Wa hepa kutura po etokoro kuhamena youhunga neyi yepuko
Yininke youhunga neyi yepuko eyi twa tokora kukwama ngayi kundama eparu lyetu. Jehova Karunga ga yi diva oyo. Eyi yiyo ana tu harere tu paruke kuliza nonompango dendi.
Jehova kuna tu harere tu kare neparu lyewa ntani lyoruhafo.
“Ame nyame HOMPA Karunga goge, ogu ga hara kukuronga morwauwa waamoge a ku likide nzira ezi no genda. Ani ngano nye ngo purakene konompangera dangiee! Matungiko ngano ngaga ku powomokera ngwendi mukuro ogu agu dili kupwira! Efundo ngano lya ku gwana ngwendi mankupi aga aga yeraukire konontere defuta.”—Jesaya 48:17, 18.
NgoMusiti gwetu, Karunga ga diva nkedi zongwa po omu natu paruka. Age kuna tu harere tu kwame mavyukiso gendi, morwa ngatu gwanena mo uwa wanyamwetu. Apa atu limburukwa konompangera daKarunga, ose kapi twa hepa kulipura nsene asi matokoro getu ngaga tu retera mauwa. Ose narunye ngatu tura po matokoro gouhunga, aga ngaga tu retera mbili noruhafo.
Jehova kapi atu pura tu rugane yininke eyi natu dira kusikisa mo.
“Mpangera ezi nina kumupa naina, kapisi udigu unene ndi asi zi pitakane nonkondo deni.”—Deuteronomium 30:11.
Mokuninka asi tu paruke kuliza nonompango daKarunga, twa hepa kutura po marunduruko monkedi omu atu gazara nomu atu rugana yininke. Nye nampili ngoso, Jehova kapi ana kutupura tu rugane yininke yoyinzi. NgoMusiti gwetu, age ga diva eyi natu vhura kusikisa mo. Ntani hena, moomu tuna kuyadiva Jehova, yimo ngatu ya dimburura asi “yipango yendi, kapi ya kara udigu.”—1 Johanesa 5:3.
Jehova kwa tumbwidira asi nga vatera ava ava paruka kuliza nonompango dendi.
“Nyame HOMPA Karunga goge; ogu ani ku nkondopeke nina kutanta asi: Wa ha tjira, ame tani ku kwafa.”—Jesaya 41:13.
Ose kuvhura tu paruke monkedi ezi ana tu harere Karunga tu paruke, morwa ngatu vatera. Age kuvhura kutuvatera kupitira moNonkango dendi, Bibeli, edi adi tu korangeda nokutupa ehuguvaro.
Mamiliyona govantu kwa ya dimburura asi kuparuka kuliza nonompango daKarunga kwa va vatera meparu lyawo. Lironga ko yoyinzi kuhamena mavyukiso gomawa aga ga kara moBibeli. Kuvhura o tameke kulironga mbapira Hafera eparu narunye! azo kuzigwana ko jw.org/kwn. Amo kwa kara mo yirongwa eyi:
-
Ngapi omu Bibeli nazi kuvatera?
-
Bibeli kugava ehuguvaro lyokomeho
-
Kuvhura o huguvare Bibeli ndi?
Ngomu no konakona Nonkango daKarunga, Bibeli, ngo ya dimburura asi ado simpe mulyo momazuva getu; kuvhura ‘kudihuguvara ntani danarunye.’ (Episarome 111:8) Kukwama nompango domoBibeli kuhamena youhunga neyi yepuko kuna kara nkedi zongwa po ezi natu paruka. Nye nampili ngoso, Karunga kapi ngatu sininika tu kwame nompango dendi. (Deuteronomium 30:19, 20; Josuwa 24:15) Olyo kuna kara etokoro ga hepa kutura po nkenye gumwe gwetu.
