Ngomu vana yi zogere mosirongwa sina piti, Croesus kwa mu pukisire nompumbi domoDelphi eyi ya twaredesere dogoro aka mu funde hompa gwaPeresiya. Nye moBibeli mwa kara mauporofete gokutetukisa kuhamena hompa gwaPeresiya aga ga ya sikire mo konyima.

Konyima zonomvhura 200 komeho hompa gwaPeresiya va ka mu hampuruke, muporefete Jesaya kwa pumbire ogu nga zonagura po sitata saBabironi, kwa mu tumbwire asi Koresi ntani nokufaturura omu ngayi horoka.

Jesaya 44:24, 27, 28: “Ame nyame HOMPA, muparuli goge . . . Ame kwa pwilika efuta norufuro rompangera. Makura tani tantere Koresi asi: ‘Ove nyove ngo pangerera nge mo, ngo rugana eyi nina ku harere asi yiyo ngo rugana; ngo panga asi Jerusarema va mu tungurure ano etateko lyontembeli va li ture po.’”

Kuliza nehistoli, vakwayita vaKoresi kwa simine mukanko va pwilike mukuro gwaEfurata ogu gwa kundurukidire sitata saBabironi. Koresi novakwayita vendi kwa rutire mukuro va hwilire mositata. Konyima zokuzonagura po sitata nasinye, makura Koresi yipo ga mangwilire Vajuda ava va kere mounkwate moBabironi va tengure koJerusarema.

Jesaya 45:1: “HOMPA kwa horowere Koresi a kare hompa! Age kwa mu tulire po a kwate nomuhoko; ta mu tumu a guse ohompa nonkondo; HOMPA nga mu zegwilira marungavero goyitata.”

Vaperesiya kwa hwililire mositata morwa Vababironi kwa sigire marungavero gomanene gositata gavali ago kuna zeguruka. Ngano Vababironi va divire eyi ga here kurugana Koresi, ngano va zedilire marungavero nagenye gositata. Nye sitata kwa kere muzahamena.

Ou kuna kara uporofete ou wa ya sikire mo. a Mokulisiga neyi ava pumbu vantu, mauporofete gomoBibeli kwa ga retesa po Karunga ogu ga tanta asi: “Kutunda ketameko ame kwa horora eyi ngayi wiza; kwanare na pumba eyi ngayi horoka.”—Jesaya 46:10.

Karunga gedina Jehova gelike gokuvhura kugava umbangi owo. Morwa edina lyendi kutanta asi “kuninka yi kare po.” Age ga diva yokomeho kuliza nompango zendi. Eyi kutupa ehuguvaro asi  age nga ka sikisa mo matumbwidiro gendi nagenye gokomeho.

Ono hara kudiva mauporofete gomoBibeli aga gana kusika mo momazuva getu ndi? Nomvhura 2 000 da ka pita, Bibeli kwa pumba asi: “Pomazuva gopouhura ngapa kara yiruwo yoyidigu.” Yisinke mazuva gopouhura? Kapisi uzuni ndi vantu ngava haga po, nye nomukaro donondona ntani noruhepo yiyo ngayi haga po. Tu konakoneni mauporofete gamwe aga ga pumba kuhamena “mazuva gopouhura.”

2 Timoteusa 3:1-5: “Pomazuva gopouhura  . . . vantu ngava lihara tupu vene, ngava dowokera yimaliva, ngava lifumadeka, ngava linenepeka, ngava kara woyitjani, kapi ngava zuvha yovakurona vawo, kapi ngava paka mpandu, kapi ngava pongoka, Awo kapi ngava paka nkenda, ngava kara woyimbokauka novarundili, vankenye omu nava woyikotjongana, awo kwa nyenga yoyiwa, Awo ngava kara nombudi novalingi-lingi novalitumbi, ngava hara mahafo goparutu kupitakanesa omu va hara Karunga. Awo ngava moneka ngwendi vakereliKarunga, nye nonkondo damo ngava di nyoka.”

Nove no yi kwatesa ko asi nkareso ezi, yizo tuna kumona movantu naina. Vantu kwa lihara tupu vene nokudowokera yimaliwa nokulinenepeka. Vantu naina kwa liharera tupu uwa wavene ntani kapi ava lizuvhu novakwawo. Vanona kapi vana kulimburukwa kovakurona vawo ntani vantu kuna hara mahafo goparutu kupitakanesa omu va hara Karunga. Ntani yininke kuna kuligwederera kudonapa nkenye ezuva.

Mateusa 24:6, 7: “One ngomu zuvha yita nonomukukumo dayo. . . . Nomuhoko ngadi lilimba-limba, ano yi kare yirongo, nayo ngayi lilimba-limba.”

Vakonakoni vamwe kwa yi ngungunyikira asi sivaro sovantu womonomuhoko nadinye ava va fa moyita kutunda 1914, kwa pitakana mamiliyona 100. Gazara tupu ruguwo noruhepo oru ya reta yita yina. Nye nomuhoko kapi adi vhuru kuhagekesa po yita.

Mateusa 24:7: “Napenye ngapa kara marumbu.”

Mbunga ezi za kara nosinka seyi yonondya uzuni mudima kwa tente asi: “Ose kugavera nondya kwankenye gumwe, nye simpe kumoneka asi vantu mamiliyona 815 kurara nonzara nkenye ezuva. Ano vamwe kuvera uvera wonzara.” Ayo kwa yi ngungunyikira asi nkenye mvhura, vanona wokusika pomamiliyona gatatu kufa kouvera wonzara.

Rukasa 21:11: “Ako ngaku kara makankamo gomanene gevhu.”

Nkenye mvhura makankamo gevhu gomanene gokusika 50 000 kuna kudipaga vantu. Gamwe gokusika 100 kwa zonagura matungo ntani nkenye mvhura limwe lyomakankamo gevhu gomanene kuhoroka. Kuliza nekonakono limwe, kutundilira momvhura 1975 dogoro 2000 makankamo gevhu kwa dipaga vantu wokusika 471 000.

Mateusa 24:14: “Nye Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.”

Nombangi daJehova dokupitakana mamiliyona ntantatu kuna kuzuvhisa mbudi zongwa zoUhompa mouzuni mudima moyirongo yokusika 240. Awo kuzuvhisira moyitata nomonomukunda nomomawiza nomonondundu. Uporofete kwa pumba asi apa Karunga mwene nga ninka asi sirugana sina pu, “ntani nye ngaku kwama uhura.” Yisinke ayi tanta eyi? Kutanta asi epangero lyaKarunga ngali ka hagekesa po mapangero nagenye govantu. Uporofete musinke ngau ka sika mo apa epangero lyaKarunga ngali ka pangera pevhu? Elimbururo no ligwana mosirongwa sokukwama ko.