SIRORESO sonopena mokuwoko kwaJordan sokufana sikepa kumoneka ngwendi kwato mulyo. Nye awo kuna kara uhwi wouwa po kwendi. Jordan kwa tente asi: “Russell, kaume gekoro lyetu, yige ga pere nge uhwi ou apa na kere munona.” Konyima zonomfa daRussell, Jordan ga ya dimbwilire asi Russell moyiruwo youdigu nga korangeda omama vendi wovagara ntani vakurona vendi. Jordan kwa tanta asi: “Mokumona asi yinzi na diva kuhamena Russell, uhwi ou ga pere nge mulyo unene.”

Ngomu sa yi likida sihorokwa saJordan, vapeke kuvhura va dire kudimburura mulyo gouhwi ndi va u tare asi kwato mulyo. Nye ogu vana u pe kukara norupandu ntani kuutara asi mulyo unene. MoBibeli kusingonona uhwi womulyo po komauhwi nagenye, azo kutanta asi: “Yeeyi Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.”—Johanesa 3:16.

Uhwi wokugava mwenyo gwanarunye kogu ana kuutambura, wa pitakana mauhwi nagenye. Nampili vamwe va dire kudimburura mulyo gouhwi ga gava Karunga, nye koVakriste wousili kuutara asi ‘ndiro’ ndi mulyo unene. (Episarome 49:8; 1 Peturusa 1:18, 19) Morwasinke Karunga ga gaverere eparu lyaMunwendi li kare uhwi kovantu navenye?

Mupositoli Paurusa kwa fatwilire asi: “Nzo muntu gumwe tupu ga zi reta mouzuni. Ano nzo zendi kwa reta mo nomfa. Nomfa yiyo da lihanena movantu mudima.” (Varoma 5:12) Morwa Adamu, muntu gokuhova kapi ga limburukwire Karunga mowina, ano yitundwamo ga fire. Nzo zaAdamu kwa reta nomfa kovantu navenye uzuni mudima.

 “Yeeyi mfeto zononzo nomfa, nye uhwi wonkenda waKarunga yiwo mwenyo gwanarunye mwaJesus Kristusa, Hompa gwetu.” (Varoma 6:23) Mokumangurura vantu konomfa, Karunga yipo ga tumine Munwendi Jesus Kristusa a ya gave eparu lyendi lyokusikilira mo kovantu. Ano morwa nzambo ‘zosizoweseso’ saJesus, navenye ava ava tura epuro mwendi ngava gwana mwenyo gwanarunye.—Varoma 3:24.

Ano morwa matungiko nagenye aga a gava Karunga kovakareli vendi kupitira mwaJesus Kristusa, Paurusa kwa tente asi: “Tu pandureni Karunga morwauhwi wendi wokudira kuvhura kutanta!” (2 Vakolinte 9:15) Yosili, sizoweseso kuna kara uhwi womulyo po. Komauhwi nagenye aga a gava Karunga kovantu, morwasinke uhwi wosizoweseso wa karera nomulyo po kupita nagenye? Monkedi musinke wa lisiga nomauhwi gapeke? * Yisinke wa hepa ku rugana ko? Tatu ku hundire o gwane malimbururo gokutunda moBibeli pokuresa yirongwa yivali eyi yina kukwama ko.