NKENYE mvhura, vantu wokupitakana mamiliyona ntazimwe kuza koShima, evango lyomowiza moYapani mokukakanderera. Kevango oko yiko sa kara sinhwi sakarungakadi sedina Amaterasu Omikami, vantu kwa si karera nomvhura mayovi gavali da ka pita. Ava ava si karere, pomuhowo kulikuhwa vene komawoko nokokana. Makura tava heda komeho zosikarunga nokurugana ukareli wawo pokunyongama nokusakerera ntani nokukanderera. * Vakwatesiko woukareli ou kuvhura hena va lihameke moukareli wapeke, ano Vabuda vamwe ntani nava ava litumbura asi Vakriste, kapi ava yi mono asi epuko kulihameka moukareli ou.

Maukarelikarunga gomanzi mouzuni kwa kara nomavango gokupongoka * oku ava kanderere ntani vantu wovanzi kuza komavango ogo. Moyirongo omu mwa kara ava ava litumbura asi Vakriste, kwa kara mo nongereka dononzi ntani nomavango gokupongoka gokukanderera Jesus ndi Mariya ndi vapongoki. Mavango aga gamwe kwa kara oku ya horokerere yihorokwa yomoBibeli ndi yitetu ndi oku va pungura yiruganeso yomoukarelikarunga. Vantu wovanzi kugazara asi Karunga ta purakene komakanderero gawo nsene va ka kanderera komavango ogo. Ano vamwe kuza komavango ogo mokulikida asi va litura mo moukareli wawo.

Karunga kupurakena nsene asi kuna kukanderera pomavango ogo ndi? Karunga kumuhafesa ukareli wowo ava zi komavango ogo ndi? Ya wapa koVakriste mokuza komavango aga nokukakanderera ndi? Malimbururo komapuro aga kapi tupu naga tu vatera tu dive omu natu tara kukanderera pomavango aga, nye hena naga tu vatera tu kwate egano ukareli ou a tambura Karunga.

Nzogera zaJesus nomukadi goMusamaliya kwa horwere mutaro gwaKarunga kuhamena kukanderera pomavango gokupongoka. Jesus kwa pitire zaSamaliya nokupwizumuka pondjombo pepi nositata saSikara. Makura yipo ga tamekere kuzogera nomukadi ogu ga ya vhetere mema pondjombo. Ngomu va zogerere, mukadi ta tumbura malisigo ga kara pokatji koukareli woVajuda nou woVasamaliya. Age kwa tente asi: “Ozinyakurwetu ngava kanderere kondundu ezi, nye one kutanta asi, moJerusarema yimo mevega lyokukanderera.”—Johanesa 4:5-9, 20.

Ndundu ezi ga tembe mukadi kwa kere Gelisimu, ezi za kara nokilometa 50 komuzogo gwaJerusarema.  Pondundu ozo yipo za kere ntembeli ezi ngava danene Vasamaliya yipito yawo, ngwendi Paska. Mevango lyokudemenena komalisigo aga, Jesus kwa tanterere mukadi asi: “One nane, pureni nge kweyi asi, ngasi wiza siruwo, esi ngomu dira kukanderera Tate kondundu ezi ndi moJerusamema.” (Johanesa 4:21) Ee nonkango musi dononkondo dokutetukisa dokutunda koMujuda! Morwasinke kukarera Karunga kontembeli zomoJerusarema kwa hagerere?

Jesus kwa tente hena asi: ‘Nye siruwo ngasi wiza, nasene nare sina wiza, apa ngava kanderera vakandereli wosili Tate moMpepo nomousili, yeeyi vakandereli vangoso yiwo va hara oTate.’ (Johanesa 4:23) Nomvhura dononzi, Vajuda kwa tere ntembeli zongwa zomoJerusarema ngevango lyawo lyoukareli. Ngava zi ko rutatu momvhura mokukagava nonzambo kwaKarunga gwawo, Jehova. (Exodus 23:14-17) Nye Jesus kwa uyungire asi nayinye oyo ngayi runduruka ano “vakandereli wosili” ngava kanderera “mompepo nomousili.”

Ntembeli zoVajuda kwa kere etungo eli lya kere pevango lyongandi. Nye mpepo nousili kapisi etungo lya kara pevango lyongandi. Eyi yiyo Jesus ga fatwilire asi Vakriste wousili kapi ngava kanderera pevango lyongandi ndi kondundu zaGelisimu ndi kontembeli zaJerusarema ndi evango lyongandi lyokupongoka.

Monzogera zendi nomukadi goMusamaliya, Jesus kwa tumbwire hena asi “siruwo” sokurundurura ukareli waKarunga tasi “wiza.” Siruwoke? Siruwo oso kwa wizire apa Jesus kupitira monzambo zonomfa dendi, ga hagekesere po ukareli woVajuda omu ngava kwama Veta zaMosesa. (Varoma 10:4) Jesus kwa uyungire hena asi: ‘Siruwo, nasene nare sina wiza.’ Morwasinke? Morwa ngaMesiyasa nare ga pongaikire varongwa ava ngava limburukwa mpangera ezi ga uyungire asi: “Karunga Mpepo, ano wokumukanderera ava kanderere moMpepo nomousili.” (Johanesa 4:24) Yisinke ayi tanta kukanderera mompepo nomousili?

Jesus kwa tembe asi mpepo zokupongoka ngazi va vyukisa, nokuvavatera va kwate egano Matjangwa. (1 Vakolinte 2:9-12) Ano usili kwa tembe kediwo lyosili lyomarongo goBibeli. Yipo nye, Karunga nga tambura tupu ukareli wetu nsene  asi kuliza nomarongo goBibeli ntani kutuvyukisa mpepo zokupongoka nye kapisi asi morwa kukanderera pevango lyongandi lyokupongoka.

Ngapi Vakriste nava tara kuza komavango gokupongoka nokukakanderera? Pokukwata egano nonkango daJesus asi vakareli wousili kukarera Karunga mompepo nomousili, kulikida asi kapisi hepero kukanderera pomavango gokupongoka. Ntani hena, Bibeli kututantera omu Karunga a tara kuruganesa mafano moukareli. Azo kutanta asi: ‘Omu suwuruke kukerera vakarunga woyimpempa ndi mafano,’ ntani ‘likungeni nyamweni kovakarunga woyimpempa.’ (1 Vakolinte 10: 14; 1 Johanesa 5: 21) Yipo nye, Mukriste kapi na vhura kukanderera pevango lyongandi eli ava tara asi kwa pongoka ndi eli lya kara nosifano sosikarunga soyimpempa. Nye awo kuyinyokera po.

Eyi kapi yina kutanta asi Nonkango daKarunga kwa silika evango lyewa lyokukanderera ndi lyokulirongera ndi lyokutedera. Evango lyepongo alyo evango lyewa lyokuwapera kulironga nokuzogera yininke yaKarunga. Ntani hena kapi ya kara epuko kutura sidiviso ngwendi emanya peyendo lyagumwe ga fa. Eyi kuna kara ngosidiworokeso tupu ndi mokulikida omu twa here ogo ana fu. Nye, kutara evango olyo asi kwa pongoka ndi kufumadeka mafano kwa lilimba nononkango daJesus.

Yipo nye, kapi wa hepa kuza kevango eli ava tara asi kwa pongoka yipo Karunga a ka zuvhe makanderero goge. Ndi asi Karunga a ku hafere nokukutungika. Bibeli kututantera asi Jehova Karunga, “Hompa geguru nevhu, kapi a kara monontembeli edi va tunga nomawoko.” Nye eyi kapi yina kutanta si Karunga kwa kara ure nose. Kuvhura tu mu kanderere nkenye oku morwa age ‘kapi ga kara ure nose natuvenye.’—Yirugana 17:24-27.