Karunga kuzuvha makanderero getu ndi?
Wa lipura rumwe nsene asi Karunga kukuzuvha apa o kanderere ndi? Nsene yimo o lizuvhu ngoso, kapisi nyovelike. Wovanzi kwa kanderera kwaKarunga a va vatere komaudigu gawo, nye simpe ha ga karera. Ngoso kutanta asi Karunga kapi a pakere mbili makanderero getu ndi? Hawe! Bibeli kutupa ehuguvaro asi Karunga kutupurakena apa atu kanderere kwendi monkedi zouhunga. Konakona eyi za uyunga ko Bibeli.
KARUNGA KUPURAKENA.
“Ove kuzuvha makanderero. Vantu mudima ngava wiza koge.”—Episarome 65:2.
Vamwe kwa tanta asi apa ava kanderere awo kulizuvha ko hansa, nampili ngomu va dira kuyipura asi kweli ogu a purakene makanderero. Nye ekanderero kapisi sininke tupu esi a si tu vatere tu lizuvhe ko hansa yipo tu vhure kulididimikira maudigu getu. Bibeli kutanta asi Jehova * “kwa kara pepi nava navenye ava mu zigida, ava ava mu zigida mousili. . . . Age kuzuvha nkugo zawo.”—Episarome 145:18, 19.
Yiyo nye, twa hepera kukara nehuguvaro asi Jehova Karunga kuzuvha makanderero govakareli vendi. Age kwa tanta asi: “Makura ngomu zigida nge, ngomu wiza tomu ya kanderere nge, ano ame tani mu limburura.”—Jeremiya 29:12.
KARUNGA ANA HARA O KANDERERE KWENDI.
“Omu kanderere narunye.”—Varoma 12:12.
Bibeli kutukorangeda tu “kanderere nkenye apa” ntani asi tu “kanderere narunye.” Yosili, Jehova Karunga ana hara tu kanderere kwendi.—1 Vatesaronika 5:17; Vaefeso 6:18.
Morwasinke ana harere Karunga tu kanderere kwendi? Pasihonena: Nkenye mukurona kwa harera munendi a uyunge asi: “Tate, vatereni nge.” Guhya kuvhura a dive eyi ana hepa munendi ndi omu ana kulizuvha, nye apa na zuvha nonkango odo, tayi mu likida asi munendi ga mu huguvara ntani ga kara nelikwatakano nendi. Mokulifana, apa atu kanderere kwaJehova Karunga, ose kulikida asi twa mu huguvara ntani tuna hara kumuhedera pepi.—Yisewe 15:8; Jakopo 4:8.
KARUNGA KUKUPAKERA MBILI.
“Mu peni yinka yeni nayinye, yeeyi age kumupakera mbili.”—1 Peturusa 5:7.
Karunga kuna hara tu kanderere kwendi morwa ga tu hara ntani kutupakera mbili. Age ga diva yinka nomaudigu getu ntani ana hara a tu vatere.
Eparu lyendi nalinye, hompa Ndafita nga kanderere kwaJehova Karunga a mu vatere ntani nga mu tantere magazaro nomalizuvho gendi. (Episarome 23:1-6) Ngapi Karunga ga lizuvhire kuhamena Ndafita? Karunga kwa here Ndafita ntani nga purakene komakanderero gendi nkenye apa. (Yirugana 13:22) Mokulifana, Karunga kupurakena komakanderero getu morwa age kutupakera mbili.
“AME KWA HARA HOMPA, YEEYI AGE KUZUVHA NGE”
Edi kuna kara nonkango domutjangi gumwe gepisarome. Age ga divire asi Karunga kupurakena makanderero gendi, ano eyi ya mu vaterere unene meparu. Age ga gwene nonkondo dokulididimikira yinka noruguwo morwa ga kere pepi naKarunga.—Episarome 116:1-9.
Nsene tu diva asi Karunga kuzuvha makanderero getu, ngayi tu tumangeda tu twikire kukanderera. Konakona sihorokwa saPedro, ogu ga tunga korwaMuzogo gwaSipanye. Munendi gonomvhura 19 kwa fire kosiponga setuwa. Pedro nga tantere Karunga omu nga lizuvhu ntani nga kovekeda kukanderera a gwane ehengagwido nevatero. Yisinke ya horokere? Pedro kwa tanta asi: “Jehova nga limburura makanderero getu morwa name namukadange ngatu gwana ehengagwido nevatero kupitira movapuli vakwetetu.”
Makanderero getu rorunzi kugalimburura kupitira mehengagwido nemevatero atu gwana kovakaume
Nampili ngomu munendi ga fire, makanderero ga vaterere unene Pedro nepata lyendi. Mukadendi, María Carmen, kwa tanta asi: “Makanderero kwa vatera nge ni lididimikire ruguwo rwange. Ame nayi divire asi Jehova Karunga kukwata nge egano morwa apa ngani kanderere ngani lizuvhu ko hansa ntani ngani gwana mbili.”
Bibeli ntani neyi ya horokera vamwe meparu, kulikida nawa-nawa asi Karunga kuzuvha makanderero. Nye age kapi a limburura makanderero nagenye. Morwasinke Karunga a limbwilire makanderero gamwe, nye a dire kulimburura gamwe?
^ para. 5 Jehova kuna kara edina lyaKarunga.—Episarome 83:18, NW.
