1, 2. Morwasinke Paurusa ga tjangerere mbilive koVakriste woVahebeli?

MOMVHURA 61, nombungakriste da kere moIsraeli kwa haferere mbili. Nampili ngomu mupositoli Paurusa ga kere modorongo moRoma, age kwa kere nehuguvaro asi ntaantani va mu pwagese mo. Mukwawo zendi Timoteusa ogu ngava gendi nage age ntani tupu vana kumupwagesa mo modorongo, makura mouvali wawo kwa here kukadingura vapuli vakwawo womoJudeya. (Vahebeli 13:23) Monomvhura tupu ntano, Vakriste womoJudeya, unene po ava va tungire moJerusarema, va hepere kurugana ko yuma usimbu. Morwasinke? Morwa Jesus kwa tanterere vasikuli vendi asi nsene ngomu mona Jerusarema vana zi kundurukida vakwayita, va hepa kuduka mo.—Rukasa 21:20-24.

² Apo kwa pitire nomvhura 28 kutunda apa Jesus ga tanterere vasikuli vendi erondoro olyo. Posiruwo sina, Vakriste womoIsraeli awo kwa twikilire kukara noulimburukwi nampili ngomu va ligwanekerere nomaudigu nomahepeko. (Vahebeli 10:32-34) Nye Paurusa kwa here kuvawapaikira kweyi ya ya horokere komeho. Awo kwa kere pepi nokuligwanekera noudigu ou wa hetekere epuro lyawo. (Mateusa 24:20, 21; Vahebeli 12:4) Awo va ya hepere kulididimikira  nokunkondopeka epuro lyawo kupita pwanare yipo va limburukwe nonkango daJesus dokutjwayuka, morwa kwa hamenene mo eparu lyawo. (Resa Vahebeli 10:36-39.) Yipo nye Jehova ga gendesere Paurusa a tjangere mbilive vapuli vakwawo. Mbilive ozo kuzitumbura asi buke zoVahebeli, azo kwa zi tjangerere mokuvankondopeka kweyi ya ya horokere.

3. Morwasinke natu haferera buke zoVahebeli?

³ Ngovantu vaKarunga naina, ose kuhafera buke zoVahebeli. Morwasinke? Morwa ukaro wetu wa lifana nou woVakriste womoJudeya. Ose kuna kuparuka ‘moyiruwo yoyidigu,’ ntani vantu wovanzi kulididimikira mahepeko gomanene. (2 Timoteusa 3:1, 12) Nye sinzi setu kuna kuhafera mbili ntani kapi vana kutuhepeka. Ngwendi Vakriste womomazuva gaPaurusa, twa hepa kuvangarara. Morwasinke? Morwa ntaantani tupu ngatu ligwanekere noudigu wounene ou ngau heteka epuro lyetu!—Resa Rukasa 21:34-36.

4. Yisinke etjangwa lyomvhura 2016, ntani morwasinke va li horowera?

⁴ Yisinke nayi tu vatera yipo tu liwapaikire sihorokwa oso sokomeho? Mobuke zoVahebeli, Paurusa kwa tumbura yininke yoyinzi eyi nayi tu vatera tu nkondopeke epuro lyetu. Sininke simwe kusigwana moVahebeli 13:1. Azo kutukorangeda asi: “Omu hare vakweneni.” Velise ezi kwa zi horowora zi kare etjangwa lyomvhura 2016.

5. Yisinke kuhara vakwetetu?

⁵ Yisinke kuhara vakwetetu? Kuna kara malizuvho gononkondo aga ga kara pokatji kava vemepata ndi kovakaume wovanene. (Johanesa 11:36) Ose kapi atu lininkisa mokukara vantu namunazina. Ose vezimo limwe tupu. (Mateusa 23:8) Paurusa kwa uyungire asi: “Omu lihare-hare neharo lyosiumbya lyomwaKristusa. Omu gave sihonena sokulifumadeka-fumadeka.” (Varoma 12:10) Nonkango odo kulikida omu eharo lyetu lyokuhara vanavazinyetu lya kara nononkondo. Eharo eli kumwe neharo lyoSikriste, kuvatera vantu vaKarunga va kare vakaume wovanene ntani nokukara mouumwe.

6. Kwalye ava likida Vakriste wousili eharo, ntani morwasinke?

⁶ Nkango ‘kuhara vakwetu’ kuzigwana unene po moyimbapiratjangwa yetu. KoVajuda, nkango ‘mukwetu’ unene po ngazi tamba kovanekoro ntani poyiruwo yimwe komuntu ga hana asi gekoro. Nye Vajuda kapi ngava zi ruganesa komuntu ga hana asi Mujuda. NgoVakriste wousili ‘mukwetu’ kuna kara Mukriste gousili, yi kare asi kosirongo musinke ga tunga ndi ga tundilira. (Varoma 10:12) Jehova kwa tu ronga tu lihara-hare ngovantu namumbyendi. (1 Vatesaronika 4:9) Nye morwasinke ya karera nomulyo kutwikira kuhara vakwetetu?

7. (a) Konda musinke zeyi natu harera vakwetetu? (b) Gava konda zimwe zeyi natu nkondopekera eharo lyetu lyokulihara-hara.

⁷ Konda zomulyo zeyi natu harera vakwetu kuna kara asi Jehova kututantera tu yi rugane. Ose kapi tatu vhuru kuhara Jehova  nsene kapi twa hara vakwetu. (1 Johanesa 4:7, 20, 21) Konda zimwe kuna kara asi natuvenye twa hepa evatero lyovakwetetu, unene po poyiruwo yoyidigu. Apa Paurusa ga tjangerere Vakriste woVahebeli mbilive, age ga divire asi vamwe ntaantani ngava sige mambo gawo noyiweka yawo. Jesus kwa fatwilire omu siruwo oso ngasi digopa. (Marukusa 13:14-18; Rukasa 21:21-23) Komeho si ya sike mo oso siruwo, Vakriste owo va hepere kunkondopeka eharo lyawo lyokulihara-hara.—Varoma 12:9.

8. Yisinke twa hepa kurugana ngesi komeho udigu wounene u wize?

⁸ Udigu wounene pepi una kara. (Marukusa 13:19; Ehororo 7:1-3) Ose ngatu hepa kulimburukwa epukururo eli asi: “Hwilireni mononzugo deni, vantu vange, zedireni ko mavero geni. Vandeni tanko noku nali pwa ehandu lyaKarunga.” (Jesaya 26:20) ‘Nonzugo’ odo nampo kwa tamba nombungakriste detu. Amo yimo atu karere Jehova kumwe novanavazinyetu. Nye twa hepa kurugana ko yuma kupitakana tupu kuponga kumwe. Paurusa kwa diworokesere Vakriste woVahebeli asi va hepa kulikorangeda-korangeda mokulikida eharo ntani nomokurugana yirugana yoyiwa. (Vahebeli 10:24, 25) Twa hepa kunkondopeka ngesi eharo lyokuhara vakwetetu morwa ngali tu vatera tu lididimikire, yi kare asi maudigu musinke ngatu ligwanekera nago komeho.

9. (a) Nompito musinke atu gwana dokulikida eharo kovakwetetu? (b) Gava yihonena omu vantu vaJehova ava likida eharo kovakwawo.

⁹ Ose twa kara nonompito dononzi dokulikida eharo vakwetetu komeho udigu wounene u wize. Vanavazinyetu wovanzi kuna kuhepa morwa makankamo gevhu nomaruhanzo nomakundungu nomamunkupi gomanene ndi yimpagwa hena yapeke. Vamwe kuna kulididimikira mahepeko. (Mateusa 24:6-9) Ntani pana kara udigu woyikweparu morwa kuparuka mouzuni ou woudona. (Ehororo 6:5, 6) Nampili ngoso, moomu vanavazinyetu vana kuligwanekera nomaudigu gomanzi, yimo hena tuna kugwana nompito dokuvalikida eharo. Nampili ngomu uzuni ou wa dira eharo, ose twa hepa kutwikira kuhara vakwetetu. (Mateusa 24:12) ^[1]

10. Yisinke natu ka zogera?

¹⁰ Kugusa ko maudigu tuna kuligwanekera nago, ngapi omu natu twikira kuhara vakwetetu? Ngapi omu natu yi likida asi twa kara neharo lyangoso kovanavazinyetu? Mupositoli Paurusa konyima  zokuuyunga asi: “Omu hare vakweneni,” age ga tumbwire nonkedi omu natu yi rugana. Ngesi tatu ka zogera nonkedi ntazimwe.

11, 12. Yisinke ayi tanta kutambura vagenda? (Tara efano pepenuno 3.)

¹¹ “Walye omu divara kutambura vagenda.” (Resa Vahebeli 13:2.) Yisinke azi tanta nkango “kutambura vagenda”? Nkango ga ruganesere apa Paurusa kwa tamba “kupakera mbili vageni.” Nkango ozo kuvhura kutudiworokesa kuhamena Abirahamu naRoto. Vagara owo vavali kwa pakerere mbili vageni. Konyima, Abirahamu naRoto va ya yi dimbwilire asi vageni owo kwa kere vaengeli. (Genesis 18:2-5; 19:1-3) Yihonena oyo kwa korangedere Vakriste woVahebeli va likide eharo kovakwawo pokuvatambura momambo gawo.

¹² Ngapi omu natu tambura wopeke? Pokuzigida vanavazinyetu komambo getu tu ya lye nawo ndi tu ya likorangede. Nampili yi kare asi kapi twa diva nawa mutareli gwetu gonombunga namukadendi, ose kuvhura tu va zigide nsene kuna kuyadingura mbungakriste zetu. (3 Johanesa 5-8) Kapi twa hepa kutereka nondya dononzi ndi tu ruganese yimaliwa yoyinzi. Sitambo setu kuna kara sokukorangeda vanavazinyetu, kapisi sokulimonekesera eyi twa weka. Ntani kapisi tu zigide tupu ava nampo ngava tu zigida nose. (Rukasa 10:42; 14:12-14) Yomulyo po kuna kara asi kapisi tu divare kutambura vagenda.

13, 14. Ngapi omu natu vhura ‘kudiworoka vanadorongo’?

¹³ “Omu diworoke vanadorongo.” (Resa Vahebeli 13:3.) Apa Paurusa ga tjenge eyi, age kwa tembe kovanavazinyetu ava va kere modorongo morwa epuro lyawo. Paurusa kwa pandadekere mbungakriste morwa nazo kwa ‘zuvhire udigu kumwe novanadorongo.’ (Vahebeli 10:34) Vanavazinyetu vamwe kwa vaterere Paurusa nomvhura ne edi ga kere modorongo, nye vamwe kwa tungire ure. Ngapi va vhulire kuvatera Paurusa? Awo kwa kovekedere kumukanderera po.—Vafilipi 1:12-14; Vahebeli 13:18, 19.

¹⁴ Naina, Nombangi dononzi kuna kara modorongo morwa epuro lyado. Vanavazinyetu ava va tunga pepi nawo kuvhura kuvavatera noyihepwa yopanyama. Nye sinzi setu kwa tunga ure nonodorongo odo. Ngapi omu natu vhura kuvavatera nokuvadiworoka? Kuhara vakwetetu ngaku tu tumangeda tu va kanderere po. Pasihonena, kuvhura tu kanderere po vanavazinyetu nampili vanona ava vana kara modorongo moEritrea, kukwatera mo munazinyetu Paulos Eyassu naIsaac Mogos ntani naNegede Teklemariam, ava vana kara modorongo ure wonomvhura 20.

15. Ngapi natu fumadeka nonkwara detu?

¹⁵ “Nonkwara ava di fumadeke navenye.” (Resa Vahebeli 13:4.) Ose kulikida  eharo vakwetetu pokukara tuna kuhuka pamukaro. (1 Timoteusa 5:1, 2) Pasihonena, nsene tu hondera namunazinyetu, ose tatu mu koresa kumwe nepata lyendi. Ano vanavazinyetu kapi ngava tu huguvara hena. (1 Vatesaronika 4:3-8) Gazara omu na lizuvha mukadi nsene a dimburura asi mugara gwendi kutarera mafano goruhonda. Age nga lizuvhu asi mugara gwendi kapi ga mu hara ntani kapi ga fumadeka ewapaiko lyononkwara.—Mateusa 5:28.

16. Nsene yi tu gwanena po, ngapi omu nayi tu vatera tu hare vakwetetu?

¹⁶ ‘Yi mu gwanene po eyi mwa kara nayo.’ (Resa Vahebeli 13:5.) Kuhuguvara mwaJehova ngaku tu vatera yi tu gwanene po eyi twa kara nayo. Ngapi eyi nayi tu vatera tu hare vakwetetu? Nsene yi tu gwanena po eyi twa kara nayo, ose ngatu diworoka asi vanavazinyetu mulyo unene kupitakana yimaliwa ndi emona. (1 Timoteusa 6:6-8) Ose kapi ngatu sivana kuhamena vanavazinyetu ndi ukaro wetu meparu. Ntani kapi ngatu fira mfudu vakwetu ndi tu dowokere emona. Nye nsene yi tu gwanena po, ose ngatu kara nougavi.—1 Timoteusa 6:17-19.

17. Ngapi kukara nouradi ndi ‘nehuguvaro’ nayi tu vatera tu hare vakwetetu?

¹⁷ ‘Kareni nehuguvaro ndi nouradi.’ (Resa Vahebeli 13:6.) Kuhuguvara mwaJehova kutupa uradi tu lididimikire mahepeko. Uradi kutuvatera tu kare nomutaro gouhunga. Apa atu kara nomutaro gouhunga, ose kulikida eharo kovakwetetu pokuvakorangeda nokuvahengagwida. (1 Vatesaronika 5:14, 15) Nampili poudigu  wounene, ose kuvhura ngatu kare nouradi pokudiva asi eparu lyetu pepi lina kara.—Rukasa 21:25-28.

18. Ngapi omu natu nkondopeka eharo lyetu kovakuronambunga?

¹⁸ “Diworokeni vapitisili veni.” (Resa Vahebeli 13:7, 17.) Vakuronambunga kuruganesa siruwo sawo yipo va tu ruganene. Apa atu gazara nayinye eyi ava rugana, eharo norupandu rwetu kwawo kunkondopara. Eyi atu rugana, kapi tuna hara yi va ninkise va zumbanese ruhafo rwawo ndi yi va handukise. Nye, ose tuna hara kuvalimburukwa. Mokurugana ngoso, tatu ‘va tekura pakuto neharo lyenene morwa yirugana eyi va rugana.’—1 Vatesaronika 5:13.

19, 20. Ngapi omu natu twikira kuhara unene vakwetetu?

¹⁹ Vantu vaJehova kwa va divira kokulihara-hara. Eyi yiyo ya horokere momazuva gaPaurusa. Nye Paurusa kwa korangedere vanavazina va likide eharo momunene. Age kwa tente asi: “Yangesi mu yi tware komeho.” (1 Vatesaronika 4:9, 10) Yosili, pwa kara mpito zokutamununa eharo lyetu!

²⁰ Ngomu tuna kumona etjangwa lyetu lyomvhura moSinyanga soUhompa, tu twikireni kuteda ko komapuro aga: Ame kuvhura ni tambure vagenda ndi? Ngapi nani vatera vanavazinyetu womodorongo? Ame kufumadeka ewapaiko lyaKarunga lyononkwara ndi? Yisinke ngayi vatera nge yipo yi gwanene nge po? Ngapi nani huguvara unene Jehova? Ngapi nani limburukwa ava ava tu pitisire? Nsene pana hepa mawapukururo momaruha aga ntazimwe, etjangwa lyomvhura kapi ngali kara tupu sininke va tura kekuma, nye ngali tu diworokesa tu limburukwe nonkango daPaurusa edi asi: “Omu hare vakweneni.”—Vahebeli 13:1.