YIRONGWA yina ka pita, yina zogere omu maudigu aga ninkisa eparu limoneke ngwendi udigu kulididimikira. Ngo omu ono kupita momaudigu kuvhura yi ku ninkise o gazare asi eparu kwato mulyo ndi asi kwato ogu a ku pakere mbili. Kara nehuguvaro asi Karunga kukupakera mbili. Ove mulyo kwendi.

Mutjangi gEpisarome 86 kwa likidire ehuguvaro lyendi mwaKarunga pokutanta asi: “Ame kukuzigida posiruwo soudigu, yeeyi ove kuzuvha ekanderero lyange.” (Episarome 86:7) Kuvhura o lipure asi: ‘Ngapi omu Karunga nga vatera nge “posiruwo soudigu”?’

Nampili ngomu Karunga na dira kugusa po maudigu goge poopo, nye Bibeli kutupa ehuguvaro asi age nga tu pa mbili zomomutjima yipo tu lididimikire. Azo kutanta asi: “Walye omu kara nosinka soyuma. Nye momakanderero geni omu hundire nkenye eyi muna hepa kwaKarunga. Omu yi hundire nkenye apa nonomutjima dompandu. Ano mbili zaKarunga, ezi za pitakana unene nondunge nadinye, ngazi kungira nomwenyo deni nomagazaro geni.” (Vafilipi 4:6, 7) Matjangwa aga gana kukwama ko kulikida omu Karunga a tu pakere mbili.

“Nye nalimwe si eli [enzunge] ga divara ko Karunga. . . . , yeeyi asi one mwa pitakana manzunge gomanzi.”—Rukasa 12:6, 7.

GAZADARA KO: Manzunge kuna kara yidira eyi atu tara asi kwato mulyo, nye Karunga kuyitara asi mulyo. Age kapi a divara po nampili enzunge limwe, yisitwa nayinye Karunga kuyitara asi mulyo. Vantu kwa pitakana manzunge momulyo. Vantu kuna kara yisitwa yomulyo po unene kwaKarunga, morwa kwa va sita va mu “fane,” awo kwa kara noyikara ngwendi yendi.—Genesis 1:26, 27.

“HOMPA, ove kwa kona-kona nge, yiyo wa diva nge! . . . Ure-ure o divire magazaro gange nagenye. . . . Tara nge, o koneke magazaro gange.”—Episarome 139:1, 2, 23.

GAZADARA KO: Karunga ga ku diva. Ga diva malizuvho goge nagenye noyinka yoge. Nampili ngomu vantu nava dira kukwata egano ukaro woge, Karunga kukukwata egano ntani ana hara kukuvatera. Eyi kulikida asi eparu mulyo.

“Purakena ekanderero lyange HOMPA, zuvha nkugo zange morwekwafo! . . . Purakena nge, ove o zuvhe nge usimbu nsene tani ku zigida. . . . Nga zuvha vantu vendi.” —Episarome 102:1, 2, 17.

GAZADARA KO: Kutunda tupu apa vantu va tamekere kuligwanekera nomaudigu, Jehova kumona mahodi gawo. (Episarome 56:8) Eyi kwa kwatera mo nomahodi goge. Karunga kudiworoka maudigu goge nagenye morwa ove mulyo kwendi.

“Ame nyame Karunga goge – patupu yokukutjilisa! Ngani ku nkondopeka tani ku kwafa; . . . Nyame HOMPA Karunga goge; ogu . . . nina kutanta asi: Wa ha tjira, ame tani ku kwafa.” —Jesaya 41:10, 13.

GAZADARA KO: Karunga ga liwapaikire mokukuvatera. Nsene ono dompo mutjima, age nga ku nkondopeka.

“Yeeyi Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.” —Johanesa 3:16.

GAZADARA KO: Ove mulyo unene kwaKarunga, yiyo ga tuminine Munwendi Jesus a ya ku fire mokukuzowora. Nzambo ezi kwa ku pa mpito zokukaparuka noruhafo narunye nanarunye. *