SIRONGWA SOKUHOVA | MORWASINKE JESUS GA HEPERERE NOKUFA?
Ya horokere sili ndi?
Momvhura 33, Jesus goMunasareta kwa mu pangwilire konomfa. Age kwa mu rundilire nokumuswaura nokumutoona ntani nokumupampara kositji. Age kwa fire nomfa dokukora. Nye Karunga kwa mu pindwire koufe, ano konyima zomazuva 40, yipo ga rondere meguru.
Sihorokwa esi kusigwana moMavangeli gane moMatjangwa goRugereka goSikriste, aga ga divikwa asi Etestamende Lyepe. Yininke oyo ya horokere sili ndi? Eli kuna kara epuro eli ava lipura unene vantu. Ngano kapi ya horokere, epuro lyoVakriste ngano kwato mulyo ntani ehuguvaro lyawo lyomwenyo gwanarunye moParadisa ngano tali kara tupu ngwendi nzodi. (1 Vakolinte 15:14) Nsene asi yihorokwa eyi kwa horokere sili, vantu kwa kara nomeho zongwa, ezi nava vhura kutantera ko wopeke. Yihorokwa yomoMavangeli ya horokere sili ndi masanseko tupu?
EYI GA LIKIDA MAUMBANGI
Eyi va tjanga moMavangeli kuhamena Jesus usili, kapisi masanseko. Pasihonena, ago kwa tumbura madina gomavango aga no vhura kukadingura nampili naina. Ago kwa uyunga kuhamena madina govantu, aga va tumbura hena vatjangi woyihorokwa yomouzuni.—Rukasa 3:1, 2, 23.
Vatjangi woyihorokwa yomouzuni monomvhura 200 kutundilira pehampuruko lyaJesus kwa tjenge kumuhamena. * Nkedi ezi va mu dipagere va singonona moMavangeli kwa liza nonkedi ezi ngava ruganesa Varoma mokudipaga vantu. Yihorokwa oyo usili, morwa ya tumbura hena mapuko aga va tulire varongwa vaJesus. (Mateusa 26:56; Rukasa 22:24-26; Johanesa 18:10, 11) Maumbangi nagenye aga kulikida asi eyi va tjenge vatjangi woMavangeli kuhamena Jesus usili ntani kwa vyuka.
NGAPI KUHAMENA EVHUMBUKO LYAJESUS?
Nampili ngomu va yi tambura asi Jesus yipo ga kere ntani kwa mu dipagere, vamwe kusinganyeka evhumbuko lyendi. Nampili vapositoli vendi pomuhowo kapi va yi pulire asi ana pinduka koufe. (Rukasa 24:11) Awo novarongwa vakwaawo kwa ya yi pulire paapa Jesus ga va monekerere poyiruwo yokulisiga. Posikando simwe, age kwa monekerere vantu wokupitakana 500.—1 Vakolinte 15:6.
Nampili ngomu varongwa va va kwete nokuhara kuvadipaga, awo kwa udisire noupampi evhumbuko lyaJesus kwanavenye, kukwatera mo nava va mu dipagere. (Yirugana 4:1-3, 10, 19, 20; 5:27-32) Varongwa owo ngano kapi va divire asi Jesus va mu pindura sili koufe, ngano va zuvhisire noupampi ndi? Usili wevhumbuko lyaJesus kwa tumangeda Vakriste va twikire kuzuvhisa mouzuni dogoro ngesi.
Yihorokwa yomoMavangeli kuhamena nomfa nevhumbuko lyaJesus kulikida asi kwa vyuka pahistoli. Nsene o resa moMavangeli ngayi ku ninkisa o pure nawa-nawa asi yihorokwa oyo kwa horokere sili. Pokukwata egano konda zeyi ya horokerere, epuro lyoge ngali nkondopara. Sirongwa sokukwama ko tasi ka yi faturura.
^ para. 7 Munahistoli gumwe, Tacitus, ogu va hampurukire koyiha yomvhura 55, kwa tjenge asi: “Kristusa, oku lya tundilira edina Vakriste, kwa mu hepekere unene mepangero lyaTibeliusi mepitisiro lyomupanguli gwetu Pontiusi Piratusa.” Suetonius, nomunahistoli, goMujuda Josephus ntani nguuru gwaBitiniya Pliny, nawo kwa tjenge kuhamena Jesus.
