Kosinke ava demenene vantu apa ava tura po matokoro?
Sinzi sovantu kuyikwatesa ko asi yininke yimwe uhunga, ano yimwe epuko. Pasihonena, vanzi va nyenga kudipaga, ekwatero kononkondo ntani kuligwanekera panyama novanona, nye awo kwa hara kurugana yininke youhunga neyi yoyiwa ntani va kara nonkenda. Nye ngapi kuhamena matokoro ngwendi yilye no ligwanekera nage panyama, nsene hepero o uyunge usili ndi omu no rera vanona? Sinzi sovantu kugazara asi kapi pwa kara etokoro lyouhunga ndi lyepuko. Awo kugazara asi nkenye eli etokoro ewa. Rorunzi, vantu kutura po matokoro kuliza nomu ava lizuvhu ntani nomu ava lizuvhu wopeke kuhamena ukaro wongandi. Ogo ngoso kuna kara magano gomawa ndi?
OMU ATU LIZUVHU
Yikando yoyinzi, ose kutura po matokoro kuhamena youhunga neyi yepuko kuliza nomu atu lizuvhu ndi nezwi lyetu lyokomutjima. (Varoma 2:14, 15) Nampili vanonagona vaava nawo kuvhura kudimburura elisigo lya kara pokatji konkareso zongwa nezi zondona ntani awo kulizuvha unzoni apa ava rugana yininke yepuko. Ngomu tuna kukura, ose kuyalirongera ko kekoro lyetu ndi kovadinkantu vakwetu ndi kovamitili vakwetu ndi kovantu womomukunda ndi koukareli wetu ndi kompo zetu asi yininke musinke youhunga neyi yepuko. Apa atu tura po matokoro, ezwi lyetu lyokomutjima kututantera nsene asi matokoro getu kuna kuliza neyi twa lironga kuhamena yininke youhunga neyi yepuko.
Kudiva yininke youhunga neyi yepuko kuvhura kututumangeda tu likide nkenda norupandu nokudira mpongo ntani tu tekure nawa vakwetu. Ayo kuvhura kutuvatera tu dire kurugana yininke eyi nayi koresa vantu ava atu pakere mbili ndi eyi nampo nayi tu swaukisa ndi nayi tu fisa nomuga ntani tu lizuvhe unzoni.
Kuvhura tu huguvare monkedi omu atu lizuvhu ndi? Ngomudinkantu, Garrick nga paruka eparu eli ga fatwilire asi: “Ame ngani rugene nkenye eyi na here kurugana.” Nye age kwa ya dimbwilire asi kurugana yininke eyi nga gazara asi youhunga, kapi ya mu reterere mauwa. Age kwa
faturura asi kapi ga kere noruhafo meparu, kwa kere nkorwe, nga hondere, nga koko makanya, ntani kwa kere muntu gonyanya.OMU AVA LIZUVHU WOPEKE
Kugusa ko kutura po matokoro kuliza nomu atu lizuvhu, rorunzi ose kutura po matokoro kuliza nomu wopeke ngava tara matokoro getu. Oyo kuvhura kutuvatera tu gwanene mo uwa mweyi va limonena ntani kweyi va diva. Apa atu rugana yininke eyi ava gazara vantu asi youhunga, ayo ngayi ninkisa vemepata lyetu novakaume vetu ntani novantu womomukunda va tu fumadeke.
Kuvhura tu huguvare monkedi omu ava lizuvhu wopeke ndi? Ngomudinkantu gomukadi, Priscila kwa rugene yininke eyi ngava rugana vadinkantu vakwawo ntani kwa ligwanekerere panyama komeho zononkwara. Age kwa ya dimbwilire asi nampili ngomu nga rugana eyi ngava tara wopeke asi yininke youhunga, ayo kapi ya mu reterere ruhafo. Age kwa tanta asi: “Kurugana yininke eyi nga rugana nkenye ogu kapi ya ninkisire nge ni lizuvhe nawa. Ayo kwa ninkisire nge ni rugane yininke yougova ntani yosiponga.”
PWA KARA NKEDI ZONGWA NDI?
Malizuvho getu naga gava wopeke kwa kara nomulyo apa atu tokora pokatji keyi youhunga neyi yepuko. Nye malizuvho getu naga gava wopeke kapi aga twaredesa nkenye apa koyitundwamo yoyiwa. Poyiruwo yimwe, kuvhura tu likorese nyamwetu ndi wopeke, morwa kudira kudiva yitundwamo yomatokoro getu. (Yisewe 14:12) Nampili wopeke va gazare ndi tu gazare asi yininke yongandi uhunga, ayo kuvhura simpe yi kare siponga ntani magano ogo kuvhura kulitjindja. Nkareso ezi ngava tara asi ndona, ngesi kuzitara asi ngwaa, ano nkareso ezi va gazarere asi ngwaa, ngesi kuzitara asi ndona.
Kuvhura tu huguvare monkedi omu ava lizuvhu wopeke ndi?
Pwa kara mavyukiso gomawa aga naga tu vatera tu dive asi yininke musinke youhunga neyi yepuko ndi? Pwa kara mavyukiso aga natu kwama neina kuhamena yininke youhunga neyi yepuko yipo ngatu dire kulivera komeho ndi?
Ayo kuhafesa pokudiva asi pwa kara mavyukiso gangoso aga naga vhura kuvatera nkenye ogu, yi kare asi kupi ga tunga. Sirongwa sokukwama ko, tasi ka zogera oku natu gwana mavyukiso aga natu vhura kuhuguvara yipo tu dive youhunga neyi yepuko.