Ayo kutukundama apa mukwetu ndi gumwe ogu twa hara a kara nouvera wopomagazaro. Nye apa atu mu vatere a lididimikire uvera wendi ose ngoso kuna kulikida asi twa mu hara. Ngwendi ngapi?

‘Genderera kuzuvha.’—JAKOPO 1:19.

Nkedi zimwe omu no vhura kuvatera mukweni kuna kara pokumupurakena nsene ana hara kuuyunga nove. Wa ha lizuvha asi wa hepa kukumburura kwankenye eyi ana kukutantera. Mu ninka a lizuvhe asi kuna kumupurakena ntani asi wa mu hara. Hetekera ko kumukwata egano ntani wa ha mu pangura. Diworoka asi kuvhura a uyunge yininke eyi ana dili kutamba ntani eyi na ka livera konyima.—Joba 6:2, 3.

“Korangeda wompwagetjima.”—1 VATESARONIKA 5:14.

Mukweni kuvhura a kare nosinka ndi a lizuvhe asi kwato mulyo. Nye pokumutantera asi wa mu hara, kuvhura yi mu korangede noku mu hengagwida nampili kapi ono diva eyi no uyunga.

“Vantu namukwawo kulihara.”—YISEWE 17:17.

Vatera mukweni. Mevango lyokugazara asi ono diva omu nomu vatera, mu pura eyi ana hara o mu ruganene. Nsene kapi ana kuvhura kufaturura evatero eli ana hepa, hetekera ko kugava magano kuhamena yininke eyi  nomu vhura kurugana kumwe, ngwendi kugenda po. Ndi kuvhura o mu vatere pokukamurandera yininke eyi ana hepa, kuzeresa ntani nayimwe ngoso.—Vagarata 6:2.

‘Lididimikira.’—1 VATESARONIKA 5:14.

Mukweni poyiruwo yimwe kapi nga hara kuuyunga kuhamena omu ana kulizuvha. Mu tantera asi ono hara kumupurakena nkenye apa na mangurukira kuuyunga. Morwa uvera, mukweni kuvhura a uyunge ndi a rugane yininke eyi nayi ku koresa. Age kuvhura a dire kuhara kukara nove ndi a handauke-handauke. Ngomu ono kumuvatera, lididimikira ntani mu kwata egano.—Yisewe 18:24.

“Ame kudivilisa asi ni kare kaume ogu na mangurukira nkenye apa. Nampili ngomu ani dili kuvhura kukohonona po udigu wendi, ame kumupurakena apa a uyunga. Poyiruwo yimwe kuhepa tupu muntu gokumupurakena yipo a lizuvhe ko hansa.”—Farrah, a ogu ga kara namukwawo ogu ga kara noudigu wokulya noyinka ntani ga kara ponomutji douvera wokuguva-guva.

“Mukwetu gumwe kwa kara nonkenda ntani kukorangeda nge sili. Age kwa zigidire nge kembo lyendi tu ka lye kumwe. Eharo eli ga likidire nge lya ninkisire nge ni mu mangurukire, yipo na mu tanterere omu na lizuvhire. Eyi kwa korangedere nge sili!”—Ha-eun, ogu ga kara ponomutji douvera wokuguva-guva.

“Kulididimikira mulyo unene. Apa mukadange a rugana yininke eyi ayi koresa nge, ame kulidiworokesa nyamwange asi uvera wendi una kumuninkisa morwa kapisi yimo ngoso ga kara. Eyi kuvatera nge ni dire kuhanduka ntani ni mu kwate egano.”—Jacob, ogu mukadendi ga kara ponomutji douvera wokuguva-guva.

“Mukadange kwa vatera nge sili unene. Apa ani kara nosinka unene, age kapi a sininike nge ni rugane yininke eyi nina dili kuhara. Eyi kutanta asi age pamwe kapi a rugana yininke eyi ana hara kurugana. Ame na mu hara sili morwa nkareso zendi zelizambero ntani zougavi.”—Enrico, ogu a vere uvera wosinka.