NOVE wa lizuvha rumwe asi hansa kufa tupu ndi? Nsene yimo, kuvhura o kwate egano omu ga lizuvhire Adriana. Age kwa kere nosinka sosinene ntani kapi ga kere nehuguvaro, ano eyi ya mu ninkisire va ka mu kwateke uvera wokuguva-guva.

Tara hena sihonena saKaoru goMuyapani ogu nga pakere mbili vakondi vendi wokukurupa ava ngava vere. Age kwa tanta asi: “Ame kwa kere nosinka sosinene koyirugana. Tani ya zumbanesa eharo lyokulya ntani kapi ngani vhuru kuponyoka. Yipo na tamekere kugazara asi hansa kufa tupu ni ka pwizumuke ko.”

Ojebode goMunigelia kwa tanta asi: “Ame nkenye apa ngani guwu dogoro kulilira mo, ano ayo ngayi ninkisa nge ni hare kulidipaga.” Nampili ngoso, Ojebode naKaoru ntani Adriana kapi va lidipagere. Nye nkenye mvhura wovanzi kulidipaga vene.

Sinzi sava ava lidipaga vene kuna kara vagara, morwa awo kapi va hara kupura evatero. Jesus kwa tente asi vaveli yiwo va hepa muhakuli. (Rukasa 5:31) Nsene nove kuna kulizuvha asi ngwendi o fe, wa ha lizuvha nomuga kupapara evatero. Sinzi sovantu ava va kara nouvera wokuguva-guva, va yi nongonona asi va hepa ndokotora mokuvavatera va lididimikire. Ojebode naKaoru ntani Adriana kwa gwene evatero kovandokotora, awo ngesi kuna kulididimikira maudigu gawo.

Vandokotora kuruganesa nomutji ndi nonkango donongwa mokuvatera vaveli wokuguva-guva. Ava va kara nouvera wangoso, va hepa evatero lyovanekoro novakaume. Kaume gomunene po kuna kara Jehova Karunga, ogu a gava evatero kupitira moBibeli.

Vantu ava va kara nouvera wokuguva-guva uhaku wawo kugusa siruwo sosire, ntani va hepa kulironga kuparuka kuliza noukaro wawo. Nsene yiwo uvera ono kara nawo, kara nehuguvaro lyomeho zongwa ngwendi moomu ga yi rugene Ojebode. Age kwa tente asi: “Ame kuna kundindira apa nonkango domwaJesaya 33:24 edi asi: ‘Nagumwe si gomosirongo esi twa kara nga sivana asi ta vere.’” Ngwendi Ojebode, gwana ehengagwido metumbwidiro lyaKarunga kuhamena “evhu lyepe,” omu ngamu dira kukakara ‘kukora.’ (Ehororo 21:1, 4) Etumbwidiro eli kutanta asi kukora kopomalizuvho nopomagazaro kapi ngayi ka kara ko hena. Kapi ngo ka zuvha hena kukora pamalizuvho. Bibeli kutanta asi: “Yihoroka yanare ngava yi divara nuunu.”—Jesaya 65:17.