Ngapi makanderero naga ku vatera?
Pamela kwa kere nokankera, makura yipo ga paparere evatero kovandokotora. Nye hena kwa kandererere kwaKarunga a mu pe ko nonkondo a lididimikire ukaro wendi. Kukanderera kwa mu vaterere ndi?
Pamela kwa faturura asi: “Apa na kere pouhaku wokankera, ame kwa kere noutjirwe. Nye apa ngani kanderere kwaJehova Karunga ngani lizuvhu ko hansa nokulididimikira. Ame simpe kuzuvha kukora, nye kukanderera kuvatera nge ni kare nomutaro gouhunga koukaro wange. Apa vantu ava pura nge omu nina kulizuvha, ame kuuyunga asi: ‘Kuna kuvera nye simpe nina hafa!’”
Ose kapi twa hepa kundindira dogoro kuna kuvera ndi moudigu ntani natu kanderera. Natuvenye kuligwanekera nomaudigu, ga kare asi gomanene ndi gomanunu, ntani ose kuhepa nkenye apa evatero tu ga lididimikire. Kukanderera kuvhura kutuvatere ndi?
Bibeli kutanta asi: “Twika HOMPA udigu woge, age nga ku kwafa; narumwe si age kusigilira muhungami asi a gwe.” (Episarome 55:22) Ee, nonkango musi kouwa! Ngapi kukanderera naku ku vatera? Nsene o kanderera kwaKarunga monkedi zouhunga, age nga ku pa eyi ono hepa yipo o lididimikire maudigu goge.—Tara kakende “ Mauwa musinke no gwanena mo momakanderero?”
