“MBESA kuvhura zi ze, nye mugara goMutjina ta kara!” Oyo yiyo ga zuvhire mukadi gedina Alexandra ogu ga hingilire mombesa, ezi za pitire pomururani gopokatji kaAmerika Mbindakano nosirongo sapeke. Alexandra makura ta humburuka a tare eyi ya horokere, ta gwana mugara goMutjina kuna kulipukaukira mokuhetekera ko kufatwilira udigu wendi muporosi gopomururani meraka lyoSipanye. Morwa Alexandra nga pongo mombungakriste zoNombangi daJehova zomoRutjina, yipo ga mu vaterere mokumutorokera.

Mugara ogo kwa tente asi ga kara nonombapira dopaveta domosirongo oso, nye va yi mu vaka kumwe noyimaliwa yendi. Pomuhowo, muporosi kapi ga purakenene kosihorokwa oso ntani kwa gazarerere Alexandra asi kuna kuhenesa mugara ogo goMutjina. Konyima ga ya tambwire efatururo lyomugara ogo, nye mugara ga hepere kufuta morwa kudira kukara nonombapira dopaveta. Mokumona asi mugara kapi ga kere noyimaliwa, Alexandra yipo ga mu pere yimaliwa yokusika N$ 267. Mugara gwina kapi ga vhulire kupandura Alexandra ntani kwa mu tanterere asi nga mu tengwidira yimaliwa yokupitakana pweyi ga mu pere. Alexandra ta tantere mugara ogo asi kapisi hepero a mu tengwidire yimaliwa oyo, morwa ga lizuvhire ruhafo kweyi ga rugene yininke youhunga. Alexandra ta pe mugara ogo yimbapiratjangwa nokumukorangeda a ka lironge Bibeli noNombangi daJehova.

Ayo kuhafesa pokuzuvha yihorokwa yokugava nampili kovantu twa dira kudiva, yirugana eyi ava rugana vantu womaukareli nagenye ndi ava va dira kuhamena koukareli. Nove wa kara neharo lyokugava monkedi zangoso ndi? Epuro eli ewa, morwa Jesus kwa tente asi: “Kugava kwa kara nerago, kwa pitakana kutambura.” (Yirugana 20:35) Vapapali kwa yi dimburura asi kugava kuna kara sininke sosiwa. Tu konakoneni nonkedi omu natu yi rugana.

Yihorokwa kulikida asi kugava ntani ruhafo kwa likwatakana. Mupositoli Paurusa kwa tjenge asi: “Karunga kwa hara ava ava gava neharo lyewa.” Age kwa uyungire kuhamena Vakriste ava va geve yigava mokuvatera vapuli vakwawo ava va hepere evatero. (2 Vakolinte 8:4; 9:7) Paurusa kapi ga uyungire asi awo kwa geve morwa va hefe. Nye age kwa tente asi kugava kureta ruhafo.

Mulirongi gumwe kwa tanta asi: “Kugava kutundilira mouruvi nomu wa likwatakana nogo muntu nehuguvaro eli lya kara po ntani nomu o lizuvhu apa o gava.” Mulirongi gumwe hena, kwa tanta asi: “Kugava yimaliwa komuntu kureta ruhafo kupitakana kuyiruganesa nyamoge.”

Wa lizuvha rumwe asi kuliza noukaro woge kapi to vhuru kugava ndi? Yosili, natuvenye kuvhura kulimonena ruhafo ‘rokugava neharo lyewa.’ Nsene wa kara neharo lyokugava, kapi ngo ndindira asi ntudi sa hepa kukara sininke sosinene ntani no si gava. Gumwe goNombangi  daJehova kwa tumine mbudi noyigava kwava ava gavere sifo esi asi: “Nomvhura nadinye edi kapi na vhura kugava, nye tumaliwa otu totusesu tani tu gava koSinyanga soUhompa.” Ta twikire ko asi: “Jehova Karunga ga pa nge yoyinzi kupitakana eyi na gava. . . . Mpandu kweyi mwa vatera nge ni gwane mpito zokugava uhwi ou, ayo kuhengagwida nge.”

Kugava, kapisi asi dogoro yimaliwa. Pwa kara nonkedi dononzi dokugava.

Bibeli kwa tanta asi: “Ove kuliruganena nyamoge uwa, nsene wa ragopa. Nye nsene o mupikipiki to liremekesa nyamoge.” (Yisewe 11:17) Vantu wovawa kwa kara neharo lyokugava siruwo sawo nononkondo dawo. Eyi kuvaninkisa va gwanene mo mauwa mononkedi dokulisiga-siga, kukwatera mo ukanguki wawo.

Valirongi kwa likida asi ava ava lizambere mokuvatera wopeke kusesupika kukora kwawo ntani ruguwo rwawo. Awo kuhafera ukanguki wouwa. Kugava neharo kuwapukurura ukanguki wovantu, ngwendi ava ava hepa kouvera woHIV ntani nomauvera gamwe hena. Ayo kulikida hena asi vantu ava va hageka yikorwesa ntani nokuvatera vakwawo, kusesupika yinka yawo ntani kufunda po nkareso zawo zounkorwe.

Eyi ya karera ngoso, morwa “malizuvho gonkenda kuninkisa o kare nomagazaro gomawa.” Kugava kusesupika sinka ntani erondo honde. Ntani vantu ava ava fisa valikwali vawo kapi ava kara nouvera wokuguva-guva apa ava litura mo mokuvatera wopeke.

Yosili yimo ayi horoka ngoso. Kugava kukuretera uwa.

Jesus kwa tanterere varongwa vendi asi: “Omu gave, none ngava mu pe. Siheteko esi va sinda va nyunganga sa zulilira, ngava si mu tentekera momavha geni. Yeeyi sihetekeso esi omu hetekesa, yiso ngava mu hetekesera none.” (Rukasa 6:38) Nsene o gava, vantu ngava honena ugavi woge norupandu ntani ngayi va ninkisa va kare nougavi. Kugava kuninkisa vantu va ruganene kumwe nokukara vakaume.

Valirongi ava va lirongo elikwatakano lyovantu va yi dimburura asi “vantu ava ava gava kukorangeda wopeke va rugane yokulifana.” Yipo nye, “kuresa kuhamena omu vantu ava likida nkenda kuninkisa wopeke va kare nonkenda.” Mulirongi gumwe kwa tanta asi “nkenye eyi a rugana muntu kuvhura kukundama vantu wovanzi, nampili ava ga dira kudiva ndi ga dira kumona.” Monkango zimwe, muntu gumwe nsene a kara nonkareso zougavi kuvhura kuninkisa vantu navenye womomukunda va kare ugavi. Nove ono hara kukara momukunda gwangoso ndi? Yosili, ngatu gwanena mo mauwa gomanzi nsene vantu wovanzi va liyomberesa kugava.

 Sihonena simwe sa yi likida eyi kuna kara somoFlorida, U.S.A. Mbunga zoNombangi daJehova kwa lizamberere kukavatera konyima zapa lya horokere ekundungu lyenene. Ngomu va ndindilire yiruganeso yokutungisa embo eli va wapukwilire, tava dimburura asi ndarate zomusinda gumwe kwa zonaukire, makura tava zi wapeke. Konyima zosiruwo, musinda ogo kwa ya tjangerere mbilive mberewa zonene zoNombangi daJehova asi: “Ame simpe nina hafa. Morwa kapi na mona rumwe vantu wovawa wonkenda ngwendi nyone.” Eyi ya mu tumangedere a tume yigava va ka yi ruganese mosirugana soNombangi daJehova mouzuni mudima.

Valirongi kwa yi dimburura asi: “Ayo kwa moneka asi kugava kuninkisa vantu va vatere vakwawo.” Kwa yi tanta hena asi nampili vanonagona “nawo kuvhura va lironge kugava komeho va tameke kuuyunga.” Morwasinke? Bibeli za gava elimbururo apa azi tanta asi vantu kwa va sita “va fane Karunga,” eyi kulikida asi va kara noyikara ngwendi yendi.—Genesis 1:27.

Ugavi kuna kara sikara simwe soMusiti gwetu, Jehova Karunga. Age kwa tu pa eparu nanayinye eyi twa hepa yipo tu hafe. (Yirugana 14:17; 17:26-28) Pokulironga Nonkango dendi, Bibeli, ose kuyadiva nawa Guhyetu gemeguru ntani nositambo sendi kovantu. Bibeli kwa kulikida asi Karunga kwa tura po ewapaiko lyomeho zetu zoruhafo. * (1 Johanesa 4:9, 10) Mokumona asi Jehova Karunga yige mugavi gomunene ntani kwa tu sita tu mu fane, ya wapa kugava mokuhonena Karunga, ayo yiwa koge ntani Karunga nga ku hafera.—Vahebeli 13:16.

To diworoka mukadi gedina Alexandra ogu vana tumbura ketameko lyosirongwa esi ndi? Yitundwamo musinke ya kere mosihorokwa sendi? Nampili ngomu mukwawo ogu va rondere nage mombesa ga tente asi ga hepekere yimaliwa yendi, mugara gwina ga vaterere Alexandra ga gwene vakaume vendi mositata omu adi sikamene nombesa, ano N$ 267 zomakongo ga zi futire. Mugara gwina ga tambwire egano lyaAlexandra makura ta ka tameka kulironga Bibeli. Alexandra kwa hefe apa ga ka mwene mugara gwina posigongi semeraka lyoRutjina soNombangi daJehova moPeru. Mokulikida rupandu kweyi ga mu ruganena Alexandra, mugara ogo ga zigidire munazinyetu korestauranda zendi nanavenye ava va zire nage kosigongi.

Kugava ntani kuvatera wopeke kureta ruhafo rorunene. Nye unene po kuvhura o vatere vantu va dive nawa Ntundiliro zomauhwi nagenye gomawa, Jehova Karunga! (Jakopo 1:17) Nove kuna kuhafera mauwa aga aga tundu mokugava ndi?