UHWI owo wounene ngano u tu tumangede tu likide rupandu. Jesus kwa rongere sirongwa oso konyima zokuverura vagara murongo ava va kere nouvera woyingondwe. Vagara vena murongo, gumwe tupu ga ka tengwire a ya “fumadeke Karunga nezwi lyenene.” Jesus kwa tente asi: “Nani kapisi murongo vana veruka? Ava vatano-navane kupi?” (Rukasa 17:12-17) Yisinke natu lirongera ko? Ose kulidivara usimbu kweyi ava tu ruganene wopeke.

Sizoweseso, uhwi ou wa lisiga nomauhwi gapeke. Aso kuna kara uhwi wounene po. Ngapi no likida rupandu kweyi ga ku ruganena Karunga?

• Diva mugavi. Nampili ngomu pwa kara sizoweseso, kapi yina kutanta asi vantu navenye ngava gwana mwenyo gwanarunye. Jesus kwa kanderere kwaKarunga asi: “Mwenyo gwanarunye yigo ogu asi va ku dive asi nyovelike Karunga gosili, nogu wa tuma, Jesus Kristusa.” (Johanesa 17:3) Nsene gumwe a ku tantera asi ogu mugara kwa popera eparu lyoge apa wa kere munona, yosili ngo hara kudiva ko yoyinzi kuhamena mugara ogo ntani neyi ga ku poperere. Jehova Karunga, ogu ga ku poperere kupitira mosizoweseso, kapi ana hara tupu o mu dive asi yige yilye, nye ana hara o kare  nelikwatakano nage. Bibeli kwa tanta asi: “Hedeni Karunga pepi, nage a mu hede pepi.”—Jakopo 4:8.

• Likida epuro mosizoweseso. “Ogu a pura Muna, kukara nomwenyo gwanarunye.” (Johanesa 3:36) Yisinke ayi tanta kulikida epuro? Kurugana ko yuma; kupura mosizoweseso twa hepa kukulikida moyirugana. (Jakopo 2:17) Yirugana musinke? Nsene o tambura uhwi tau kara woge. Yipo nye wa hepera kutambura sizoweseso. Monkedi musinke? Lironga omu Karunga ana ku harere o paruke nokurugana kuliza nayo. * Kanderera kwaKarunga a ku gusire po ntani o kare nezwi lyewa lyokomutjima. Hedera Karunga nokuhuguvara asi sizoweseso ngasi gava mwenyo gwanarunye kwanavenye ava ava likida epuro mwaso.—Vahebeli 11:1.

• Kara poMurarero gwaHompa. Jesus kwa rugene silika oso pokutudiworokesa mulyo gosizoweseso. Kuhamena kurugana silika oso, age kwa tente asi: “Omu yi rugane tomu diworokere nge po.” (Rukasa 22:19) Nombangi daJehova ngava rugana silika soMurarero gwaHompa moUvali, 11 Kudumogona 2017 kongurova. Elikwamo ngali kara vili zimwe, kukwatera mo siuyungwa esi ngasi faturura mulyo gonomfa daJesus ntani nomu vantu ngava ka gwanena mo mauwa komeho. Mvhura zina pu, vantu wokusika pomamiliyona 20 mouzuni mudima kwa kere poMurarero gwaHompa. Kuna kukuzigida o ya lipakerere nose mokulikida rupandu kouhwi ou wounene po ga tu pa Karunga.