OMU NATU NYOKERA PO NKARESO ZONYENGO
3 | Gusa mo nyengo momagazaro goge
Bibeli kutanta asi:
“Sigeni Karunga a rundurure magazaro geni, mu situnuke nawa-nawa. Ntani mu diva kukoneka mpango zaKarunga neyi yoyiwa ya mu wapera ayo ya sikilira mo.”—VAROMA 12:2.
Eli ali tanta:
Eyi atu gazara mulyo kwaKarunga. (Jeremiya 17:10) Twa hepa kurugana ko yoyinzi kupitakana tupu kunyokera po nyengo mombuuyungiso nomoyirugana yetu. Nkareso zonyengo kutundilira kweyi atu gazara nomu atu lizuvhu. Yipo nye, twa hepa kuhageka kugazara yininke eyi nayi tu ninkisa tu kare nonyengo. Ntani natu vhura ‘kurundurura magazaro getu’ ndi tu nyokere po nkareso zonyengo.
Eyi no vhura kurugana:
Teda ko kuhamena omu o gazara nomu o lizuvhu kuhamena wopeke, unene po worudi ndi womuhoko gwapeke. Lipura asi: ‘Ngapi omu ani va tara? Mutaro gwange kwa korera monkedi omu nava diva ndi? Ndi kwa korera melitondororo?’ Nyokera ko kutarera ndi kuresa yininke koIntaneta eyi ayi korangeda nyengo nonyanya.
Nonkango daKarunga kuvhura kutuvatera tu nyokere po nyengo momagazaro nomonomutjima detu
Ayo kapisi ureru kukonakona magazaro getu nomalizuvho getu. Nye Nonkango daKarunga kutuvatera tu konakone ‘matedo noyigazo yetu yokomutjima.’ (Vahebeli 4:12) Yipo nye, twikira kulironga Bibeli. Hetakanesa eyi ono kulironga nomagazaro goge ntani hetekera ko kulironga kugazara monkedi ezi azi hafesa Karunga. Nonkango daKarunga kuvhura di tu vatere tu nyokere po nyengo momagazaro getu nomonomutjima detu.—2 Vakolinte 10:4, 5.
