Rosie kwa tanta asi: “Ame nkenye apa ngani kara nosinka sokupitakanena koyininke eyi yina dili kuhoroka simpe.” Novelise musinke da mu vaterere? Velise zimwe kuzigwana mwaMateusa 6:34 asi: “Yipo nye nomu dilira kulipakera sinka kweyi yomungura, yeeyi olyo lyomungura nalyo nayalyo. Nkenye ezuva kwa kara nayalyo.” Rosie kwa tanta asi nonkango odo daJesus kwa mu vaterere a hageke kukara nosinka seyi ngayi horoka mungura. Age kwa gwederere ko asi: “Kukara nosinka koyininke eyi ya dira kuhoroka simpe, kwa gwedererere komaudigu gange aga na kere nago nare.”

Yasmine kwa lizuvhire asi yinka yina mu vhukire. “Ame ngani lili mazuva gongandi mosivike ntani masiku kapi ngani rara. Ame kwa lizuvhire asi magazaro gomadona kuna kurorora nge unene.” Etjangwa musinke lya mu vaterere? Age kwa tumbura 1 Peturusa 5:7 asi: “Mu peni yinka yeni nayinye, yeeyi age kumupakera mbili.” Yasmine kwa tanta asi: “Ngomu sa pitire siruwo, ame kwa twikilire kukanderera kwaJehova, ano age ga limbwilire makanderero gange. Ame kwa lizuvhire ngwendi kuna gusa nge mudigo. Poyiruwo noyiruwo kuwizira nge magazaro gomadona, nye ngesi na lironga omu nani ga funda po.”

Mudinkantu gomukadona gedina Isabella kwa tanta asi: “Ame kugazara asi nkareso zokurangapeka yininke dogoro ezuva lyokuhulilira kwa kara mohonde morwa yizo va kere nazo otate. Ame ngani rangapeke yininke yomulyo pokupwizumuka tupu ndi ni tarere tivi mevango lyokuyirugana poopo. Azo nkareso zondona, morwa kureta yinka ntani kuninkisa muntu a kare udwa.” Magano aga ga vatera nge kugagwana mwa-2 Timoteusa 2:15, aga aga tanta asi: “Kondja o moneke kwaKarunga asi ove murugani gokulimburukwa, ogu a dili kufa nomuga sirugana sendi.” Isabella kwa tanta asi: “Ame kapi na here Jehova a life nomuga kosirugana sange morwa nkareso zokurangapeka yirugana.” Age ga wapukurura nkareso zendi.

Mokulifana, Kelsey kwa tanta asi: “Ame ngani kara noyirugana nye ngani yi tulire ntere dogoro mezuva lyokuhulilira ntani nina kuyirugana. Ame ngani lili nokudira kurara ntani nokukara nosinka. Kapi ngayi hafesa nge.” Kelsey kwa gwene evatero moYisewe 13:16: “Wonondunge kuhova tanko kugazara ntani ana kurugana, nye vagova kuhanesa enyoko lyawo.” Age kwa faturura asi kuteda ko ketjangwa eli kwa mu rongere asi: “Ya kara nomulyo kutura po mawapaiko komeho zosiruwo. Ngesi na kara nobuke positafura sange ezi ani didilike yirugana, ano eyi kuvatera nge ni liwapaikire kuyirugana, kapisi dogoro ezuva lyokuhulilira.”

Kirsten kwa tanta asi: “Mugara gwange kwa zumbire nge novanona vane.” Etjangwa musinke lya mu vaterere? Yisewe 17:17 kutanta asi: “Vantu namukwawo kulihara. Ano vantu namumbyendi wovagara nani kapisi kwa karera po, va likwafe moudigu?” Kirsten kwa paparere evatero mombungakriste. Ya mu tompokere ndi? Age kwa tanta asi: “Vakaume vange kwa vaterere nge mononkedi dononzi. Vamwe ngava retere nge nondya ntani nonombya. Apa na dirukire novana vange yikando yitatu, vapuli vakwetetu kwa vaterere nge. Ano gumwe kwa vaterere nge ni gwane yirugana. Nkenye apa ame ngani kara kumwe novakaume vange.”

Delphine, vana tumbura nare, nage kwa kondjere nomalizuvho gomukuma. Age kudiworoka apa ga zumbanesere nayinye: “Ame ngani mono vakwetu kuna kara kumwe nomapata gawo, nye ame nyamelike ano kapi ngayi hafesa nge.” Etjangwa eli lya mu vaterere kwa kere Episarome 68:6: “Age kugava embo komulike a kare mo.” Age kwa faturura asi: “Ame na yi divire asi velise ezi kapi za tamba tupu kembo. Nye na ya kwete egano asi Karunga kutupa embo lyopampepo, omu mwa hamena elikwatakano lyosili novantu ava va hara Jehova. Na ya yi dimbwilire asi pokulikwatakana novakwetu ntudi na hepa kulikwatakana naJehova muhowo. Nye Episarome 37:4 eli ali tanta asi: ‘Hafa mwaHOMPA, age nga ku pe eyi gwa tokomena mutjima goge,’ kwa vaterere nge.”

Age kwa hagesa asi: “Na yi dimbwilire asi na hepere kukara nelikwatakano lyenene naJehova. Aso kwa kere sininke sosiwa po. Yipo na tjenge elikwamo lyoyininke eyi natu hafera kumwe novakwetu, yipo ni tulise po vakaume ava va hara Jehova. Ame na lirongere kumona yikara yoyiwa mwava wopeke nokunyokera po kudemenena komapuko gawo.”

Yosili, vantu ava ava karere Karunga nawo kapi va sikilira mo. Nombangi daJehova nawo kuligwanekera nomaudigu ngwendi vantu navenye. Nye edeuro lyomoBibeli kuvatumangeda va vatere wopeke moomu vana kuvhulira. Ayo ya wapa kutulisa po vakaume vangoso. Nye kuvhura magano gomoBibeli ga ku vatere komaudigu aga no dira kuvhura kukohonona po ngesi, ngwendi uvera wokudira kuveruka noruguwo ndi?