1, 2. (a) Yisinke ya hamena mo ‘mouhwi waKarunga wokudira kuvhura kutanta’? (b) Mapuro musinke natu ka zogera mosirongwa esi?

JEHOVA kwa tu pa uhwi womulyo po weharo apa ga tumine Munwendi Jesus a wize pevhu! (Johanesa 3:16; 1 Johanesa 4:9, 10) Mupositoli Paurusa kwa tumbwire uhwi owo ‘ngouhwi wokudira kuvhura kutanta!’ (2 Vakolinte 9:15) Morwasinke Paurusa ga ruganesere nonkango odo?

² Paurusa ga yi divire asi nzambo zaJesus kwa ya sikisa mo matumbwidiro nagenye gaKarunga. (Resa 2 Vakolinte 1:20.) Eyi kutanta asi uhwi waKarunga “wokudira kuvhura kutanta” kwa hamena mo nzambo zaJesus ntani nouwa neharo lyanarunye eli ga tu likida Jehova. Uhwi owo womulyo, nokuvhura si kuutanta. Ngapi omu au tu kundama? Ntani ngapi nau tu tumangeda tu liwapaikire Murarero gwaHompa ogu ngagu kara moUtatu, 23 Nsinano 2016?

3, 4. (a) Ngapi omu o lizuvhu kuhamena muntu ogu ana ku pe uhwi? (b) Ngapi omu uhwi au rundurura eparu lyoge?

³ Ose kuyihafera apa muntu a tu pe uhwi. Nye mauhwi gamwe kuvhura kurundurura eparu lyetu. Pasihonena, ligazara asi ove ono lihameke mo moukorokotji. Etengeko lyoukorokotji owo kuna kara nomfa. Nye hararasi, muntu wa dira kudiva ta lizambere mokugwana etengeko olyo. Age ana hara kukufira! Ngapi omu no lizuvha kuhamena uhwi owo?

⁴ Uhwi wangoso kuvhura kukuninkisa o ture po marunduruko meparu lyoge. Nampo kuvhura hena u ku tumangede o kare nougavi nokuhara vakweni ntani nokugusira po ava va ku tekwire momudona. Meparu lyoge nalinye, ove ngo hara kulikida rupandu kogu ga lizamberere a ku fire.

5. Ngapi omu uhwi waKarunga wosizoweseso wa pitakana nkenye uhwi?

⁵ Uhwi waKarunga wosizoweseso mulyo unene kupitakana nkenye uhwi. (1 Peturusa 3:18) Gazara eyi: Natuvenye kwa pinga nzo kwaAdamu, ntani azo kwa reta nomfa. (Varoma 5:12) Eharo kwa tumangedere Jehova a tume Jesus pevhu a ya “fire vantu navenye.” (Vahebeli 2:9) Nye nzambo zaJesus ngazi sikisa mo yoyinzi. Azo ngazi zonagura po nomfa dogoro narunye. (Jesaya 25:7, 8; 1 Vakolinte 15:22, 26) Navenye ava ava pura mwaJesus ngava paruka narunye mombili noruhafo, yi kare asi ngava ka pangera naKristusa meguru ndi ngava parukira apa pevhu. (Varoma 6:23; Ehororo 5:9, 10) Mauwa musinke hena ga hamena mo mouhwi waJehova?

6. (a) Mauwa musinke gouhwi waJehova ono kundindira? (b) Yininke musinke yitatu nau tu tumangeda uhwi waKarunga tu rugane?

⁶ Ruha rouhwi waKarunga kuna kara asi evhu ngali kara paradisa, vaveli ngava va verura ntani vafe ngava va pindura koufe. (Jesaya 33:24; 35:5, 6; Johanesa 5:28, 29) Ose twa hara Jehova naMunwendi morwa kwa tu pa ‘uhwi wokudira kuvhura kutanta.’ Yisinke nau tu tumangeda uhwi ou tu rugane? Awo kututumangeda (1) tu honene Jesus Kristusa, (2) tu hare vanavazinyetu, ntani (3) tu gusire po vakwetetu kutundilira komutjima.

7, 8. Ngapi natu lizuvha kuhamena eharo lyaKristusa, ntani yisinke nali tu tumangeda tu rugane?

⁷ Pomuhowo lya hepa kututumangeda tu ruganese eparu lyetu mokufumadeka Jesus. Mupositoli Paurusa kwa tente asi: “Eharo eli ga tu hara nalyo Kristusa yilyo ali panga mwetu.” (Resa 2 Vakolinte 5:14, 15.) Paurusa ga yi divire asi nsene tu tambura eharo lyenene lyaJesus, alyo ngali panga mwetu ndi ngali tu tumangeda tu hare Jesus nokumufumadeka. Apa atu kwata egano eyi ga tu ruganena Jehova, eharo lyendi kututumangeda tu paruke monkedi ezi azi yererepeke Jesus. Ngapi omu natu yi rugana eyi?

⁸ Eharo lyokuhara Jehova ngali tu tumangeda tu kwame sihonena saJesus nokurugana moomu nga rugana age. (1 Peturusa 2:21; 1 Johanesa 2:6) Apa atu limburukwa Karunga naKristusa, ose ngoso kulikida asi twa va hara. Jesus kwa tente asi: “Ogu ga kara noyipango yange, nye age ta yi sikisa mo, yige nye googo ga hara nge. Ano Tate  nga hara ogu ga hara nge, name ngani mu hara, makura ngani mu lihorwere.”—Johanesa 14:21; 1 Johanesa 5:3.

9. Makondjeso musinke twa kara nago?

⁹ Mosiruwo soMurarero, ayo ya wapa kuteda ko omu tuna kuruganesa eparu lyetu. Lipura asi: ‘Momaruha musinke nina kuhonena Jesus? Momaruha musinke na hepa kuwapukurura?’ Ayo ya wapa kulipura mapuro ogo morwa uzuni kuna tu harere tu paruke kuliza nawo. (Varoma 12:2) Nsene kapi tuna kutakamesa, kuvhura tu gwire mekondjeso lyokuhonena varongi novantu wokudivikwa ntani novadani wovanene womouzuni. (Vakorosi 2:8; 1 Johanesa 2:15-17) Ngapi natu nyokera po ekondjeso lyangoso?

10. Mapuro musinke natu lipura mosiruwo soMurarero, ntani yisinke nayi tu tumangeda tu rugane? (Tara efano pepenuno 9.)

¹⁰ Ayo ya wapa kulitulira po siruwo poMurarero mokukonakona yikoverero nonomuvi nonomusika ntani neyi ya kara mokompiuta ndi moserefoni zetu. Lipura asi: ‘Ngano Jesus ana kara po apa, a mone omu nina dwara, nani lifa nomuga ndi?’ (Resa 1 Timoteusa 2:9, 10.) ‘Yikoverero yange kulikida asi ame musikuli gwaKristusa ndi? Kuvhura Jesus a hafere kutara nomuvi edi ani tarere ndi? Kuvhura a purakene konomusika edi ani purakene ndi? Ngano Jesus a hundira serefoni zange, kuvhura ni life nomuga kweyi na mona mo ndi? Kuvhura yi digopere nge kufatwilira Jesus eyi ani haferere maudano govidiyo aga ani dana ndi?’ Eharo lyetu lyokuhara Jehova ngano li tu tumangede tu sige nayinye eyi ya dira kuwapera Mukriste, yi kare asi yingapi ya kosa. (Yirugana 19:19, 20) Apa atu ligava kwaJehova, ose kutumbwidira kuruganesa eparu lyetu mokufumadeka Kristusa. Yiyo twa hepera kuzuguma nayinye eyi nayi tu kondera mokuhonena Jesus.—Mateusa 5:29, 30; Vafilipi 4:8.

11. (a) Ngapi omu eharo lyetu lyokuhara Jehova naJesus nali tu tumangeda tu zuvhise? (b) Ngapi eharo nali tu tumangeda tu vatere wopeke mombungakriste?

¹¹ Eharo lyetu lyokuhara Jesus kututumangeda tu zuvhise nokuronga noupampi. (Mateusa 28:19, 20; Rukasa 4:43) Mosiruwo soMurarero, kuvhura o ture po mawapaiko meparu lyoge yipo o rugane uzuvhisi wokuvatera wonovili 30 ndi 50 mosirugana sokuzuvhisa ndi? Mufisayendi gumwe gonomvhura 84 kwa gazarere asi kapi ta vhuru kurugana uzuvhisi wokuvatera morwa nomvhura ndi ukanguki wendi. Nye vazuvhisi wokukarerera womomukunda gwawo kwa here kumuvatera. Awo ngava mu vatere kougendero nokuhorowora mukunda gokuwapera kuzuvhisira. Ngoyitundwamo, munazinyetu ogo ga sikisire mo novili 30. Kuvhura o vatere gumwe mombungakriste zeni a rugane uzuvhisi wokuvatera mwaNsinano ndi mwaKudumogona ndi? Kapisi natuvenye kuvhura tu rugane uzuvhisi wokuvatera, nye kuvhura tu ruganese siruwo nononkondo detu mokutamununa sirugana setu kwaJehova. Tayi likida asi eharo lyaJesus ali tu tumangeda, ngwendi moomu lya tumangedere Paurusa. Yisinke hena eharo lyaKarunga nali tu tumangeda tu rugane?

12. Yisinke eharo lyaKarunga nali tu tumangeda tu rugane?

¹² Sauvali, eharo lyaKarunga kututumangeda tu hare vanavazinyetu. Mupositoli  Johanesa kwa tjenge asi: “Vakwetu, moomu nye ga tu hara Karunga ngesi, nose atu lihara-hareni.” (1 Johanesa 4:7-11) Yipo nye, nsene tu diva eharo lyaKarunga, ose ngatu hara vanavazinyetu. (1 Johanesa 3:16) Ngapi omu natu va likida eharo?

13. Sihonena musinke ga tulisire po Jesus?

¹³ Sihonena saJesus kutulikida omu natu hara wopeke. Apa ga kere pevhu, nga vatere vantu, unene po ava va linunupikire. Age nga verura vaveli noyirema novatwiku ntani noyipurupuru. (Mateusa 11:4, 5) Jesus nga hafere kuronga vantu ava va here kudiva Karunga, kapisi ngwendi vampitisili womaukarelikarunga. (Johanesa 7:49) Age kwa here vantu wokulinunupika ntani nga rugana unene mokuvavatera.—Mateusa 20:28.

14. Yisinke no rugana mokulikida eharo kovanavazinyetu?

¹⁴ Mosiruwo soMurarero aso siruwo sosiwa sokugazadara ko kuhamena omu natu vatera vanavazinyetu mombungakriste zetu, unene po vakurupe. Kuvhura o va dingure ndi? Kuvhura o va twarere ko nondya ndi o va vatere noyirugana yemembo ndi o va tware kepongo ndi o rugane kumwe nawo mokuzuvhisa ndi? (Resa Rukasa 14:12-14.) Eharo lyaKarunga ngano li ku tumangede o likide eharo kovanavazinyetu!

15. Yisinke twa hepa kudimburura?

¹⁵ Sautatu, eharo lyaJehova kututumangeda tu gusire po vanavazinyetu. Natuvenye kwa pinga nzo nonomfa kwaAdamu, yipo nye kwato gokuvhura kuuyunga asi: “Ame kapi na hepa sizoweseso.” Nampili mukareli gokulimburukwa gwaKarunga nage ga hepa uhwi wosizoweseso. Natuvenye kwa tu gusira po! Morwasinke ya karera nomulyo kuyidimburura? Ose kugwana elimbururo mosifanekeso simwe saJesus.

16, 17. (a) Yisinke natu lirongera ko kosifanekeso saJesus sokuhamena hompa nomukareli gwendi? (b) Konyima zokuteda ko kosifanekeso saJesus, yisinke ono tokomene kurugana?

¹⁶ Jesus kwa geve sifanekeso kuhamena hompa ogu ga gusilire po mukareli gwendi ogu ga mu lililire makongo gomayovi gonoranda. Nye konyima, mukareli ogo kapi ga gusilire po mukareli mukwawo ogu ga mu lililire makongo gonosenda dongandi tupu. Nkenda zahompa ngano za tumangedere mukareli ogo a gusire po mukareli mukwawo. Hompa kwa handukire apa ga zuvhire asi mukareli ogo kapi ana gusire po mukwawo. Age kwa tente asi: “Ove nani o mukareli gomudona. Muntu, kani gusilire po makongo goge morwa ko likwamberere nge. Nani nove nokuvhura si kufira nkenda mukareli mukweni, moomu kani ku fililire ame nkenda?” (Mateusa 18:23-35) Ngwendi hompa gwina, Jehova kwa tu gusira po nonzo dononzi. Yisinke eharo nonkenda zaJehova nayi tu tumangeda tu rugane?

 ¹⁷ Ngomu tuna kuliwapaikira Murarero, twa hepa kulipura asi: ‘Pweli munazinyetu ga koresa nge ndi? Ayo kudigopera nge kumugusira po ndi?’ Nsene yimo, esi kuna kara siruwo sosiwa sokuhonena Jehova, ogu a ‘dongonona po nonzo.’ (Nehemiya 9:17; Episarome 86:5) Nsene tu kwata egano nkenda zaJehova, ose ngatu likida vakwetu nkenda nokuvagusira po kutundilira komutjima. Nsene tu dira kuhara vanavazinyetu ndi tu dire kuvagusira po, Jehova nage kapi nga tu likida eharo ndi a tu gusire po. (Mateusa 6:14, 15) Nampili kuna tu koresa, nsene tu gusira po wopeke, ayo kutuvatera tu kare noruhafo.

18. Ngapi omu eharo lyaKarunga lya vaterere Lily a lididimikire mapuko gaCarol?

¹⁸ Ayo kuvhura kukara udigu kulididimikira mapuko govanavazinyetu. (Resa Vaefeso 4:32; Vakorosi 3:13, 14.) Oyo yiyo ya horokere kwamunazinyetu gedina Lily. ^[1] Age kwa vaterere mufisayendi gedina Carol. Pasihonena, age nga twara Carol nkenye oku ana hara kuza, nokukamurandangera po eyi ana hepa nokumuvatera moyininke yoyinzi. Nampili ngomu Lily nga mu vatere, Carol nkenye apa nga sivana ntani poyiruwo yimwe kapi ya kere ureru kumuvatera. Nye Lily nga demenene koyikara yoyiwa yaCarol ntani ga mu vaterere nomvhura dongandi dogoro Carol ta ya vere makura ta fu. Nampili ngomu Carol ga kere udigu kumuvatera, Lily kwa tanta asi: “Ame kuna kundindira nononkondo mokukamona Carol pevhumbuko. Ame nina hara kukamudiva apa nga ka sikilira mo.” Eharo lyaKarunga kuvhura kututumangeda tu lididimikire mapuko govanavazinyetu nokundindira siruwo apa vantu ngava ka sikilira mo.

19. Ngapi omu ‘uhwi waKarunga wokudira kuvhura kutanta’ nau tu tumangeda?

¹⁹ Yosili, Jehova kwa tu pa ‘uhwi wokudira kuvhura kutanta!’ Ngano tu likide rupandu kouhwi owo. Mosiruwo soMurarero, kuna kara siruwo sosiwa mokuteda ko kwanayinye eyi ga tu ruganena Jehova naJesus. Ngano eharo lyawo li tu tumangede mokuhonena Jesus nokulikida eharo kovanavazinyetu ntani nokuvagusira po kutundilira komutjima.