“Nsene ngomu hundilira yuma kwaTate medina lyange, nga yi mu pa.”​—Johanesa 16:23.

Nonkango daJesus kulikida nawa-nawa asi Jehova ana hara tu kanderere kwendi kupitira medina lyaJesus Kristusa, nye kapisi momafano ndi movapongoki ndi movaengeli ndi movadimu. Apa atu kanderere kwaKarunga kupitira medina lyaJesus, ayo kulikida asi twa dimburura situmbukira saJesus. Jesus kwa tanta asi: “Nagumwe si a wiza kwaTate, age ga hana kupitira pwange.”—Johanesa 14:6.

“Omu mu tantere maudigu geni nagenye.”​—Episarome 62:8.

Nsene tatu kanderere kwaJehova twa hepa kuuyunga moomu atu uyunga novaguhya vetu. Kapisi tu rese makanderero mobuke ndi tu ga kwate momutwe, nye twa hepa kuuyunga nage monkedi zefumadeko ntani kutundilira komutjima.

“Ta tu zuvhu ntene tu mu hundira eyi yokuliza nompango zendi.”​—1 Johanesa 5:14.

MoBibeli, Jehova Karunga kututantera eyi nga ka tu ruganena ntani neyi ana hara tu mu ruganene. Mokuninka asi Karunga a tambure makanderero getu, twa hepa kukanderera ‘kuliza nompango zendi.’ Mokuyisikisa mo oyo, twa hepa kulironga Bibeli yipo tu mu dive nawa. Nsene tu yi rugana, nga hafera makanderero getu.

Kanderera kuhamena yihepwa yopanyama. Nsene tatu kanderere kwaKarunga kuvhura tu tumbure yihepwa yetu ngwendi nondya, yikoverero ntani mararo. Ntani kuvhura tu hundire Karunga nondunge yipo tu ture po matokoro gomawa ntani a tu pe ko nonkondo tu lididimikire maudigu. Kuvhura hena tu mu hundire a gwederere kepuro lyetu, a tu dongwenene po ntani a tu vatere.—Rukasa 11:3, 4, 13; Jakopo 1:5, 17.

Kanderera po vakweni. Vakondi kuhafa nsene vana vawo va lihara-hara. Jehova nage kwa hara vana vendi vepevhu va lihara-hare. Ayo ya wapa kukanderera po mulikwali gwetu, vepata lyetu, vana vetu ntani vakaume vetu. Murongwa Jakopo kwa tjenge asi: ‘Likanderere-kanderereni po.’—Jakopo 5:16.

Likida rupandu. Bibeli kwa uyunga kuhamena Musiti gwetu asi: ‘Ga lihorora pokurugana yoyiwa, pokumurokesera mvhura, ta mu pe ewogo nonondya, nomutjima deni di hafe.’ (Yirugana 14:17) Nsene tu gazara nayinye eyi ga tu ruganena, ayo ngayi tu tumangeda tu mu pandure kupitira mekanderero. Ntani hena twa hepa kulikida rupandu kwaKarunga kupitira monkareso zetu.—Vakorosi 3:15.

Morwa kudira kugwana poopo malimbururo komakanderero getu, ayo kuvhura kutudompesa mutjima. Makura ngoso kuvhura tu tante asi Karunga kapi a tu pakere mbili ndi? Hawe! Konakona yihorokwa eyi yina kulikida asi twa hepa kutwikira kukanderera.

Steve, vana tumbura mosirongwa sokuhova, kwa tanta asi: “Ngano kapi na twikilire kukanderera, ngano na zumbanesere ehuguvaro ntani noruhafo.” Yisinke ya mu vaterere? Apa ga tamekere kulironga Bibeli ga ya dimdwilire mulyo gokukanderera neyi ga hepera kukovekeda kukanderera. Age kwa gweda ko asi: “Ame kukanderera kwaKarunga ni mu pandure kevatero eli ani gwana kovakaume vange wokuhara. Ame ngesi nina hafa kupitakana pwanare.”

Ngapi kuhamena Jenny, ogu ga lizuvhire asi Karunga kapi ga wapera kupurakena komakanderero gendi? Age kwa tanta asi: “Apa ngani lizuvhu ngwendi kwato mulyo, ame ngani likwambere Karunga a vatere nge ni kwate egano eyi nina ku lizuvhira ngoso.” Ngapi ya mu vaterere oyo? Age kwa gweda ko asi: “Kuuyunga naKarunga kwa vaterere nge ni litare nyamwange ngamoomu a tara nge Karunga, nokudimburura asi age kapi a pangura nge kuliza nomu ani yi gazarere. Ayo hena ya vatera nge ni dire kuligava.” Yitundwamo? “Makanderero kwa vatera nge ni tare Jehova ngomuntu, ngaguhya geharo gonkenda ntani kaume, ogu a vatere nge nkenye apa nsene ni hetekera ko kurugana eyi ga hara.”

Konakona hena sihorokwa saIsabel. Apa ga kere nomarutu gavali, vandokotora kwa mu tanterere asi munendi nga mu hampuruka age sirema. Eyi kwa mu guvisire sili. Vamwe kwa mu pere magano asi a liguse ezimo. Age kwa tanta asi: “Kukora oku na lizuvhire kwa ninkisire nge ni lizuvhe ngwendi ni fe.” Yisinke ga rugene? “Ame kwa kovekedere kukanderera kwaKarunga a vatere nge.” Konyima ga ya hampurukire munona gomumati gosirema gedina Gerard. Ngoso Isabel ga lizuvhire asi Karunga ana limburura makanderero gendi ndi? Nhi! Monkedi musinke? Age kwa tanta asi: “Apa ani mono munange gonomvhura 14, kuna kuhafera eparu nampili ngomu ga kara sirema, ayo kuninkisa nge ni uyunge asi age elimbururo lyewa po komakanderero gange ntani etungiko lyenene eli ga pa nge Jehova Karunga.”

Nonkango odo donongwa kutuninkisa tu diworoke nonkango edi demepisarome asi: “HOMPA, ove wa diva magazaro govahepwe; ove ngo koreka nomutjima dawo, ngo tege ko kutwi koge komakanderero gawo.” (Episarome 10:17) Ee, nonkango musi kouwa dokututumangeda tu kovekede kukanderera!

MoBibeli kwa tjanga mo makanderero gomanzi gaJesus. Ekanderero eli lya divikwa kuna kara eli ga rongere varongwa vendi. Yisinke natu lirongera ko?