MoBibeli kwa zura mo yihorokwa yovagara novakadi ava va kere nomalizuvho ngwendi nyose. Ngomu natu ka resa eyi ya va horokerere, natu ka dimburura asi gumwe gwawo kwa lizuvhire moomu tuna kulizuvha nose.

Twa hepa kuyidiva asi wopeke kutukwata egano omu tuna kulizuvha. Nye unene po apa atu kondjo nouvera wopomagazaro. Apa atu resa Bibeli, ose kulironga kuhamena omu vamwe va gazarere nokulizuvha ngwendi moomu tuna kulizuvha nose. Ngoyitundwamo, apa atu lididimikire yinka ntani nomalizuvho gomadona kutuvatera tu dimburure asi vamwe nawo kwa hepere ngwendi nyose ntani kapisi nyoselike yina kuhorokera.

• MoBibeli kwa kara mo yihorokwa yoyinzi yava va lizuvhire asi kwato mulyo ntani ngwendi va fe. Nove wa lizuvha rumwe asi ‘ngwendi o fe ndi’? Mosesa naEliya ntani Ndafita nawo yimo va lizuvhire ngoso.—Numeri 11:14; 1 Vahompa 19:4; Episarome 55:4.

• MoBibeli kwa tumbura mo mukadi gedina Hana ogu ga ‘guvire unene’ morwa kudira kukara nomuna ntani musupakadi zendi nkenye apa nga mu swaura oku ta mu sandagura.—1 Samwere 1:6, 10.

• Ntani kwa tumbura mo hena mugara gedina Joba ogu nage ga lizuvhire ngwendi nyose. Nampili ngomu ga kere mulimburukwi, age ga hepere komalizuvho gokukora, ano sikando simwe kwa uyungire asi: “Ame na ligava, na roroka kukara nomwenyo.”—Joba 7:16.

Pokukonakona omu ya tompokere vantu ava va tumbura moBibeli va lididimikire malizuvho gomadona, nose kuvhura yi tu vatere tu lididimikire kukora kopamalizuvho.