Nsene kuna kara nouvera wounene

PLAY

Linda gonomvhura 71 kwa tanta asi: “Apa ndokotora ga tanterere nge asi nina kara nokankera zokomapunga nokomaura, yipo na lizuvhe asi ntaantani ni fe. Apa na ka sikire kembo tani litantere nyamwange asi ‘kapisi yimo nina yi ndindire, nye na hepa kulididimikira.’”

Elise gonomvhura 49 kwa tanta asi: “Ame kwa kara nouvera wokukora ou au kundama nonsipa doruha rumwe rosipara sange. Kukora oku, poyiruwo yimwe ku ninkisa nge ni guva-guve. Pamwe ngani lizuvhu mukuma ntani ngayi ninkisa nge ni hare kulidipaga.”

NSENE va ku kwateka uvera wokutwaredesa konomfa ndi gumwe gekoro lyoge vana u kwateke, ayo kureta sinka sosinene. Kugusa ko kukora kouvera, ove ngo ligwanekera noudigu wopamalizuvho. Udigu wokugwana uhaku ndi ndokotora kureta sinka nowoma, ano kufutira nomutji nayo kureta hena sinka. Uvera wounene kureta sili sinka nomalizuvho gokulisiga-siga.

Kupi natu vhura kugwana evatero? Sinzi sovantu kwa ya nongonona asi evatero kuligwana tupu kwaKarunga kupitira momakanderero nomokuresa Bibeli. Evatero limwe kuligwana keharo eli ava tu likida vakwetu novanekoro.

OMU VAMWE VA LIDIDIMIKIRA

Robert gonomvhura 58 kwa tanta asi: “Nsene o kara nepuro mwaKarunga, age nga ku vatera o lididimikire uvera woge. Kanderera kwaJehova, ntani mu tantera omu ono kulizuvha. Mu hundira mpepo zendi zokupongoka yipo o kare nononkondo dokulididimikira uvera woge.

“Ayo kukorangeda sili nsene venekoro va ku vatera posiruwo esi ono hepa evatero. Awo nkenye apa kubela nge nokupulida omu nina karere. Ame na kara novakwetu ava ava korangeda nge. Eyi kuvatera nge ni lididimikire.”

Nsene kuna kukadingura gumwe ogu ana kuvera, Linda kwa tanta asi: “Wa ha simwitira kuhamena uvera wendi, morwa nage ana hara kuzuvha omu lina kugenda po eparu. Zogera nage yininke eyi ngomu zogere apa ga kere age mu waawa.”

Nevatero lyaKarunga noBibeli novanekoro ntani novakaume, ose kuvhura kukara nehuguvaro asi eparu simpe mulyo nampili ngomu tuna kulididimikira uvera wounene.

Matjangwa aga naga ku vatera

Huguvara mwaKarunga.

“Ame kwa kandererere HOMPA, makura ta zuvhu nge, age kwa mangurura nge koutjirwe wange naunye. Munaruhepo kwa kugire, makura HOMPA ta mu zuvhu.” —Episarome 34:4, 6.

Linda ogu vana tumbura mosirongwa esi, kwa tanta asi: “Kapi ani kanderere asi ‘Karunga a verure nge,’ nye asi a ‘vatere nge ni lididimikire uvera wange.’”

Gwana evatero pokuresa Bibeli.

“Nagumwe si gomosirongo esi twa kara nga sivana asi ta vere.”—Jesaya 33:24.

Gazadara ko komatumbwidiro gaKarunga kuhamena meho zongwa yipo ngayi ku pe ehuguvaro nononkondo dokulididimikira.

Gwana evatero ko vakweni novanekoro.

“Vantu namukwawo kulihara. Ano vantu namumbyendi wovagara nani kapisi kwa karera po, va likwafe moudigu?”—Yisewe 17:17.

Elise ogu vana tumbura mosirongwa esi, kwa tanta asi: “Wa ha kara-kara nyovelike, tantera ko vakweni yipo va ku vatere. Poyiruwo yimwe kuvhura o lizuvhe mukuma ntani nokugazara asi Karunga kapi ana kukupakera mbili, nye wa ha ligusa ko kovakweni.”

Kuvhura o hafere hena

RUHUNGU

Nsene gemepata kuna kara nouvera wokutwaredesa konomfa

Ngapi omu vemepata nava hengagwida nokupakera mbili ogu ana kara nouvera wokutwaredesa konomfa? Ngapi ava vana kuveda muveli nava vhura kulididimikira malizuvho gomadona?

RUHUNGU