Morwasinke pwa karera nyengo?
Morwasinke mouzuni muna vhukire nyengo? Mokugwana elimbururo, twa hepa tanko kudiva asi yisinke nyengo, morwasinke ava linyengere vantu, ntani eyi nyengo zina vhukire.
Yisinke nyengo?
Nyengo kuna kara malizuvho gokudira kuhara muntu gongandi ndi rudi rongandi. Ago malizuvho gokukarerera ntani kwa kwatera mo malizuvho gonkoko.
MORWASINKE AVA LINYENGERE VANTU?
Nokonda nonzi deyi ava linyengere vantu. Vantu kunyenga vakwaawo kapisi asi eyi ava rugana nye morwa yeeyi va hamena kombunga zongandi. Awo kwa nyenga vakwawo morwa awo kugazara asi nampo vantu wovadona ndi wosiponga ntani kapi ngava litjindja. Awo kuvatara asi vantu wokupira mulyo, wosiponga ntani wokuretesa po maudigu. Ava va nyenga vakwawo nampo kwa va tekwire momudona ndi nampo koyili eyi ya va horokera meparu eyi ya va ninkisa va kare nonkareso ndi nomalizuvho gangoso.
EYI NYENGO ZINA VHUKIRE
Muntu kuvhura a nyenge vakwawo nampili kapi ga va diva ndi ga mu mona. Pasihonena, muntu kuvhura a nyenge mukwawo morwa vantu ava ga fumadeka ndi ga hara nawo kapi va hara muntu ogo. Monkedi zangesi, yimo kulinyenga aku lihanene movantu.
Pokukwata egano omu nyengo azi lihana, ayo kutuvatera tu dimburure eyi sinzi sovantu va linyengera. Yipo nye, mokunyokera po nkareso zonyengo ezi zina vhuka mouzuni, twa hepa kukonakona omu nyengo za tamekere. Bibeli kulikida ntundiliro zonyengo.
BIBELI KULIKIDA NTUNDILIRO ZONYENGO
POMUHOVERERA VANTU KAPI VA LINYENGERE. Ayo kwa tamekerere meguru, apa muengeli gumwe ava tumbura asi Satana Muzonaguli ga rwanesere Karunga. Kutunda tupu apa ga rwanesere, age kwa ya kara “mudipagi.” ‘NgoMunayipempa’ ntani ‘guhya goyipempa,’ age kuna kutwikira kuretesa po nyengo nonyanya. (Johanesa 8:44; 1 Johanesa 3:11, 12) Bibeli kumusingonona asi munayipempa, nyanya, ntani kwa handuka.—Joba 2:7; Ehororo 12:9, 12, 17.
URERU KOVANTU WOKUDIRA KUSIKILIRA MO VA LINYENGE. Muntu gokuhova, Adamu kwa kweme nkareso zaSatana zokurwanesa. Ngoyitundwamo, vantu navenye kwa ya pinga nzo ntani kudira kusikilira mo. (Varoma 5:12) Mbeli zaAdamu, Kaini, kwa dipagere mumbyendi Abeli morwa nyengo. (1 Johanesa 3:12) Nye usili wou asi sinzi sovantu naina simpe kulikida eharo ntani nkenda. Nye morwa kupinga nzo, wovanzi kulinenepeka, mfudu nokuligazara tupu vene, yikara eyi ayi twaredesa konyengo.—2 Timoteusa 3:1-5.
ELISIGO KUTWAREDESA KOKULINYENGA. Uzuni ou tuna kuparuka kukorangeda nyanya nononkareso donondona edi adi twaredesa kokulinyenga. Elitondoro, kuswaura, ehepeko, ntani ezonaguro lyoyininke kuna vhuka morwa “uzuni mudima kwa kara mepangero lyomuzonaguli” ndi Satana.—1 Johanesa 5:19.
Nampili ngoso, Bibeli kapi tupu za tumbura ntundiliro zonyengo, nye hena nomu natu nyokera po nkareso zonyengo.
