Nsene ono hara kudiva muntu ove pomuhowo kumupura asi: “Edina lyoge yilye?” Nsene o pura Karunga epuro olyo, ngapi na ku limburura?

“Ame nyame Jehova. Olyo yilyo edina lyange.”—Jesaya 42:8, NW.

Edina olyo kwa kara nomulyo kwaKarunga mwene. Kwato ogu ga pa Karunga edina eli, mwene ga liliruka. Jehova kwa tanta asi: “Eli yilyo edina lyange lyanarunye, alyo yilyo sidiworokeso sange somaruvharo geni nagenye.” (Exodus 3:15) MoBibeli, edina lyaKarunga kwa li ruganesa yikando yoyinzi kupitakana omu va ruganesa yitumbwisiso ngwendi, Munankondo, Guhyetu, Hompa ndi Karunga, ntani kupitakana madina ngwendi Abirahamu, Mosesa, Ndafita ndi Jesus. Ntani Jehova kuna hara asi edina lyendi va li dive navenye. Bibeli kutanta asi: “Yipo vantu ngava dive asi nyove, gedina Jehova, nyovelike Mupangeli goMunene gouzuni mudima.”—Episarome 83:18, King James Version.

Edina olyo mulyo kwaJesus. Mekanderero lyaGuhyetu gemeguru, Jesus kwa rongere vasikuli vendi va kanderere kwaKarunga asi: “Edina lyoge ava li pongore.” (Mateusa 6:9) Jesus mwene kwa kandererere kwaKarunga asi: “Tate, yererepeka edina lyoge.” (Johanesa 12:28) Jesus kwa yererepekere ndi kwa fumadekere edina lyaKarunga, yiyo ga uyungilire mekanderero asi: “Ame na va divisa edina lyoge, yiyo ngani li va divisa nokomeho.”—Johanesa 17:26.

Edina olyo mulyo kwava va diva Karunga: Vakareli vaKarunga woposiruwo sanare, va kwete egano  asi epopero nezoworo lyawo kwa korerere mokudiva edina lyaKarunga. Bibeli kutanta asi: “Edina lyaHOMPA kwa fana ruhungu rwa kora, omu a dukire muhungami a yoworoke.” (Yisewe 18:10) “Navenye ava ngava kuga kwaHOMPA a va kwafe, ngava paruka.” (Jowera 2:32) Bibeli kulikida asi vantu ava ava karere Karunga kuvadimbwilisa kedina lyendi. “Nkenye muhoko kutongamena tagu limburukwa karunga gwago, nye ose ngatu tongamena, tatu limburukwa HOMPA Karunga gwetu narunye nanarunye.”—Mika 4:5; Yirugana 15:14.

Edina olyo kuhangura Karunga kovakarunga wopeke. Valirongi wovanzi kwa uyunga asi edina lyaKarunga kutanta asi: “Age kuninka yi kare po.” Jehova Karunga kwa horwere eyi ali tanta edina lyendi apa ga tanterere Mosesa asi: “AME NYAME.” (Exodus 3:14) MoRuhebeli nonkango odo kwa di toroka asi: “Ame ngani kara eyi nina hara kukara.” Yipo nye, edina lyaKarunga kutanta yoyinzi kupitakana tupu asi age Musiti ogu ga sita yininke nayinye. Alyo kusingonona asi age kuvhura kukara nkenye eyi ntani kuvhura a ninke yisitwa yendi yi kare nkenye eyi ana hara yipo a sikise mo sitambo sendi. Nampili ngomu yitumbwisiso yendi ayi singonona unankondo noupangeli wendi, edina lyendi yilyo lyelike ali likida omu ga kara neyi a vhuru kurugana.

Edina olyo kulikida asi ga tu hara. Eyi ali tanta kulikida asi age kwa hara yisitwa yendi nayinye, kukwatera mo vantu. Karunga ana hara tu mu dive yiyo ga divisira edina lyendi. Yiyo ga li tu divisira, twa hana kulimupura. Yosili, Karunga kuna hara tu mu tare ngoMuntu ogu natu vhura kutulisa po ukaume nendi.—Episarome 73:28.

Kuruganesa edina lyaKarunga kulikida asi twa mu hara. Tu ninke asi to pura muntu ogu ono hara a kare kaume koge a ku zigidise kedina lyoge. Ngapi no lizuvha nsene a nyoka kuruganesa edina lyoge? Ove nampo ngo lipura nsene sili ana hara kukara kaume koge. Ya lifana naKarunga. Jehova kwa divisa edina lyendi kovantu ntani ana hara tu li ruganese. Apa atu li ruganesa, ayo kulikida asi tuna hara kutulisa po ukaume naJehova. Morwa age ga diva ‘ava ava mu tjira oku tava fumadeke’ edina lyendi.—Marakiya 3:16.

Nsene tuna hara kudiva Karunga, pomuhowo twa hepa kudiva edina lyendi. Nye kapisi tu hagere poopo. Twa hepa kumudiva nawa kupitakana tupu kudiva edina lyendi. Twa hepa kudiva yikara eyi ga kara nayo.