Udigu wouvera wopamagazaro mouzuni
“Ame nkenye apa kukara nosinka nampili kwato eyi yina kuninkisa nge ni kare nosinka.”
“Apa ani hafa unene, ame kuyidiva asi ntaantani ni guve. Morwa yimo tupu ngorooro na kara.”
“Ame kuhetekera ko kudemenena kweyi yina kuhoroka mezuva, nye poyiruwo yimwe kukara nosinka soyininke yoyinzi.”
Eyi yiyo va uyunga ko vamwe ava vana kuhepa kouvera wopomagazaro. Nove kuna kara noudigu wokulifana ndi muntu gumwe ogu wa diva?
Diva asi kapisi nyovelike ono kara. Sinzi sovantu naina uvera ou una va kundama, yi kare asi pamundinda ndi gumwe ogu va diva.
Maudigu gana vhuka unene morwa ose kuna kuparuka ‘poyiruwo yoyidigu.’ (2 Timoteusa 3:1) Kuliza nekonakono limwe, kwa tanta asi mouzuni mudima mokatji kovantu 8 to gwana mo gumwe ogu ana kara nouvera wopomagazaro. Mo-2020, uvera womukagu Korona kwa ninkisire sivaro sovantu wouvera wopomagazaro si pitakane pomamiliyona 78.
Kudiva sivaro souvera ou kapisi yiyo yomulyo po. Nye yomulyo po kuna kara omu nove novakweni nomu kara noukanguki wopomagazaro nokuhafera eparu.
Yisinke ukanguki wopomagazaro?
Ukanguki wopomagazaro kuna kara apa o lizuvhu nawa nokugazara nawa. Kuvhura o lididimikire yinka nokurugana nawa oku to hafere eparu.
Uvera womutwe . . .
-
KAPISI upirankondo wongandi ayi u retesa po.
-
AWO kuna kara asi koyili yimwe ayi lilimbi mouruvi ayi ninkisa muntu a guva-guve, a dire kugazara nawa ntani a dire kupangera malizuvho gendi nonkareso zendi.
-
Awo kuninkisa muntu a dire kukara nelikwatakano lyewa kumwe novakwawo ntani nokudira kusikisa mo yihepwa yankenye ezuva.
-
Awo kuvhura kukundama vantu navenye, yi kare asi o mukondi ndi munona, wa weka yuma ndi kapi wa weka, wa lironga ndi kapi wa lironga.
Papara evatero
Nsene gumwe ogu wa diva ndi nyamoge kuna kuligwanekera nomalitjindjo ngwendi kapi ono kurara, kapi ono kulya nawa, kuna kuguva-guva unene, nokukara nosinka, papara evatero kwava va diva youhaku. Nye kupi oku no gwana evatero?
Jesus Kristusa mugara gomunongo kwa tente asi: “Ava vakanguka kapi va hepa muhakuli, vaveli ntani yiwo va mu hepa.” (Mateusa 9:12) Ava vana kuhepa kouvera ou wopomagazaro nsene va gwana evatero nonomutji kuvhura yi sesupike uvera wawo ntani va hafere eparu. Ya kara nomulyo kovantu vangoso va genderere kupapara evatero komeho ukaro wawo u dide. a
Nampili ngomu Bibeli za dira kukara buke zouhaku, nye magano gamo kuvhura kutuvatera tu kare tuna kanguka pamagazaro. Kuna kukukorangeda o rese yirongwa eyi yina kukwama ko ya zogera omu Bibeli nazi kuvatera o lididimikire uvera wopomagazaro.
a Ruhungu oru kapi runa vyukilire kutumbura nkenye uhaku. Nkenye gumwe ga hepa kukonakona ukaro wendi nokutura po etokoro lyamwene.
Kuvhura o hafere hena
VANGARARENI!
Sinzi sovadinkantu kuna kuhepa pomagazaro—Yisinke azi uyunga ko Bibeli?
Bibeli za gava mavyukiso gomawa kovadinkantu ava vana kara noudigu wopomagazaro.
KUTUHAMENA
Tura mo ehundiro
Gwana elimbururo kepuro lyomoBibeli ndi lironga ko yoyinzi kuhamena Nombangi daJehova.
