odo, Jehova kwa gwavekere Vakriste wousili. Awo kwa kere ngwendi yilya eyi ga uyungire Jesus mokatji komau. (Mateusa 13:24-30) Pomazuva gopouhura, Jehova kwa twikira kuhorowora vantu va kare ruha rowo 144 000. ^[2] Yipo nye nsene Karunga a tokora kuhorowora vamwe komeho uhura u wize, age kuna kurugana yininke youhunga. (Jesaya 45:9; Ndaniyera 4:35; resa Varoma 9:11, 16.) ^[3] Twa hepa kutakamesa asi kapisi tu kare ngwendi varugani ava va sivanene kuhamena omu muhona gwawo ga tekwire ava va ya rugene vili zimwe tupu.—Resa Mateusa 20:8-15.

¹⁶ Kapisi navenye ava va kara nehuguvaro lyokukaparukira meguru kuna kara ruha ‘romukareli gokulimburukwa gonondunge.’ (Mateusa 24:45-47) Ngwendi mosiruwo sovapositoli, Jehova naJesus naina kuna kukutika ndi kuronga wovanzi kupitira mwava wovasesu. Vagwavekwa wovasesu tupu yiwo va rugenesere mokutjanga Matjangwa goRugereka goSikriste. Naina, vagwavekwa wovasesu tupu va kara nositumbukira sokupa vantu vaKarunga “nondya posiruwo sado.”

17. Yisinke tuna lirongo mosirongwa esi?

¹⁷ Yisinke tuna lirongo mosirongwa esi? Jehova kwa tokora kugava mwenyo gwanarunye kovantu vendi ava ngava parukira apa pevhu, ano ava ngava ka pangera naJesus ngava ka parukira meguru. Jehova nga futa vakareli vendi navenye, yi kare asi “Mujuda” ndi “vanayirongo murongo,” nye age kwa hepa ko tupu kwawo va kwame noveta dokulifana nokutwikira kumulimburukwa. Navenye va hepa kulinunupika. Navenye va hepa kumukarera kumwe mouumwe. Ntani navenye va hepa kuruganena kumwe nombili mombungakriste. Ngomu tuna kuhedera pepi nouhura, ngano natuvenye tu twikire kukarera Jehova nokukwama Kristusa ngosiunda simwe tupu.