Usili kuhamena meho
Wa lipura rumwe omu ngali ka fana eparu komeho ndi? Bibeli kututantera kuhamena yihorokwa yomulyo eyi nayi ka horoka ntaantani ntani nomu ngayi ka kundama vantu navenye pevhu.
Jesus kwa fatwilire omu ngatu yi diva ‘asi Uhompa waKarunga pepi una kara.’ (Rukasa 21:31) Age kwa tente asi ngaku kara yita, makankamo gevhu gomanene, erumbu ntani mauvera, eyi tuna kumona yina kuhoroka.—Rukasa 21:10-17.
Bibeli kututantera asi simwe soyininke eyi ngayi horoka ‘pomazuva gopouhura’ gepangero lyovantu, kuna kara asi vantu ngava donapa unene. Resa eyi va tumbura mwa-2 Timoteusa 3:1-5. Pokumona nonkareso odo, nove no yi kwatesa ko asi uporofete woBibeli kuna kuliza neyi yina kuhoroka ngesi.
Yisinke yina kutanta eyi? Eyi kuna kutanta asi Uhompa waKarunga ou ngau ya retesa po marunduruko gomanene aga ngaga kundama eparu lyovantu monaruwa pepi una kara. (Rukasa 21:36) MoBibeli, Karunga kwa tumbwidira asi nga ka wapukurura evhu ntani vantu ava ngava ka tunga po ngava ka hafera eparu. Tara yimwe eyi ga tumbwidira.
EPANGERO LYEWA
“Makura tava mu pe [Jesus] epangero nefumano nononkondo dosiuhompa, asi vantu wonomuhoko nadinye nomarudi nomaraka nagenye va mu ruganene. Epangero lyendi ngali karerera, ano untungi wendi kapi ngau haga po.”—NDANIYERA 7:14.
Yisinke ayi tanta? Kutanta asi ngo ka hafera eparu mepangero lyaKarunga eli nga ka pangera Munwendi ngaHompa.
UKANGUKI WOUWA
“Nagumwe si gomosirongo esi twa kara nga sivana asi ta vere.”—JESAYA 33:24.
Yisinke ayi tanta? Kutanta asi kapi ngo ka vera ndi o ka kare sirema ntani ngo ka paruka narunye.
MBILI ZENE-ZENE
“Age kwa hageka yita mouzuni mudima.”—EPISAROME 46:9.
Yisinke ayi tanta? Kutanta asi kapi ngaku kara yita ntani ruhepo oru ayi retesa po yita.
VANTU WOVAWA TUPU NGAVA KA TUNGA PEVHU
“Mudinikarunga ta dongonoka po; . . . Valinunupiki yiwo ngava hingira sirongo.”—EPISAROME 37:10, 11.
Yisinke ayi tanta? Kutanta asi kapi ngaku kara vantu wovadona, vaava tupu ava limburukwa Karunga yiwo ngava ka tunga pevhu.
EVHU NALINYE NGALI KARA PARADISA
“Vantu ngava litungira mambo omu ngava kara – nagumwe si ogu nga va ruganesa. Awo ngava tapeka moyipata, tava lipanda vhinyu.”—JESAYA 65:21-22.
Yisinke ayi tanta? Kutanta asi evhu nalinye ngali ka fuura sili. Karunga nga ka sikisa mo ekanderero lyetu eli asi mpango zoge ava zi sikise mo “pevhu.”—Mateusa 6:10.
