NSENE nove wa ligwanekera noyimpagwa, kuvhura o kwate egano ava va pita mo. Ayo kureta utjirwe nepiyagano nosinka ntani nokuvhura si kurara. Sinzi sava ava piti moyimpagwa kudompa nomutjima nokulizuvha asi hansa kufa tupu.

Nsene nove wa zumbanesa yininke mosimpagwa, kuvhura o lizuvhe asi udigu kulididimikira. Kuvhura o tameke kulizuvha asi eparu kwato mulyo. Nye Bibeli kwa faturura asi eparu lyoge mulyo ntani azo kugava ehuguvaro lyewa kuhamena meho.

Muudisi 7:8 kutanta asi: “Ehagero lyankenye sininke lya pitakana etameko.” Nsene ntani tupu ono kutunda mosimpagwa, eparu kumoneka ngwendi kwato ehuguvaro. Nye mokurugana unene o wapukurure eparu lyoge, yininke kuyakara hena moomu ya kere nare.

Bibeli kwa pumba asi ngaku kara siruwo apa ngaku dira “siliro ndi asi va hepe ekwafo.” (Jesaya 65:19) Eyi ngayi ka sika mo apa evhu ngali ka kara Paradisa mepangero lyaKarunga. (Episarome 37:11, 29) Yimpagwa kapi ngayi ka kara ko hena. Kukora nakunye noruguwo kapi ngayi ka kara ko hena, morwa Karunga Munakondo kwa tumbwidira asi: “Yihoroka yanare ngava yi divara nuunu.”—Jesaya 65:17.

Gazara tupu, Musiti ga kara ‘nomagazaro gokuhamena yokomeho eyi tuna ku ndindira,’ alyo eparu lyewa mepangero lyaKarunga. (Jeremiya 29:11) Pokudiva usili ou, ngayi ku vatera o kare nomutaro gouhunga keparu. Sally ogu vana tumbura mosirongwa sokuhova, kwa tanta asi: “Kugazadara ko yininke nayinye yoyiwa eyi ngali ka rugana epangero lyaKarunga, ngayi ku vatera o divare eyi ya ku horokera nokutwikira kulididimikira.”

Twikira kudiva ko yoyinzi kuhamena eyi epangero lyaKarunga ngali ka ruganena vantu komeho. Pokurugana ngesi, ngayi ku vatera o kwate egano asi eparu mulyo nampili ngomu wa ligwanekera noyimpagwa. Bibeli kugava mapukururo gomawa aga naga tu vatera tu lididimikire yimpagwa. Tara yihonena yimwe.