Rose kwa tanta asi: “Ame kwa kara nouvera womouruvi ou au zuvhisa nge kukora nkenye apa. Kudigopera nge kurugana yininke.” Poyiruwo yimwe, age kapi a vhuru kurugana elirongo lyendi lyoBibeli morwa uvera wendi. Nye nonkango daJesus domwaMateusa 19:26 da mu vaterere sili, edi adi tanta asi: “KwaKarunga nayinye ureru.” Rose ga ya dimbwilire nkedi zimwe ezi za mu vaterere a lironge. Age nga purakene koBibeli ezi va kwateka ntani komakwateko goyimbapiratjangwa yoBibeli. * Age kwa tanta asi: “Makwateko aga ga vatera nge ni nkondopeke elikwatakano lyange naKarunga.”

Apa Rose nga guwu morwa kudira kuvhura kusikisa mo eyi ga here kurugana, etjangwa lyomo-2 Vakolinte 8:12 eli ali tanta asi: “Nye eharo lyokugava nsene polili, Karunga kupanda uhwi weni moomu mwa yi wekera, kapisi neyi mwa dira kuweka,” ngali mu korangeda. Nonkango odo kwa mu diworokesere asi Karunga kuhafera yirugana yendi morwa age kuyirugana kutundilira komutjima nononkondo dendi nadinye.

Delphine ogu vana tumbura nare, kwa tanta asi: “Konyima zapa ga fire munwange gomukadona gonomvhura 18, kwa guvisire nge sili unene, kwa lizuvhire ngwendi ni fe.” Nampili ngoso, Episarome 94:19 eli ali tanta asi: “Nsene nina kara noyinka momutjima gwange, makura ove to gu tendekere nge,” kwa mu hengagwidire. Age kwa tanta hena asi: “Ame kukanderera kwaJehova a likide nge eyi nani rugana yipo ni lididimikire kukora.”

Yipo ga ya litulire mo unene mosirugana sokuzuvhisa. Age kwa lihetakanesere mwene kositjekeneso sokuteka, nampili si teke aso simpe kuvhura kusitjekenesa. Mokulifana, nampili ngomu ga lizuvhire ngwendi kuna teka, simpe ga lirongere asi kuvhura a vatere wopeke. Age kwa tanta asi: “Apa ani ruganesa magano gomoBibeli mokukorangeda ava ani lirongo nawo, ayo kulikida asi yizo nkedi a ruganesa Jehova mokukorangeda nge.” Age kwa tjenge madina govantu vamwe ava va tumbura moBibeli ava va kere noruguwo ngwendi rwendi. Age ga yi dimbwilire asi: “Vantu owo ngava kanderere nkenye apa.” Ntani ga ya lirongere asi: “Mokunika asi a lididimikire maudigu ntudi ga hepa kuresa Bibeli.”

Apa Delphine nga lirongo Bibeli nga demenene kweyi yokomeho, kapisi eyi ya pita nare. Ehuguvaro eli va tumbura moYirugana 24:15 asi: “Vantu navenye, va kare vawa ndi vadona, ngava va pindura koufe,” kwa mu hengagwidire. Age ga yi pulire sili asi Jehova nga ka vhumbura munwendi ndi? Delphine mwene kwa tanta asi: “Ngani ka mu mona hena apa Jehova nga ka mu vhumbura. Ame kumugazara omu tuna kara nage moparadisa, ame kuna mu kwaterere ngwendi paapa na mu hampurukire.”