Ngesi mbudi zongwa zoUhompa kuna kuzidivisa mwaza uzuni mudima ngamoomu ga yi pumbire Jesus. (Mateusa 24:14) Mobuke zaNdaniyera kutanta asi Uhompa owo kwa tamba epangero lyaKarunga. Megaununo 2 kwa tumbura mo omu ga likwama-kwama mapangero govantu kutundilira kepangero lyaBabironi dogoro momazuva getu. Ano movelise 44 kwa pumba mo eyi ngayi ka horoka komeho asi:

‘Karunga gemeguru nga dika Uhompa ndi sirongo esi ngasi karerera narunye. Aso kapi ngava si funda nampili kanunu, nye ngasi hanagura yirongo oyo nayinye, makura tasi kara dogoro narunye.’

Uporofete ou woBibeli ntani nagamwe hena, kwa pumba asi Uhompa waKarunga ngau ka zonagura po mapangero nagenye govantu nokukaretera vantu mbili apa pevhu. Ngapi omu ngali ka fana eparu? Tara matumbwidiro aga tuna kundindira aga ngaga ka sika mo.

• YITA KAPI NGAYI KA KARA KO

  Episarome 46:9: “[Karunga] kwa hageka yita mouzuni mudima; ga tezagura mauta, yiyo ga haraganesa magonga, yilikandwiso yiyo ga yi hwika momundiro.”

  Gazara omu ngau ka fana uzuni, apa epangero ngali ka dira kukaruganesa yimaliwa mokukaranda yirwiso, nye ngava ka yi ruganesa mokuvateresa ko vantu. Etumbwidiro eli ngali ka sika mo tupu mepangero lyaKarunga.

• MAUVERA KAPI NGAGA KA KARA KO

  Jesaya 33:24: “Nagumwe si gomosirongo . . . nga sivana asi ta vere.”

  Gazara omu ngau ka fana uzuni, apa ngayi ka kara asi kwato ogu ana kuvera mutjima ndi kankera ndi maralia ndi nkenye tupu uvera. Kapi ngatu ka hepa yipangero ndi nomutji. Vantu navenye ngava ka kara noukanguki wouwa.

• NZARA KAPI NGAZI KA KARA KO

  Episarome 72:16: “Ewogo lyoyisima ngano tali kara mosirongo; nondundu ngano tadi zura muzangu.”

  Evhu ngali gava muzangu gomunzi, vantu navenye ngava kara nonondya dokugwanena po. Nzara nouvera wonzara kapi ngayi ka kara ko hena.

• KUKORA NEGUWO NONOMFA KAPI NGAYI KARA KO

  Ehororo 21:4: “Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.”

   Eyi kutanta asi vantu ngava ka paruka narunye moparadisa apa pevhu. Jehova Karunga, Musiti gwetu, yige ga yi tumbwidira eyi.

Ngapi ono kulizuvha kuhamena matumbwidiro aga? Nampili ngomu vantu wovanzi va pura asi eparu eli za tumbwidira Bibeli ngali ka sika mo, nye vamwe simpe kuvadigopera kuyipura morwa nokonda dongandi. Oyo kapi ayi tu tetukisa, morwa kwato ogu ga paruka rumwe eparu lyangoso ogu na vhura kuyigavera umbangi.

Mokumona asi vantu kwa kara moupika wononzo nonomfa, ayo kwa reta kukora noruhepo nomaudigu. Ntani kwa ninkisa vantu wovanzi va pure asi nampo yimo ngorooro ga yi harera Karunga. Nye esi kapisi yiso sitambo seyi ga sitira Jehova Karunga vantu.

Mokutuvatera tu yi kwate egano asi eyi ga tumbwidira ngayi ka sika mo, Bibeli kutanta asi: “Nonkango dange edi adi tundu mokana kange yimo ngadi kara: kapi ngadi tengwira kwange mawoko-woko, nye ngadi rugana eyi na di harera, ado ngadi ragopa nakunye oku ngani di tuma.”—Jesaya 55:11.

Jehova kwa mu singonona moBibeli asi “Karunga ogu a dili kutanta yimpempa.” (Titusa 1:2) Mokumona asi Jehova yige ga tumbwidira yininke nayinye eyi, ayo ya wapa tu gazadare ko komapuro aga asi: Vantu sili ngava ka paruka narunye moParadisa apa pevhu ndi? Yisinke natu rugana yipo ngatu ka gwanene mo uwa momatumbwidiro gaKarunga? Resa sirongwa sokukwama ko yipo o gwane malimbururo komapuro aga.