VAMWE KUTANTA ASI HAWE. Ndokotora gumwe kwa hetakanesere kuruganesa mavyukiso gomoBibeli asi kwa lifana nokuruganesa buke zomauzera zokoyiha yomvhura 1920 mokurongesa ko vanona. Murwanesi gumwe kuvhura a pure asi kuvhura o ruganese buke zomauzera zonokompiuta danare konokompiuta donompe ndi? Mokugwederera ko, vamwe kutara mavyukiso gomoBibeli asi ga pwa mulyo.

Mouzuni ou una vhuka yikwakonentu, ayo simpe hepero kukwama mavyukiso gomobuke zanare ndi? Naina, mapukururo nomavyukiso gomape manzi gana kupitira koIntaneta. Malikwamo gokotivi kuhanesa ediwo lyava va lironga kuhamena nkareso zovantu nomu no paruka. Ntani yitora yonobuke kurandesa nobuke edi va tjanga asi “Kuvatera vantu komaudigu gawo,” nongesefa edi kugwanena mo yimaliwa yoyinzi.

Mokumona asi naina ureru kugwana mavyukiso, hepero sili tu rese Bibeli ezi va tjenge nomvhura 2 000 da ka pita ndi? Nsene varwanesi va uyunga asi kukwama mavyukiso gomoBibeli kuna kara ngwendi kuna kukwama buke zomauzera ganare mevango lyokukwama zomauzera gomape, olyo kuna kara egano lyepuko. Yikwakonentu kurunduruka nkenye apa, nye yihepwa yovantu kapi ayi runduruka. Vantu va hepa simpe kudiva sitambo separu nomu nava gwana ruhafo nepopero ntani nomu nava kara nombili nava vemepata novakaume.

Nampili ngomu Bibeli za kara buke zanare, azo simpe kugava mavyukiso gomawa koyihepwa yovantu. Azo kwa zi retesa po Musiti gwetu. Ntani kuvhura zi tu pitisire mwankenye ukaro wemeparu, nokuturonga omu natu lididimikira maudigu. (2 Timoteusa 3:16, 17) Ntani hena, twa hepa mavyukiso gazo nkenye apa, morwa ago mulyo. Bibeli zene kutanta asi: “Nonkango daKarunga kwa kara nomwenyo.”—Vahebeli 4:12.

Kuvhura tu huguvare eyi azi tanta Bibeli ndi? Mavyukiso gazo twa ga hepa sili naina ndi? Sitambo sosifo esi soRuhungu, kuna kara mokukuvatera o gwane malimbururo komapuro aga, yifo eyi ngayi kwama ko nayo ngayi ruganesa nkedi zokulifana.