EE, MEHO MUSI KOUWA! Musiti gwetu kwa tumbwidira mokukatupa mwenyo gwanarunye paapa pevhu. Nye vamwe kuvadigopera mokuyipura. Awo kutanta asi ‘muntu kufa, morwa yimo tupu ya kara meparu.’ Ano vamwe kutanta asi kuvhura kuparuka narunye, nye kapisi paapa pevhu. Awo kutanta asi ntudi o fe o ze meguru ntani no ka paruka narunye. Ove yisinke wa pura?

Komeho o limburure epuro eli, tanko konakona mapuro aga gatatu: Yisinke ayi likida asi muntu kwa mu sita a paruke narunye? Yisinke Karunga ga sitira evhu novantu? Ngapi omu nomfa da wiza movantu?

Koyisitwa nayinye eyi ga sita Karunga muntu yige va sita monkedi zokulikarera. Monkedi musinke? Bibeli kutanta asi muntu kwa mu sitire a “fane” Karunga. (Genesis 1:26, 27) Yisinke ayi tanta eyi? Eyi kutanta asi muntu kwa mu sitire a vhure kuhonena yikara yaKarunga ngwendi eharo ntani uhungami.

Ntani hena, vantu kwa va sita nevhuliko lyokugazara va vhure kuhangura uwa koudona ntani va kare neharo lyokudiva Karunga nokukara vakaume vendi. Eyi yiyo ayi tu ninkisa tu hafere unsitwe nokukara noudivi wokurugana yininke nokuhafera nomusika ntani masimwititi. Unene po, vantu va kara nevhuliko lyokukarera Karunga. Ano eyi kulikida asi vantu va lisiga noyisitwa nayinye yepevhu eyi ga sita Karunga.

Kuvhura nye Karunga a pe vantu yikara oyo yokulikarera nsene asi age kwa here va paruke tupu karuwogona apa pevhu ndi? Hawe, usili kuna kara asi Karunga kwa pa vantu yikara oyo yipo va hafere eparu paapa pevhu.

Vamwe kutanta asi kapisi sitambo saKarunga asi vantu va kare pevhu narunye nanarunye. Awo kuuyunga asi pevhu kwa wiza po tupu ugenda, yipo Karunga a ya va heteke nokutara nsene asi awo va wapera kuza meguru va ka paruke narunye kumwe nendi. Nsene asi eyi usili, ngoso Karunga yige nye a retesa po udona noruhepo oru runa vhuka apa pevhu ndi? Oyo tayi lirwanesa noyikara eyi ga kara nayo Karunga. Bibeli kutanta asi: “Karunga gweni Mulimburukwi, age Munasili, age  kurugana eyi ya vyuka, ya hungama.”—Deuteronomium 32:4.

Bibeli kuhorora sitambo saKarunga seyi ga sitira evhu, azo kutanta asi: ‘Eguru lyaHOMPA mwene, ano evhu ndi uzuni yiwo ga pa ko vantu.’ (Episarome 115:16) Yosili, Karunga kwa sitire evhu nokuliwapaika nokutura po nayinye eyi va hepa vantu yipo va kare po narunye.—Genesis 2:8, 9.

‘Eguru lyaHOMPA mwene, ano evhu ndi uzuni yiwo ga pa ko vantu.’​—Episarome 115:16

Bibeli za yi zeresa nawa-nawa eyi Karunga ga sitira vantu. Age kwa tanterere valikwali wokuhova asi: “Livhareni mu zwide evhu, makura ruvharo rweni ngaru li pangere. . . . Tani mu pe nonkondo dokupangera nomfi noyidira noyikorama nayinye yoyinene neyi yoyinunu.” (Genesis 1:28) Ee, situmbukira musi sosiwa va va pere mokupakera mbili evhu nalinye nokulininka li kare Paradisa! Eyi kulikida asi Karunga kwa harerere Adamu naEva novana vawo va kare narunye paapa pevhu, kapisi meguru.

Morwasinke atu fire? Bibeli kutanta asi muengeli gumwe gwaKarunga, ogu ga ya kere Satana Muzonaguli, kwa rwanesere sitambo saKarunga moEdeni. Ngapi omu ya horokere?

Satana kwa zedere vakondi vetu wokuhova, Adamu naEva va rwanese Karunga. Age kwa va kumbagerere asi Karunga kwa va horekera yoyiwa, yokugwana nondunge dokudiva yoyiwa neyi yoyidona, makura nawo yipo va kweme yaSatana nokurwanesa Karunga. Yitundwamo? Awo va ya fire ngamoomu ga va tanterere Karunga. Awo va zumbanesere mpito zokukara narunye moParadisa paapa pevhu.—Genesis 2:17; 3:1-6; 5:5.

Morwa Adamu naEva kwa rwanesere Karunga, eyi kwa tu kundama natuvenye momudona. Bibeli kutanta asi: “Nzo, muntu gumwe tupu ga zi reta mouzuni. Ano nzo zendi kwa reta mo nomfa. Nomfa yiyo da lihanena movantu mudima, morwa vantu navenye kwa zona.” (Varoma 5:12) Ose kufa morwa twa pinga nzo nonomfa kovakondi vetu wokuhova Adamu naEva, nye Karunga kapi ga harerere vantu va fe.

Urwanesi womoEdeni kapi wa kondera Karunga mokukasikisa mo sitambo sendi seyi ga sitira vantu nevhu. Morwa eharo nonkenda zendi, Karunga kwa rugene ko yuma yipo a tu zowore mo mononzo nomonomfa eyi twa pinga. Mupositoli Paurusa kwa fatwilire asi: “Mfeto zononzo nomfa, nye uhwi wonkenda waKarunga yiwo mwenyo gwanarunye mwaJesus Kristusa, Hompa gwetu.” (Varoma 6:23) Morwa eharo, Karunga kwa geve “Munwendi gelike a huru [Jesus Kristusa], asi nkenye ogu a mu pura a dire kuzonauka, nye a kare nomwenyo gwanarunye.” (Johanesa 3:16) Apa Jesus ga geve eparu lyendi ngonzambo zosizoweseso, age kwa futire eyi ga zumbanesere Adamu. a

Ntaantani tupu etumbwidiro lyaKarunga lyoParadisa apa pevhu li ka sike mo. Nsene nove ono hara kukamona omu lina kusika mo, sikisa mo epukururo eli lyaJesus asi: “Omu hwililire mevero lyenunu, yeeyi evero kwa nenepa, ano nzira kwa ngwanyunuka, ezi azi twara kokudona. Sinzi sovantu yimo ava gendi. Nye evero ko enunu, ano nzira kwa likokera, ezi azi twara komwenyo, ano ava ava zi gendi vasesu.” (Mateusa 7:13, 14) Yosili, matokoro goge kukundama eparu lyoge! Yisinke no rugana?