Kuvhura tu huguvare eyi azi rongo Bibeli kuhamena youhunga neyi yepuko
Nsene tu demenena tupu omu atu lizuvhu ndi omu ava lizuvhu wopeke, kapi ngatu diva asi matokoro getu kuhamena yininke youhunga neyi yepuko ngaga kara gomawa. Bibeli kugava konda asi morwasinke ntani za yi faturura hena momunene. Azo kutuvatera tu dive youhunga neyi yepuko, eyi ayi tu vatere tu kare noruhafo meparu.
MAVYUKISO AGA TWA HEPA
Jehova a Karunga kwa faturura moBibeli asi vantu va hepa evatero lyendi ntani kapi tava vhuru kurugana yininke pwavene. (Jeremiya 10:23) Eyi yiyo ga tulira moBibeli mavyukiso kuhamena yininke youhunga neyi yepuko. Age kwa hara vantu ntani kapi ana hara tu ture po matokoro gomadona aga ngaga tu koresa noku digopeka eparu lyetu. (Deuteronomium 5:29; 1 Johanesa 4:8) Ntani hena, Musiti gwetu ga kara nounongo nediwo yipo a tu pe mavyukiso gomawa kuhamena youhunga neyi yepuko. (Episarome 100:3; 104:24) Nye nampili ngoso, Karunga kapi a sininike vantu va kwame nompango dendi.
Jehova kwa pere mugara nomukadi gokuhova, Adamu naEva nayinye eyi va hepere yipo va hafe. (Genesis 1:28, 29; 2:8, 15) Age kwa va pere hena mavyukiso goureru aga ngano va hepere kulimburukwa. Nye nampili ngoso, age kwa va pulisilire va horowore nsene tava ga kwama ndi hawe. (Genesis 2:9, 16, 17) Ehudi, Adamu naEva kwa horowere kurugana eyi va here mevango lyokukwama nompango daKarunga. (Genesis 3:6) Yitundwamo musinke ya ya kere? Apa vantu ava rugana eyi ava gazara vene asi yiyo youhunga, ayo kuvahafesa ndi? Hawe. Mwaza nomvhura, ose kwa ya dimburura asi kuncenuna nompango daKarunga kapi ayi reta mbili zanarunye ntani noruhafo.—Muudisi 8:9.
MoBibeli kwa kara mo mavyukiso aga twa hepa yipo tu ture po matokoro gomawa kuhamena youhunga neyi yepuko, yi kare asi kupi twa tundilira. (2 Timoteusa 3:16, 17; tara kakende “ Buke ezi za tamba kovantu navenye.”) Konakona omu Bibeli nazi tu vatera.
Lironga ko yoyinzi eyi Bibeli ava zi tumbwire asi “nonkango daKarunga.”—1 Vatesaronika 2:13. Tarera vidiyo Yilye ga retesa po Bibeli? ko jw.org/kwn.
OMU BIBELI AZI HORORA MAVYUKISO GAKARUNGA
Bibeli kututantera kuhamena elikwatakano lyaKarunga novantu kutunda tupu apa ga sitire vantu. Eyi ya kara mo kuvhura kutuvatera tu dive yininke eyi a tara Karunga asi youhunga neyi yepuko ntani kutuvatera tu dive uwa noudona. (Episarome 19:7, 11) Eyi atu lirongo moBibeli ngayi tu vatera nkenye apa tu ture po matokoro gomawa kuhamena youhunga neyi yepuko meparu lyetu lyankenye ezuva.
Pasihonena, tara epukururo eli lya kara mo Yisewe 13:20. Alyo kutanta asi: “Kara ukwawo novanongo ngo kare munongo. Nsene o kara ukwawo novagova, ngo hanauka po.” Ngwendi mosiruwo sanare, mpango ozo simpe kurugana nampili momazuva getu. MoBibeli kwa kara mo nompango dononzi edi nadi tu vatera ntani domulyo.—Tara kakende “ Unongo ou twa hepa kuugwana tupu moBibeli.”
Nye nampo kuvhura o lipure asi: ‘Ngapi omu nani yi diva asi mavyukiso gomoBibeli kuvhura ga vatere nge neina?’ Sirongwa sokukwama ko, tasi ka zogera yihorokwa eyi ya horoka.
a Jehova kuna kara edina lyaKarunga.—Rukasa 4:8, NW.
