Edina lyaKarunga yilyo yilye? Karunga mwene kutanta asi: “Ame nyame Jehova. Olyo yilyo edina lyange.” (Jesaya 42:8, NW) Edina lyaKarunga kwa monekere moBibeli konyara yikando 7 000. Sinzi soNobibeli kwa gusa mo edina eli nokupinganesera po situmbwisiso, ngwendi “Hompa.” Karunga ana hara o kare kaume kendi, age kuna kukukorangeda o ‘kuge edina’ lyendi.—Varoma 10:13.

Yitumbwisiso yaJehova. Bibeli kwa ruganesa yitumbwisiso ngwendi “Karunga,” “Munakondo nadinye,” “Musiti,” “Guhya,” “Hompa,” ntani “Mupangeli gwanayinye.” MoBibeli kwa tjanga mo makanderero gomanzi omu va ruganesa edina Jehova ndi yitumbwisiso yendi.—Ndaniyera 9:4.

 Omu ga fana Karunga. Karunga mpepo. (Johanesa 4:24) Bibeli kutanta asi “nagumwe si ga mona Karunga.” (Johanesa 1:18) Azo kulikida hena omu a lizuvhu Karunga. Vantu kuvhura kumuguvisa, ndi ‘kumuhafesa.’—Yisewe 27:11; Episarome 78:40, 41.

Yikara yaKarunga. Karunga kapi ga paka mpongo. (Yirugana 10:34, 35) Age “mufenkenda age Karunga gombili noMudidimiki. Uwa wendi unzi, age Mulimburukwi.” (Exodus 34:6, 7) Nye pwa kara yikara yendi yine eyi ayi tetukisa.

Nonkondo. Morwa age “Karunga Munankondo nadinye,” ga kara nononkondo dononene dokusikisa mo nkenye eyi a tumbwidire.—Genesis 17:1.

Unongo. Unongo waKarunga wa pitakana maunongo nagenye. Yiyo nye Bibeli azi tantere asi age “munandunge gelike thi.”—Varoma 16:27.

Uhungami. Karunga nkenye apa kurugana eyi ya hungama. Nayinye a rugana kwa “vyuka” ntani kwa “hungama.”—Deuteronomium 32:4.

Eharo. Bibeli kutanta asi “Karunga yige eharo.” (1 Johanesa 4:8) Karunga kapi tupu a likida eharo, nye age yige eharo. Nkenye eyi a rugana, kuyirugana neharo ntani ose kugwanena mo mauwa.

Elikwatakano lyaKarunga novantu. Karunga yige Guhyetu gemeguru geharo. (Mateusa 6:9) Nsene tu pura mwendi, ose ngatu kara vakaume vendi. (Episarome 25:14) Karunga kuna hara o mu hedere kupitira mekanderero ntani nokumupa ‘yinka yoge nayinye, yeeyi age kukupakera mbili.’—1 Peturusa 5:7; Jakopo 4:8.

Jesus kapisi Karunga. Jesus ga likarera, yige gelike Karunga ga sitire pwagelike. Yiyo Bibeli azi mu tumbwire asi MunwaKarunga. (Johanesa 1:14) Apa Jehova ga mene kusita Jesus, age kwa ruganesere mbeli zendi Jesus “ngonkurungu” mokusita yisitwa nayinye.—Yisewe 8:30, 31; Vakorosi 1:15, 16.

 Jesus Kristusa kapi ga tente asi age Karunga. Nye age kwa tente asi: “Mwendi na tunda, ano age yige ga tuma nge.” (Johanesa 7:29) Apa Jesus ga uyungire nomurongwa gwendi gumwe, age kwa tumbwire Jehova asi “kwaTate kwaGuhyeni, kwaKarunga gwange, Karunga gweni.” (Johanesa 20:17) Konyima zapa Jesus ga fire, Jehova Karunga kwa mu pindwire koufe a ka parukire meguru ntani nokumupa nonkondo.—Mateusa 28:18; Yirugana 2:32, 33.

Jesus Kristusa kuvhura a ku vatere o hedere pepi naKarunga

Jesus kwa wizire pevhu mokuyaturonga usili kuhamena Guhwe. Jehova mwene ga uyungire kuhamena Jesus asi: “Ogu yige Munwange na hara. Omu mu zuvhe.” (Marukusa 9:7) Jesus ga diva nawa Karunga kupitakana nkenye ogu. Age kwa tente asi: “Nagumwe si ga diva Guhwe, ntudi Muna no, nogu ga yi harera kuyihorwera Muna.”—Rukasa 10:22.

Jesus kulikida nawa yikara yaKarunga. Jesus kwa honenene nawa-nawa yikara yoGuhwe, yiyo ga tente asi: “Ogu ga mona nge, ga mona hena Tate.” (Johanesa 14:9) Jesus kwa hedesere vantu kwaKarunga, pokuhonena eharo lyoGuhwe mononkango nomoyirugana. Age kwa tente asi: “Nyame nzira nousili nomwenyo. Nagumwe si a wiza kwaTate, age ga hana kupitira pwange.” (Johanesa 14:6) Ntani hena kwa tente asi: ‘Vakandereli wosili ngava kanderera Tate moMpepo nomousili, yeeyi vakandereli vangoso yiwo va hara oTate.’ (Johanesa 4:23) Gazadara ko tupu! Jehova kuna kupapara vantu ngwendi nyove ava vana hara kudiva usili kumuhamena.