Delphine vana tumbura mosirongwa sa ka pita, age nga nu unene marovhu morwa yinka. Bibeli kapi za nyokesa kumakera marovhu, nye za tanta asi: “Nokulipakerera si novantu ava ava nu unene vhinyu.” (Yisewe 23:20) Kuruganesa marovhu momudona kukundama ukanguki nokutezesa po nonkwara ntani vantu mamiliyona kufa nkenye mvhura. Maudigu aga kuvhura kuganyokera po nsene vantu va kwama mavyukiso gomoBibeli.

Delphine ga yi rugene. Age kwa tanta asi: “Na yi dimbwilire asi marovhu kapi ga kohwenene po yinka yange. Ame kwa kweme evyukiso lya kara moVafilipi 4:6, 7, eli ali tanta asi: ‘Walye omu kara nosinka soyuma. Nye momakanderero geni omu hundire nkenye eyi muna hepa kwaKarunga.’ Ame kwa tanterere Karunga malizuvho gange, kukwatera mo ehandu nonyengo nokuguva ntani kwa mu hundilire a vatere nge ni lizuvhe ko hansa. Nkenye ngurangura, ame kwa tokomenene kunyokera po malizuvho ogo gomadona. Nkareso zokukanderera kwaJehova za vaterere nge ni demenene kweyi na kere nayo mevango lyokudemenena kweyi na dilire kukara nayo. Yipo na tokwere kudira marovhu. Ruhafo oru na gwene, kwa vaterere nge ni dire kutengwira konkareso ozo.”

Ruhonda kuretesa po ruguwo nokudompa mutjima. Nye magano gomoBibeli kuvhura kutuvatera tu nyokere po kuliharesa nokutarera mafano goruhonda aga aga twaredesa kokuhondera. Mudinkantu gedina Samwere kwa tanta asi: “Ureru kuliharesa. Poyiruwo yimwe, ame kapi na here muntu ogo nye tani ya yi dimburura asi ana hara nge, name tani mu liharesa.” Vantu ngava rundire Samwere asi age kuliharesa nkenye apa, ano eyi ya mu ninkisire a yi ruganene mowina. Nkareso ozo kapi nga zi mu hafesa. Age kwa tanta asi: “Kuliharesa kuretesa po nkareso zokuliharera nyamoge uwa.”

Samwere kwa resere sirongwa sovadinkantu koIntaneta zetu jw.org. Ntani age kwa tedere Yisewe 20:11 ezi azi tanta asi: “Nomunona kulihorora moyirugana yendi, mwayo kuvhura kumona asi muhungami ndi muwa.” Ngapi lya mu vaterere? Samwere ga yi dimbwilire asi kuliharesa kapisi sininke souhunga ndi sosiwa. Age kwa tanta asi: “Nsene o tameka kuliharesa moudinkatu, ngo tunga po nkareso ezi ngazi ka kundama momudona nonkwara doge. Yipo na gazadarere ko omu nga ka lizuvha mukadange nsene nga ka mona nge kuna kuliharesa kovakadi vapeke. Eyi ya vaterere nge ni dimburure asi nkareso ozo ndona. Ureru kugwira monkareso zangoso, nye kapisi yininke youhunga.” Samwere ga rundwilire nkareso zendi. Kunyokera po nkareso ozo kwa mu vaterere a nyokere po ruhonda.

Antonio kwa gwililire moruhonda: Morwa kwa kere mupika gokutarera mafano goruhonda. Nampili ngomu ga kwere, age ga ya gwililire hena monkareso ozo zondona. Age kwa tanta asi 1 Peturusa 5:8, kwa vatera nge. Azo kutanta asi: “Omu vangarare oku muna rungarara, yeeyi nkore zeni, Satana, kugendagura ngwendi nyime gokununga, a papare ogu na lipapagwira.” Antonio kwa tanta hena asi: “Mafano goruhonda gana vhuka unene mouzuni ou, ago ureru kukakatera monondunge. Velise ozo kwa vatera nge ni gazadare ko kuhamena ntundiliro zomaheteko ogo. Ame na lirongere kudimburura usimbu asi mafano goruhonda kutundilira kwaSatana. Ngesi na yi diva asi Jehova gelike gokuvhura kuvatera nge ni vangarare yipo ni funde po eyi nayi kundama nondunge dange nomutjima gwange nononkwara dange.” Antonio ga gwene evatero eli ga hepere ntani ga sigire nkareso zendi zondona. Eyi ya mu vaterere a nyokere po nampili maudigu gamwe.

Bibeli za gava mavyukiso aga naga tu vatera tu nyokere po maudigu gamwe. Nye ngapi kuhamena maudigu aga ono kuligwanekera nago nkenye apa? Tu konakoneni omu nonkango daKarunga nadi tu vatera tu kohonone po maudigu gangoso.