1. Nonkwara

Vantu kwa kara nomagano gokulisiga-siga kuhamena nonkwara ntani eyi ya hepa po yipo nonkwara di kare doruhafo.

EYI AYI TANTA: Nonkwara kuna kara ewapaiko eli ga tulisa po Karunga, yipo nye age ga diva eyi ya hepa po yipo valikwali va hafe. (Marukusa 10:6-9) Apa mugara nomukadi ava kara nosinka kovalikwali vawo mevango tupu lyokuligazara vene, navenye ngava kara noruhafo. Mugara ogu ga hara mukadendi, kuyilikkida monkedi omu a mu tekura ntani nomu a mu pakere mbili. Ntani mukadi ogu a fumadeke mugara gwendi kuyilikida kupitira mombuuyungiso nomoyirugana yendi.

MAVYUKISO GOMOBIBELI KUVATERA: Quang naThi, womoVietnam, kwa lizuvhire asi kapi ngava kara nononkwara doruhafo. Quang kwa kere nonyanya. Age kwa uyunga asi: “Ame kapi na pakerere mbili malizuvho gaThi ntani ngani mu swaukisa yikando yoyinzi.” Thi kwa here va lizumbe. Age kwa uyunga asi: “Ame kwa lizuvhire asi kapi hena nani vhura kuhuguvara ndi kufumadeka mugara gwange.”

Konyima, Quang naThi kwa ya lirongere eyi azi rongo Bibeli ntani nomu nava tura pasiguragana Vaefeso 5:33 mononkwara dawo. Quang kwa uyunga asi: “Velise ezi kwa vatera nge ni kare nombili ntani ni likide eharo Thi, nokupakera mbili yihepwa yendi, panyama ntani pamalizuvho. Apa ani mu tekura monkedi zangoso, age kuhara nge ntani kufumadeka nge.” Ntani Thi kwa uyunga asi: “Apa ani tura pasirugana Vaefeso 5:33 nokufumadeka mugara gwange, age kuhara nge ntani kuninkisa nge ni lizuvhe epopero nombili.”

 2. Omu no tekura vakweni

Rorunzi vantu kutekura vakwawo momudona morwa rudi rwawo ndi muhoko ndi ukareli wawo.

EYI AYI TANTA: Bibeli kapi azi tu rongo tu nyenge vantu worudi ndi wokomuhoko gwapeke ndi vagara ava ava rara vagara vakwawo novakadi ava ava rara vakadi vakwawo. Nye azo kutukorangeda tu fumadeke vantu navenye, yi kare asi rudi ndi muhoko musinke ndi ngawo ndi hepwere. (Yirugana 10:34) Nampili ngomu atu dili kukwatesa ko eyi va pura ndi omu ava rugana yininke, ose kuvhura simpe tu va tekure monkedi zongwa ntani zefumadeko.​—Mateusa 7:12.

MAVYUKISO GOMOBIBELI KUVATERA: Daniel kwa mu rongere a tare Vaasia asi awo siponga mosirongo sawo. Age kwa ya nyengere nkenye ogu ga tundilira moAsia, ntani rorunzi ngava swaura moyitarameho yovantu. Daniel kwa uyunga asi: “Ame kwa gazarere asi kuna kukwatesa ko sirongo setu. Kapi na gazarere asi monkedi omu ngani gazara nomu ngani rugana yininke kwa kere epuko.”

Konyima Daniel yipo ga ya lirongere eyi azi rongo Bibeli. Daniel kwa uyunga asi: “Ame na hepere kutjindja monkedi omu ngani gazara. Na hepere kutara vantu monkedi omu a va tara Karunga, ntani asi natuvenye twa hetakana yi kare asi kupi twa tunda.” Daniel kwa faturura omu ana kulizuvhu ngesi apa a ligwana novantu. Age kwa uyunga asi: “Rorunzi ame kapi ani gazara asi kupi va tunda. Ngesi ame kwa hara vantu navenye ntani na kara novakaume wokomarudi nagenye.”

 3. Yimaliwa

Vantu wovanzi kukondjera kungawopa yipo va hafe ntani va kare nomeho zongwa.

EYI AYI TANTA: Yimaliwa twa yi hepa, nye ayo kapi ngayi tu retera ruhafo ndi meho zongwa. (Yisewe 18:11; 23:4, 5) Ruhafo rwene-rwene kwa korera mokutura pasirugana unongo ou wa kara moBibeli.​—1 Timoteusa 6:17-19.

MAVYUKISO GOMOBIBELI KUVATERA: Cardo, mugara gomoIndonesia, kwa demenene kokungawopa. Age kwa uyunga asi: “Ame kwa kere noyininke nayinye eyi va hara kukara nayo vantu. Ame na vhulire kuza momarugendo, kuranda yininke yondiro, matuwa ntani mambo.” Nye yimaliwa yendi kapi ya kere siruwo sosire. Cardo kwa uyunga asi: “Kweli ogu ga gendere nge konhi nokuvaka yimaliwa yange nayinye eyi na tjimpukira. Ame kwa rugene nomvhura nonomvhura yipo ni ngawope. Nye na ya guvire morwa kwato hena eyi na ya kere nayo ntani kwa lizuvhire asi ame kwato mulyo.”

Cardo kwa ya tamekere kutura pasirugana epukururo lyomoBibeli kuhamena yimaliwa. Age ngesi kapi hena a demenene kuruganesa nonkondo dendi yipo a ngawope, nye age kwa rerupika eparu lyendi. Age kwa uyunga asi: “Ame ngesi kulizuvha asi na kara noungawo wene-wene morwa na kara nelikwatakano lyewa naKarunga. Ame ngesi kurara nawa nkenye masiku ntani na hafa.”

 4. Eligwanekero panyama

Vantu kwa kara nomagano gokulisiga-siga kuhamena eligwanekero panyama eli va pulisira.

EYI AYI TANTA: Bibeli kwa tura po masiliko omu natu pwagesa malizuvho getu kuhamena kuligwanekera panyama. Nkango ‘kuhondera’ kwa kwatera mo kuligwanekera panyama nomuntu ogu ga kara asi kapisi mulikwali goge, nohondedi, eligwanekero panyama pokatji kovantu ava va dira kulikwara, vantu ava ava lirara vagara novagara ndi vakadi novakadi, ntani eligwanekero panyama pokatji komuntu nosikorama. (1 Vakolinte 6:9, 10) Kuligwanekera panyama kuna kara uhwi wokutunda kwaKarunga, ayo kwa fira tupu mugara nomukadi ava va likwara paveta.​—Yisewe 5:18, 19.

MAVYUKISO GOMOBIBELI KUVATERA: Mukadi gomoAustralia gedina Kylie kwa uyunga asi: “Apa na kere mudike, ame kwa gazarere asi nsene ni ligwanekera panyama, ngani lizuvha epopero ntani asi va hara nge. Nye oyo kapisi yiyo ya horokere. Ame kwa dompere mutjima ntani kapi na lizuvhire epopero.”

Konyima, Kylie kwa ya lirongere Bibeli nokutura pasirugana eyi azi rongo kuhamena eligwanekero panyama. Age kwa uyunga asi: “Ame na dimburura asi nompango daKarunga kwa karera po di tu popere kweyi ayi tu koresa. Ame ngesi kulizuvha epopero ntani asi va hara nge, morwa kuna kurugana yininke monkedi omu ga yi harera Jehova. Kutura pasirugana mavyukiso gomoBibeli kwa popera nge kweyi ayi tu koresa!”