OMU NATU NYOKERA PO NKARESO ZONYENGO

2 | Wa ha tengwida kuwoko

PLAY

Bibeli kutanta asi:

“Walye omu likwatere-kwatere nonkoko. . . . Kombinga zeni, one kareni nombili kovantu navenye ntani. Walye omu lirugwidire-rugwidire udona noudona. . . . Yeeyi kwa tjanga asi, ‘Ame nyame ani tengwida kuwoko nehandu, nyame ani futu, yimo ana kutanta Hompa.’”—VAROMA 12:17-19.

Eli ali tanta:

Nampili ngomu ya dira kukara epuko kuhanduka nsene muntu ana tu zonene, Karunga kapi a yi pulisire asi tu tengwide kuwoko. Nye age kuna hara tu lididimikire morwa ga tumbwidira asi ntaantani nga ka guse po maudona nagenye.—Episarome 37:7, 10.

Eyi no vhura kurugana:

Apa vantu wokudira kusikilira ava tengwida kuwoko, ayo kutwaredesa tupu kokulinyenga. Yipo nye, nsene asi gumwe ana ku handukisa ndi ana ku rugana yoyidona, wa ha tengwida kuwoko. Hetekera ko kupangera malizuvho goge nokuuyunga monkedi zombili. Poyiruwo yimwe ya wapa kudivara eyi yina horoka. (Yisewe 19:11) Nye nsene asi hepero, ya wapa kukohonona po udigu owo. Pasihonena, nsene asi nyove vana vaka ndi vana rugana momudona, kuvhura o ka yi rapote kovaporosi ndi kwava va kara moupangeli.

Nkareso zokutengwida kuwoko kutanta asi kulipopera nyamoge

Ngapi nsene kapi pana kara nkedi zongwa zokuvhura kukohonona po udigu owo? Ndi ngapi nsene asi wa hetekera ko nare kukohonona po udigu owo monkedi zombili? Wa ha tengwida kuwoko. Ayo tayi yipike tupu yininke. Kudira kutengwida kuwoko, tayi ku vatere yipo o nyokere po nkareso zonyengo. Lironga kuhuguvara monkedi omu Karunga a kohonona po maudigu. Bibeli kutanta asi: ‘Huguvara mwendi, makura age nga ku kwafe.’—Episarome 37:3-5.

Eyi ya mu horokera meparu—ADRIÁN

Kwa nyokerere po malizuvho gokutengwida kuwoko

Adrián, mudinkantu ogu ga kere nehandu lyenene nga rwanagana moyitarata ntani ga here kutengwida kuwoko. Age kwa tanta asi: “Yikando yoyinzi ngani lihameke mokurwana nomauta, ano poyiruwo yimwe ngava toona nge dogoro kuhara kufa.”

Adrián kwa tamekere kulironga Bibeli apa ga kere nonomvhura 16. Age kwa tanta hena asi: “Ngomu na twikilire kulironga Bibeli, na tjindjire nkareso zange.” Na hepere kunyokera po nyengo ntani nokuhageka nyanya. Unene po, age kwa haferere eyi ga lirongere moVaroma 12:17-19 eli lya uyunga kuhamena kudira kutengwida kuwoko. Age kwa tanta asi: “Ame na ya dimbwilire asi Jehova nga gusa po udona monkedi ezi ga yi harera posiruwo sendi. Kanunu-kanunu tani ya sigi nkareso zange zonyanya.”

Ezuva limwe ngurova, mbunga zovadinkantu wovakorokotji ezi va linyengere nazo nare, kwa mu homokerere. Mupitisili gombunga ozo ta zigire asi: “Likandura!” Adrián kwa tanta asi: “Ame kwa lizuvhire asi ngwendi ni tengwide kuwoko.” Nye mevango lyokutengwida kuwoko, age kwa tanta asi tani kanderere usimbu kwaJehova a vatere nge makura tani tundu po.

Adrián kwa gweda ko hena asi: “Ezuva lya kweme ko tatu ligwana nomupitisili gombunga ozo. Ame kwa handukire unene, nokuhara kutengwida kuwoko, nye tani likwambere kwaJehova a vatere nge ni lipangere. Na hana kuyindindira mupitisili gombunga ozo ta wiza ta tanta asi: ‘Gusira nge po kweyi ka yi horokere nkera. Name nina hara kukara ngwendi nyove. Nina hara kulironga Bibeli.’ Ame na hefe kweyi na pangerere ehandu lyange. Makura nage ta tameke kulironga Bibeli.”

RUHUNGU

Omu natu nyokera po nkareso zonyengo—Wa ha tengwida kuwoko

Rukwangali

Omu natu nyokera po nkareso zonyengo—Wa ha tengwida kuwoko

https://cms-imgp.jw-cdn.org/img/p/2022012/univ/art/2022012_univ_sqr_xl.jpg

wp22 No. 1 epe. 8-9

Nombangi daJehova

2 | Wa ha tengwida kuwoko

Bibeli kutanta asi:

Eli ali tanta:

Eyi no vhura kurugana:

Omu natu nyokera po nkareso zonyengo—Wa ha tengwida kuwoko

HOROWORA OMU NO KWATEKA

Bibeli kutanta asi:

Eli ali tanta:

Eyi no vhura kurugana:

Omu natu nyokera po nkareso zonyengo—Wa ha tengwida kuwoko

HOROWORA OMU NO KWATEKA

Horowora Eraka Lyoge

Tumina wopeke