Dogoro papa, eyi tuna lirongo moyirongwa eyi yina ka pita yina tu vatere tu gwane elimbururo kepuro eli asi: Yilye Karunga? Tuna lirongo moBibeli edina lyaKarunga, Jehova, ntani asi sikara sendi sosinene po kuna kara eharo. Ntani hena tuna konakona eyi ga rugana neyi nga ka rugana komeho yipo vantu va gwanene mo uwa. Nampili ngomu twa hepa simpe kulironga yoyinzi kuhamena Karunga nye kuvhura o lipure asi: ‘Uwa musinke no gwanena mo pokudiva Karunga?’

Jehova kwa tumbwidira asi ‘nsene o mu papara nonomutjima goge nagunye ngo mu gwana.’ (Deuteronomium 4:29) Gazara ko tupu kouhwi ou una kukundindira; ngomu ono kupapara nokudiva Karunga, yimo no ‘likwata ukwawo’ nendi! (Episarome 25:14) Ngapi no gwanena mo uwa moukaume wangoso?

Ruhafo rosili. Jehova kwa mu singonona asi Karunga goruhafo. Kukara pepi naKarunga nokukwama nompango dendi ngayi ku retera ruhafo rosili, oru ngaru ku retera mauwa pamalizuvho nopamagazaro ntani parutu. (Episarome 33:12) Ntani ngayi ku vatera o kare noruhafo meparu nokunyokera po mparukiso zondona nokutunga po nkareso zongwa ntani ukaume wouwa nava wopeke. Ove ngo kwatesa ko muepisarome ogu ga uyungire asi: “Yoyiwa po kwange ame, yokukara pepi naKarunga!”—Episarome 73:28.

Kukupakera mbili. Jehova ga tumbwidira vakareli vendi asi: “Ngani ku pukurura oku tani ku takamesa.” (Episarome 32:8) Eyi kutanta asi Jehova kupakera mbili nkenye mukareli gwendi pamundinda ntani kumupa nkenye eyi ga hepa. (Episarome 139:1, 2) Moomu ono kutura po ukaume naJehova, yimo ngo mona asi age kukuvatera nkenye apa.

Meho zongwa. Mokukuvatera o kare ngesi noruhafo meparu, Jehova Karunga ga ku pa mpito zokukagwana meho zongwa. (Jesaya 48:17, 18) Bibeli kutanta asi: “Mwenyo gwanarunye yigo ogu asi va ku dive asi nyovelike Karunga gosili, nogu wa tuma, Jesus Kristusa.” (Johanesa 17:3) Momazuva aga gomaudigu, ehuguvaro eli ga tu pa Karunga kuvhura li kare ngwendi sisikameso sa hana “malilimbo sa kora.”—Vahebeli 6:19.

Eyi kuna kara yihonena yimwe yongandi omu natu diva nawa Karunga ntani nomu natu tulisa po ukaume nage. Komauzera gomanzi, kuvhura o zogere nagumwe goNombangi daJehova ndi o tare ko-jw.org/kwn.