WA TOKORA OMU NGALI KA KARA EPARU LYOGE KOMEHO NDI? Vamwe kwa yi pura asi va kara nononkondo dokuvhura kutokora omu ngali kara eparu lyawo. Apa ayi dili kusika mo, awo kuguva. Awo kuuyunga asi: “Yimo ngorooro ga yi tokora Karunga asi kapi ngayi va tompoka!”

Vamwe kuvaguvisa apa ava mono asi kapi yina kuvatompoka mouzuni ou woudona wonyanya tuna kuparuka. Awo kuhetekera ko kuninka eparu lyawo li wape nye yita noukorokotji noyimpagwa nomauvera kuvaninkisa yi dire kuvatompoka. Awo kulipura asi: ‘Morwasinke?’

Yosili, maukaro gemeparu kuninkisa yininke eyi tuna kugazara yi dire kusika mo. (Muudisi 9:11) Nampili ngoso, kuhamena eparu lyetu lyokomeho, twa hepa kutokora nawa. Bibeli kulikida asi eparu lyetu kwa korera momatokoro getu. Tarurura eyi za uyunga ko.

Mosesa ogu ga pitisilire muhoko goVaisraeli, apa va kere pepi nokuhwilira moSirongo sEtumbwidiro kwa tanterere vantu asi: “Ame ngesi tani mu pe ehoroworo pokatji komwenyo nonomfa nopokatji ketungiko lyaKarunga nefingiliro lyaKarunga. . . . Horoworeni po mwenyo. Hareni Hompa Karunga gweni, tomu mu limburukwa oku tomu mu huguvara.”—Deuteronomium 30:15, 19, 20.

“Ame ngesi tani mu pe ehoroworo pokatji komwenyo nonomfa nopokatji ketungiko lyaKarunga nefingiliro lyaKarunga, Horoworeni po mwenyo.”​—Deuteronomium 30:19

Yosili, Karunga ga zowere Vaisraeli moupika moEgipite ntani ga va pere ehuguvaro lyokukahafera eparu moSirongo sEtumbwidiro. Nye nayinye oyo kapi ya horokere tupu va hana kurugana ko yuma. Mokugwana matungiko ogo, awo va hepere ‘kuhorowora po mwenyo.’ Ngapi omu va yi rugene? Awo ‘va here Karunga gwawo, nokumulimburukwa nokumuhuguvara.’

Mokulifana, nove wa hepa kutura po etokoro, ano etokoro lyoge kukundama omu ngali ka fana eparu lyoge komeho. Nsene tu hara Karunga nokumulimburukwa ntani nokumuhuguvara, ose ngoso kuna kuhorowora po mwenyo gwanarunye moparadisa paapa pevhu. Nye yisinke ya hamena mo?

Eharo kuna kara sikara saKarunga sosinene po. Mupositoli Johanesa kwa tjenge asi: “Karunga yige eharo.” (1 Johanesa 4:8) Apa Jesus va mu pulire asi sipango musinke sosinene po poyipango nayinye, age kwa tente asi: “O hare Hompa Karunga goge nomutjima goge nagunye nomwenyo goge nagunye nonondunge doge nadinye.” (Mateusa 22:37) Elikwatakano lyewa naJehova Karunga kwa korera omu wa mu hara. Morwasinke natu harera unene Karunga?

Jehova kwa hara vantu ngwendi moomu vakurona va hara vana vawo. Nampili ngomu twa dira kusikilira mo, vakurona veharo kuronga vana vawo nokuvakorangeda nokuvavatera nokuvapisura morwa kwa va harera va hafe ntani yi va tompoke meparu. Nye yisinke vana hara ko vakurona kovana vawo? Awo kuna hara vana vawo va va hare ntani va sikise mo eyi va va ronga yipo va gwanene mo mauwa. Guhyetu gemeguru nage kuna hara asi tu mu hare nokumupandura kwanayinye eyi ga tu ruganena.

Meraka lyokuhova eli va tjenge Bibeli, nkango “kupurakena” kutanta asi “kulimburukwa.” Eyi yiyo atu tamba apa atu tantere munona asi “purakena kovakurona woge.” Kupurakena kwaKarunga kwa tamba kulironga ntani kulimburukwa eyi a tanta. Nampili ngomu atu dili kuvhura kuzuvha ezwi lyaKarunga, apa atu resa Bibeli nokusikisa mo eyi tuna kuresa, ose ngoso kuna kupurakena kwendi.—1 Johanesa 5:3.

Mokunkondopeka mulyo gokupurakena kwaKarunga, Jesus kwa tente asi: “Muntu kapi a paruka komboroto zelike, muntu kuparuka kwankenye nkango ezi azi tundu mokana kaKarunga.” (Mateusa 4:4) Moomu tupu da kara nondya nomulyo kwetu, kulironga unongo waKarunga kwa kara nomulyo unene kwetu. Morwasinke? Hompa Saromo kwa tente asi: “Ngau ku popera unene, moomu ayi ku popere yimaliva. Unongo tau ku gamene, ou yiwo uwa wediwo.” (Muudisi 7:12) Unongo nediwo lyokutunda kwaKarunga ngayi tu popera ntani ngayi tu vatera tu ture po etokoro eli ngali tu ninkisa tu ka gwane mwenyo gwanarunye komeho.

Diworoka sifanekoso saJesus tuna zogere mosirongwa sa ka pita, omu ga tente asi: “Evero ko enunu, ano nzira kwa likokera, ezi azi twara komwenyo, ano ava ava zi gendi vasesu.” (Mateusa 7:13, 14) Kugenda monzira ozo, ngazi tu twara tu ka gwane mwenyo gwanarunye. Yipo nye, ose twa kara nokonda zongwa zeyi natu karera pepi naKarunga. (Episarome 16:8) Nye ngapi natu kara pepi naKarunga?

Yininke yinzi atu vhuru kurugana nkenye ezuva ntani neyi twa hara kurugana. Yininke oyo kutuninkisa tu dire kugwana siruwo sokurugana eyi ana tu harere Karunga. Eyi yiyo azi tu korangedere Bibeli asi: “Omu litakamese nye omu nomu kara. Omu vangarare ngwendi vanandunge, kapisi mu kare ugova. Nkenye aka karuwo muna gwana, kukaruganesa nawa, yeeyi mazuva aga madona.” (Vaefeso 5:15, 16) Ose kukara pepi naKarunga apa atu tura elikwatakano lyetu nage muhowo.—Mateusa 6:33.

Nampili ngomu no dira kurundurura eyi ya horoka konyima, kuvhura o rugane ko yuma yipo o wapaike nawa meho zoge nezi zava vemepata lyoge. Bibeli kutanta asi Guhyetu gemeguru, Jehova Karunga, ga tu hara unene ntani ga tu tantera eyi ana tu harere tu rugane. Konakona nonkango domuporofete Mika:

“Hawe, Karunga ga tu tantera yoyiwa po asi yipi. Eyi ga hepa ko kwetu yeyi: tu rugane youhunga ose tu kare neharo lyanarunye, tu kare nelinunupiko melikwatakano naKarunga gwetu.”—Mika 6:8.

Tambura ezigido lyaJehova lyokugenda kumwe nage yipo ngo ka gwane mwenyo gwanarunye. Alyo kuna kara etokoro lyoge!