4 | Bibeli kugava magano gomawa
BIBELI KUTANTA ASI: “Nkenye etjangwa . . . kwa kara nomulyo.”—2 TIMOTEUSA 3:16.
Eyi ali tanta
Nampili ngomu Bibeli za dira kukara buke zouhaku, magano gamo kuvhura kuvatera muntu ogu ana kara nouvera wopomagazaro. Tara yihonena yimwe.
Omu nayi kuvatera
“Ava va kanguka kapi va hepa muhakuli, vaveli ntani yiwo va mu hepa.”—MATEUSA 9:12.
Bibeli kwa yi kwatesa ko asi twa hepa uhaku wokosipangero. Sinzi sovantu ava va kara nouvera wopomagazaro kuna kugwana evatero kovandokotora.
“Maliyombereso goparutu mulyo.”—1 TIMOTEUSA 4:8.
Rugana ko yuma eyi nayi wapukurura ukanguki woge. Pasihonena, litulira po siruwo sokuliyomberesa ndi sokuufena nokulya nondya doukanguki ntani rara nompofu dokugwanena po.
“Mutjima gehafo kukwafa mokuveruka. Kukara neguwo nkenye apa kukukutika yisupa.”—YISEWE 17:22.
Kuresa Bibeli nokulitulira po yitambo eyi no vhura kusikisa mo, kuvhura yi ku vatere o kare noruhafo. Nsene o kara nomutaro gomuwa ntani o kara nehuguvaro asi komeho yininke ngayi wapa, ayo ngayi kuvatera o lididimikire uvera woge.
“Unongo kukara pwava va linunupika.”—YISEWE 11:2.
Poyiruwo yimwe kuvhura yi ku digopere kurugana nayinye eyi ono hara kurugana, yipo nye tambura evatero lyovakweni. Vakaume novanekero nampo vana hara kukuvatera nye kapi vana diva oku nava tamekera. Va tantera eyi ono hara va ku vatere. Wa ha ndindira ko yoyinzi, nye va pandura kweyi vana kuhetekera ko kukuruganena.
Omu Bibeli zina kuvatera vamwe ava vana kuhepa kouvera
“Ame kwa lizuvhire asi kapi nina wapa, yipo na zire kwandokotora. Age ga vhulire kugwana uvera ou na kere nawo. Eyi kwa vaterere nge ni tambure uvera wange ntani ni lironge mauhaku aga naga vatera nge moukaro ou.”—Nicole, a ogu a vere uvera ou au tjindja-tjindja malizuvho gendi.
“Ame na dimburura asi pokuresa Bibeli nkenye ezuva namukadange, kuvatera nge ni tameke ezuva lyange nawa ntani nomagazaro gomawa. Pomazuva aga ani lizuvhu asi kapi nina kuvhura hena, kolili etjangwa eli nali hengagwida nge.”—Peter, ogu a vere uvera wokuguva-guva.
“Ayo kwa digoperere nge kutantera ko wopeke kuhamena uvera wange, morwa ngani lifu nomuga. Nye kaume kange gomunene nga purakene nge ntani nga kwata nge egano. Age kwa vaterere nge lizuvhe ko hansa ntani asi kapisi nyamelike nina kara.”—Ji-yoo, ogu ga kara noudigu wokulya.
“Bibeli za vatera nge ni kare nehetakano lyewa nokudira kurugana unene ntani ni pwizumuke nawa. Unongo womoBibeli wa vatera nge dive omu nani lididimikira udigu wange wopomalizuvho.”—Timothy, ogu ga kara nouvera ou au mu pe sinka nomagazaro gomadona.
a Madina gamwe kwa ga rundumuna.
